Vegetables Storage Tips: ફ્રિજમાં મૂક્યા પછી પણ કોથમીર-મેથી કેમ થાય છે ખરાબ? શાકભાજી તાજી રાખવા અપનાવો આ ટિપ્સ
ફ્રિજમાં રાખ્યા પછી પણ કોથમીર, મેથી અને પાલક જલદી કરમાઈ જાય છે? જાણો લીલાં શાકભાજીને યોગ્ય રીતે સાફ કરવા, પેક કરવા અને સ્ટોર કરવાની સરળ ટિપ્સ, જે તેમની તાજગી જાળવવામાં અને ખોરાકનો બગાડ ઘટાડવામાં મદદરૂપ થઈ શકે છે.
ઘરમાં રોજિંદા રસોઈ માટે કોથમીર, મેથી, પાલક અને અન્ય લીલાં શાકભાજીનો ઉપયોગ થતો હોય છે. પરંતુ ઘણીવાર બજારમાંથી તાજાં શાક લાવ્યા પછી થોડા જ દિવસોમાં તે કરમાઈ જાય છે અથવા તેમનો રંગ બદલાવા લાગે છે. પરિણામે, ઉપયોગમાં લઈ શકાય તેવાં શાકભાજી પણ ફેંકી દેવાની નોબત આવે છે.
જો તમારી સાથે પણ આવું થતું હોય, તો શાકભાજીને ફ્રિજમાં રાખવાની રીતમાં થોડો ફેરફાર કરવો ઉપયોગી સાબિત થઈ શકે છે. લીલાં પાંદડાંવાળાં શાકભાજીમાં પાણીનું પ્રમાણ વધારે હોય છે. છોડમાંથી તોડ્યા પછી પણ તેમાંથી ભેજ ગુમાવવાની પ્રક્રિયા ચાલુ રહે છે.
બીજી તરફ, વધુ પડતી ભેજ અને યોગ્ય હવા ન મળવાથી પણ શાકભાજી ઝડપથી બગડી શકે છે. તેથી માત્ર ફ્રિજમાં મૂકી દેવાથી શાક લાંબા સમય સુધી તાજાં રહેશે એવું માનવું યોગ્ય નથી.
બજારમાંથી કોથમીર, મેથી કે પાલક લાવ્યા પછી સૌથી પહેલાં તેનાં પાંદડાં તપાસો. પીળાં પડેલાં, ચીમળાયેલાં, સડેલાં કે ચીકણાં પાંદડાં હોય તો તેને અલગ કરી દો. આવાં પાંદડાં આખા ગુચ્છા સાથે રાખવાથી બાકીના શાકભાજીની ગુણવત્તા પણ બગડી શકે છે. શાકને તપાસીને સ્ટોર કરવાથી બગડેલા ભાગને સમયસર દૂર કરી શકાય છે.
ઘણા લોકો શાકભાજી ઘરે લાવ્યા પછી તેને ધોઈને તરત જ ડબ્બામાં ભરી દે છે. જો પાંદડાં પર વધારે પાણી રહી જાય અને તેને બંધ ડબ્બામાં રાખવામાં આવે, તો અંદર ભેજ જમા થઈ શકે છે. આવી સ્થિતિમાં શાકભાજી જલદી બગડવાની શક્યતા રહે છે.
શાકભાજી ધોવાનું પસંદ કરો તો તેને સ્વચ્છ પાણીથી ધોઈને વધારાનું પાણી સારી રીતે નિતારી દો. ત્યારબાદ સ્વચ્છ કપડાં અથવા કાગળના ટુવાલની મદદથી ઉપરનું પાણી શોષી લો. શાક સંપૂર્ણપણે સૂકાઈ જાય તેની ખાતરી કર્યા પછી જ તેને યોગ્ય રીતે પેક કરો. જો ઉપયોગ પહેલાં ધોવાનું પસંદ કરો, તો પણ શાકભાજીને ગંદકી અને ભેજથી બચાવીને રાખવું જરૂરી છે.
લીલાં શાકભાજીને ફ્રિજમાં ખુલ્લાં રાખવાથી તે ઝડપથી ભેજ ગુમાવી શકે છે. બીજી તરફ, હવાની અવરજવર ન હોય એવા ભીના અને બંધ પેકેટમાં રાખવાથી પણ સમસ્યા ઊભી થઈ શકે છે. તેથી શાકભાજી માટે સ્વચ્છ કન્ટેનર અથવા યોગ્ય વેન્ટિલેશન ધરાવતી સ્ટોરેજ બેગનો ઉપયોગ કરો.
કન્ટેનરમાં ભેજ એકઠી થતી દેખાય તો તેને દૂર કરો અને શાકભાજીની સ્થિતિ તપાસો. પેકિંગ એવી રીતે કરો કે પાંદડાંને જરૂરી રક્ષણ મળે, પરંતુ અંદર વધારાનો ભેજ ફસાઈ ન રહે.
કોથમીર અને મેથીનાં પાંદડાં નાજુક હોય છે. ફ્રિજમાં જગ્યા બચાવવા માટે તેને નાના ડબ્બામાં વધારે દબાવીને ભરવાથી પાંદડાંને નુકસાન થઈ શકે છે. તેના ઉપર ભારે વસ્તુઓ મૂકવાનું પણ ટાળો.
શાકભાજીને પૂરતી જગ્યા મળે તે રીતે ગોઠવો. શક્ય હોય તો તેને ફ્રિજના શાકભાજી માટેના નિર્ધારિત ડ્રોઅરમાં રાખો અને ફ્રિજનું તાપમાન યોગ્ય સ્તરે જાળવો.
શાકભાજી ફ્રિજમાં મૂક્યા પછી તેને ભૂલી ન જશો. દર થોડા દિવસે તેની સ્થિતિ તપાસો. જો કોઈ પાંદડાં પીળાં પડવા લાગ્યાં હોય અથવા નરમ થઈ ગયાં હોય, તો તેને અલગ કરો. જે શાકભાજી પહેલાં ખરીદ્યાં હોય અથવા પહેલાં ખરાબ થવાની શક્યતા હોય તેનો ઉપયોગ પહેલાં કરો.
જો શાકમાં સડો, અસામાન્ય ચીકાશ કે દુર્ગંધ જણાય, તો તેને ખાવાનું ટાળો. શાકભાજી સારી સ્થિતિમાં હોય ત્યારે જ તેનો ઉપયોગ કરવો વધુ યોગ્ય છે.
ઘણીવાર ઓછા ભાવે મળતાં શાકભાજી વધારે પ્રમાણમાં ખરીદી લેવામાં આવે છે. પરંતુ જો ઘરમાં તેનો નિયમિત ઉપયોગ ન થતો હોય, તો તે ફ્રિજમાં લાંબો સમય પડ્યાં રહે છે. તેથી પરિવારની જરૂરિયાત અને આગામી દિવસોના મેનુ પ્રમાણે શાકભાજી ખરીદો. આ રીતે બગાડ ઘટાડવામાં અને ખાવાની વસ્તુઓનો વધુ સારી રીતે ઉપયોગ કરવામાં મદદ મળી શકે છે. (All Image Credit source: Social Media)
