Bulb Cleaning Tips: ધૂળ અને ચીકાશને કારણે બલ્બનો પ્રકાશ ઝાંખો પડી ગયો છે ? સાફ કરવા અપનાવો આ રીત
ઘરમાં લાગેલી ટ્યુબલાઇટ કે LED બલ્બ પર જમા થયેલી ધૂળ-માટી અને તેલની ચીકાશ તેના અજવાળાને ધીમું કરી દે છે. પાણી, સરકો અને રબિંગ આલ્કોહોલ જેવા સરળ ઘરેલુ ઉપાયોથી બલ્બને સ્ક્રૅચ વગર સુરક્ષિત રીતે કેવી રીતે ચમકાવવા, જાણો વિગતવાર.
ઘરમાં લાગેલા બલ્બ અને ટ્યુબલાઇટનો પ્રકાશ અમુક સમય પછી ધીમો પડવા લાગે છે. તેનું મુખ્ય કારણ તેના પર જમા થયેલી ધૂળ અને ગંદકીનું સ્તર હોય છે. આવા સમયે લોકોને ઘણીવાર મૂંઝવણ થાય છે કે બલ્બને નુકસાન પહોંચાડ્યા વગર સુરક્ષિત રીતે કેવી રીતે સાફ કરવો. જો તમે પણ બલ્બ ચમકાવવા માટે સરળ રીત શોધી રહ્યા હોવ, તો અહીં દર્શાવેલી સરળ અને ઉપયોગી ટિપ્સ અપનાવી શકો છો:
સૂકું માઇક્રોફાઇબર કાપડ: બલ્બને સાફ કરવા માટે સૌથી પહેલાં તેના પર જમા થયેલી સૂકી ધૂળને મુલાયમ માઇક્રોફાઇબર કાપડથી લૂછી લો. માઇક્રોફાઇબર કાપડ ધૂળના કણોને પોતાની તરફ સરળતાથી ખેંચી લે છે અને કાચ પર કોઈ સ્ક્રેચ પણ પડવા દેતું નથી.
સરકો (વિનેગર) અને પાણીનું મિશ્રણ: જો બલ્બ પર જૂના ડાઘ કે ચીકાશ જામી ગઈ હોય, તો સરકો અને પાણીનું સોલ્યુશન શ્રેષ્ઠ ઉપાય છે. આ માટે એક સ્પ્રે બોટલમાં અડધો કપ પાણી અને અડધો કપ સફેદ સરકો મિક્સ કરો. આ પ્રવાહીને સીધું બલ્બ પર છાંટવાને બદલે કપડા પર થોડું સ્પ્રે કરો. ત્યારબાદ તે કપડાથી બલ્બને હળવા હાથે લૂછી લો અને પછી તરત જ સૂકા કપડાથી લૂછીને સૂકવી દો.
નવશેકું પાણી અને ડીશવોશ લિક્વિડ: રસોડામાં કે પંખા પાસે લાગેલા બલ્બ પર સામાન્ય રીતે તેલ અને વરાળની ચીકાશ જામી જતી હોય છે. તેને દૂર કરવા માટે એક વાટકી હૂંફાળા પાણીમાં 2 થી 3 ટીપાં ડીશવોશિંગ લિક્વિડ ઉમેરો. આ મિશ્રણમાં સ્વચ્છ કાપડ પલાળીને તેને બરાબર નીચોવી લો. ત્યારબાદ બલ્બને લૂછીને સાફ કરો અને તરત જ કોટનના સૂકા કપડાથી સાફ કરી લો.
બેકિંગ સોડાનો ઉપયોગ: જો બલ્બના કાચ પર અત્યંત જૂના અને હઠીલા ડાઘ હોય, તો થોડો બેકિંગ સોડા લઈને તેમાં થોડાં ટીપાં પાણી ઉમેરી જાડી પેસ્ટ બનાવી લો. આ પેસ્ટને સ્પોન્જ કે કાપડની મદદથી ડાઘવાળા ભાગ પર હળવા હાથે ઘસો. ત્યારબાદ ભીના કપડાથી લૂછીને છેલ્લે સૂકા કપડાથી સાફ કરી લો.
આઇસોપ્રોપીલ રબિંગ આલ્કોહોલ: બલ્બને પાણીના વધુ ઉપયોગ વગર તાત્કાલિક સૂકવવા અને ચમકાવવા માટે રબિંગ આલ્કોહોલ ખૂબ જ અસરકારક છે. આ માટે રૂ અથવા માઇક્રોફાઇબર કાપડ પર થોડો રબિંગ આલ્કોહોલ કે હેન્ડ સેનિટાઇઝર લગાવો અને બલ્બને લૂછી લો. આનાથી બલ્બ પર જામેલી ગંદકી અને બેક્ટેરિયા બંને સરળતાથી સાફ થઈ જશે.
(સાવચેતી: કોઈપણ લાઇટ કે બલ્બ સાફ કરતાં પહેલાં સ્વિચ બંધ કરવી અને બલ્બ ઠંડો થઈ જાય ત્યાર પછી જ સાફ કરવો હિતાવહ છે.)
