
ભારતીય રેલવેમાં રાત્રે 10 વાગ્યા પછી મુસાફરોની સુવિધા અને આરામ માટે ખાસ માર્ગદર્શિકા છે. આ સમય દરમિયાન ટિકિટ ચેકિંગ, અવાજની મર્યાદા, મિડલ બર્થ અને મુસાફરોના અધિકારોનું ધ્યાન રાખવું જરૂરી છે. રાત્રે મુસાફરી કરતા પહેલાં આ નિયમો જાણી લેવા જોઈએ.

રાત્રે 10 વાગ્યાથી સવારે 6 વાગ્યા સુધી ઊંઘતા મુસાફરોને ટિકિટ તપાસવા માટે વારંવાર જગાડવા ન જોઈએ. જોકે, રાત્રે 10 વાગ્યા પછી ટ્રેનમાં ચઢેલા મુસાફરોની ટિકિટ TTE ચેક કરી શકે છે. મુસાફરોએ પોતાની ટિકિટ અને ઓળખપત્ર તૈયાર રાખવા જોઈએ.

રાત્રે ટ્રેનમાં મુસાફરી દરમિયાન સહપ્રવાસીઓની ઊંઘમાં ખલેલ ન પહોંચે તેનું ધ્યાન રાખવું જોઈએ. ઊંચા અવાજે વાતચીત, મોબાઇલમાં લાઉડસ્પીકર અને હેડફોન વગર ગીતો વગાડવા ટાળવા જોઈએ. રેલવે અધિનિયમની કલમ 145 (Railways Act Section 145) હેઠળ ઉપદ્રવ બદલ કાર્યવાહી થઈ શકે છે.

ભારતીય રેલવેના મિડલ બર્થ નિયમ મુજબ રાત્રે 10 વાગ્યાથી સવારે 6 વાગ્યા સુધી મુસાફર પોતાની બર્થ ખોલીને સૂઈ શકે છે. આ સમય દરમિયાન અન્ય મુસાફરોએ અવરોધ ન કરવો જોઈએ. સવારે 6 વાગ્યા પછી મિડલ બર્થ બંધ કરીને બેઠકની વ્યવસ્થા કરવી પડે છે.

રાત્રિના સમયે મુસાફરોને આરામ મળે તે માટે કોચમાં નાઇટ લાઇટની વ્યવસ્થા હોય છે. મુખ્ય લાઇટ બંધ રાખવી અને અન્ય મુસાફરોને ખલેલ ન પહોંચે તેનું ધ્યાન રાખવું જોઈએ. કેટલીક ટ્રેનોમાં રાત્રે કેટરિંગ મર્યાદિત હોઈ શકે છે, તેથી ભોજનનું અગાઉથી આયોજન કરવું હિતાવહ છે.

ટ્રેનમાં મુસાફરી દરમિયાન કોઈ સમસ્યા થાય, અન્ય મુસાફર હેરાન કરે અથવા રેલવે સ્ટાફ દ્વારા બિનજરૂરી મુશ્કેલી ઊભી થાય તો રેલવે હેલ્પલાઇન 139 પર ફરિયાદ કરી શકાય છે. દરેક મુસાફરે અન્યના અધિકારોનું સન્માન કરીને શાંતિપૂર્ણ મુસાફરી જાળવવી જોઈએ.