LIC સહિત 2 વીમા કંપનીઓમાંથી હિસ્સો વેચવાના મૂડમાં સરકાર, આ છે યોજના
સૂત્રો દ્વારા મળતી માહિતી અનુસાર ભારત સરકાર રોકાણકારોની માગનું મૂલ્યાંકન કર્યા પછી જનરલ ઈન્સ્યોરન્સ કોર્પોરેશન અને એલઆઈસીમાં અલ્પમત હિસ્સો વેચવા માટે તૈયાર છે.
નાણાકીય વર્ષ 2024-25માં કેન્દ્ર સરકાર જનરલ ઈન્સ્યોરન્સ કોર્પોરેશન ઓફ ઈન્ડિયા (GIC) અને લાઈફ ઈન્સ્યોરન્સ કોર્પોરેશન ઓફ ઈન્ડિયા (LIC)માં હિસ્સો વેચી શકે છે. એક સરકારી અધિકારીએ ન્યૂઝ એજન્સી રોઈટર્સને આ જાણકારી આપી છે. સૂત્રએ જણાવ્યું હતું કે ભારત સરકાર રોકાણકારોની માંગનું મૂલ્યાંકન કર્યા પછી જનરલ ઈન્સ્યોરન્સ કોર્પોરેશન અને LICમાં લઘુમતી હિસ્સો વેચવા માટે તૈયાર છે.
સરકારી અધિકારીએ જણાવ્યું - GIC માટેના રોકાણકારોનો સારો પ્રતિસાદ મળ્યો છે. આવી સ્થિતિમાં, સરકાર હવે તેના શેરના મૂલ્યના આધારે 10% હિસ્સો હપ્તે વેચવા માટે તૈયાર છે. GICમાં 10% હિસ્સાનું વેચાણ ચોક્કસ સમયગાળામાં કરવામાં આવશે. તમને જણાવી દઈએ કે છેલ્લા છ મહિનામાં GICના શેરમાં લગભગ 45%નો વધારો થયો છે.
LIC વિશે વાત કરીએ તો,વર્ષ 2022માં લિસ્ટિંગ થયા પછી સરકાર 7 વર્ષમાં 10% હિસ્સો અને 10 વર્ષમાં 25% હિસ્સો વેચવાના લક્ષ્ય પર આગળ વધવા જઈ રહી છે.
સૂત્રએ જણાવ્યું હતું કે એલઆઈસીના શેર મજબૂત પ્રદર્શન કરી રહ્યા છે. દેશની સૌથી મોટી વીમા કંપનીના શેર છેલ્લા છ મહિનામાં 58% ઉછળ્યા છે અને શુક્રવારે 973 પર બંધ થયા છે.
જણાવી દઈએ કે, LICના IPOમાં સરકારે કંપનીનો 3.5% હિસ્સો વેચ્યો હતો અને ઈન્ડેક્સ ફંડમાં વીમાદાતાને સામેલ કરવા માટે અન્ય 1.5% હિસ્સો વેચવાની યોજના બનાવી હતી. શુક્રવારના શેરના બંધ ભાવ અનુસાર LICમાં 1.5% હિસ્સો વેચવાથી સરકારને આશરે રૂ. 92 અબજ એકત્ર કરવામાં મદદ મળી શકે છે.