પેટ્રોલ અને ડીઝલ પછી હવે શું તમારો મોબાઈલ રિચાર્જ પણ થશે મોંઘો? જાણી લો ટેલિકોમ કંપનીઓનો આ ઇનસાઇડ પ્લાન
દેશમાં ઈંધણના વધતા ભાવની વચ્ચે હવે સામાન્ય જનતાના ખિસ્સા પર વધુ એક ફટકો પડવાની આશંકા છે. પેટ્રોલ-ડીઝલ બાદ હવે મોબાઈલ રિચાર્જ પ્લાન મોંઘા થવાના સંકેત મળી રહ્યા છે, જેની પાછળ મોબાઈલ ટાવર અને 5G કનેક્ટિવિટી સાથે જોડાયેલું એક મોટું ગણિત છે.
સામાન્ય રીતે લોકોને એવું લાગે છે કે પેટ્રોલ અને ડીઝલના ભાવ વધારાને મોબાઈલ રિચાર્જ સાથે કોઈ લેવાદેવા નથી. પરંતુ વાસ્તવિકતા એ છે કે દેશભરમાં પેટ્રોલના ભાવ ઘણા શહેરોમાં 107 રૂપિયા પ્રતિ લીટર સુધી પહોંચી ગયા છે, અને આ વધારાની સીધી અસર હવે ટેલિકોમ કંપનીઓના ઓપરેટિંગ ખર્ચ પર પડી રહી છે. આ વધતો ખર્ચ આખરે ગ્રાહકોના માથે જ આવી શકે છે.
મોબાઈલ ટાવર પાછળનો મોટો ખર્ચ: મોબાઈલ નેટવર્કને ચોવીસ કલાક ચાલુ રાખવા માટે દેશભરમાં હજારો ટાવર્સ સતત કામ કરે છે. આ ટાવર્સને ચલાવવા માટે વીજળી અને ડીઝલનો મોટા પાયે ઉપયોગ થાય છે. અહેવાલો અનુસાર, કોઈપણ મોબાઈલ ટાવરના કુલ ઓપરેટિંગ ખર્ચનો આશરે 40 ટકા હિસ્સો માત્ર વીજળી અને ઈંધણ પાછળ જ વપરાય છે. ખાસ કરીને ગ્રામીણ અને અંતરિયાળ વિસ્તારોમાં, જ્યાં વીજળીની અછત છે, ત્યાં ટાવર્સ હજુ પણ ડીઝલ જનરેટર પર નિર્ભર છે. આવી સ્થિતિમાં ડીઝલ મોંઘું થતાં કંપનીઓનો ખર્ચ સેંકડો કરોડ રૂપિયા વધી ગયો છે.
5G નેટવર્કનું નવું સંકટ: દેશમાં અત્યારે 5G નેટવર્કનું વિસ્તરણ ખૂબ જ ઝડપથી થઈ રહ્યું છે. પરંતુ ચિંતાની વાત એ છે કે 5G ટાવર્સ જૂના નેટવર્ક (4G) ની સરખામણીએ ઘણી વધારે વીજળી વાપરે છે અને તેમને સતત હાઈ પાવર સપોર્ટની જરૂર પડે છે. આના કારણે કંપનીઓનો મેન્ટેનન્સ ખર્ચ આગામી સમયમાં હજુ પણ વધી શકે છે.
ગ્લોબલ સપ્લાય ચેન અને મોંઘા હાર્ડવેર: માત્ર ઈંધણ જ નહીં, પરંતુ વૈશ્વિક સ્તરે ચાલી રહેલી સમસ્યાઓને કારણે નેટવર્ક ઉપકરણો, બેટરીઓ અને અન્ય જરૂરી હાર્ડવેરની કિંમતો પણ પહેલાથી જ વધી ગઈ છે. ટેલિકોમ કંપનીઓ લાંબા સમયથી ટેરિફ પ્લાન મોંઘા કરવાનું વિચારી રહી હતી, પરંતુ ઈંધણના આ નવા ભાવ વધારા બાદ કંપનીઓ આ નિર્ણય ધાર્યા કરતાં વહેલો લઈ શકે છે. જો આવું થશે, તો આગામી મહિનાઓમાં સામાન્ય યુઝર્સે કોલિંગ અને ડેટા પ્લાન માટે વધુ પૈસા ચૂકવવા પડશે.
મોબાઈલ હવે દરેક વ્યક્તિની પ્રાથમિક જરૂરિયાત બની ગયો છે. પેટ્રોલ-ડીઝલના ભાવ વધારાની આ આડઅસર સામાન્ય લોકોના ઘરના બજેટને વધુ ખોરવી શકે છે. હવે જોવાનું એ રહેશે કે ટેલિકોમ કંપનીઓ ક્યારથી અને કેટલો ભાવ વધારો ઝીંકે છે.
