મોઢામાં મૂકતા જ ઓગળી જશે ‘ગુલાબ જાંબુ’, બજાર જેવા ટેસ્ટી અને સોફ્ટ બનાવવા માટે ફોલો કરો આ ‘સિક્રેટ ટિપ્સ’
તહેવાર હોય કે કોઈ ખાસ પ્રસંગ, ગુલાબ જાંબુ વગર બધું અધૂરું લાગે છે. જો કે, ઘણીવાર ઘરે ગુલાબ જાંબુ બનાવતી વખતે તે તેલમાં ફાટી જાય છે અથવા કડક થઈ જાય છે. જો તમારી સાથે પણ આવું થતું હોય, તો જાણી લો આ નાની અને સરળ ટિપ્સ, જેનાથી તમારા ગુલાબ જાંબુ દર વખતે એકદમ સોફ્ટ, ગોળ અને પરફેક્ટ બનશે.
ગુલાબ જાંબુ એ એક એવી ભારતીય મીઠાઈ છે કે, જેના વગર તહેવાર, લગ્ન કે કોઈ ખાસ પ્રસંગની મીઠાશ અધૂરી લાગે છે. જો કે, જ્યારે લોકો તેને ઘરે બનાવવાનો પ્રયત્ન કરે છે, ત્યારે અવારનવાર એક સમસ્યા સામે આવે છે. સમસ્યા એ કે, તળતી વખતે ગુલાબ જાંબુ ફાટવા લાગે છે અથવા તો તેનો આકાર બગડી જાય છે. જો તમારી સાથે પણ આવું થતું હોય તો ગભરાવાની જરૂર નથી. કેટલીક નાની-નાની વાતોનું ધ્યાન રાખીને તમે દર વખતે સોફ્ટ, ગોળ અને ફાટ્યા વગરના ગુલાબ જાંબુ બનાવી શકો છો.
સૌથી પહેલા સાચી સામગ્રીની પસંદગી કરવી ખૂબ જ જરૂરી છે. જો તમે મિલ્ક પાવડરમાંથી ગુલાબ જાંબુ બનાવી રહ્યા છો, તો ફૂલ-ફેટ મિલ્ક પાવડરનો ઉપયોગ કરો. લો-ફેટ (Low Fat) મિલ્ક પાવડરથી ગુલાબ જાંબુ અવારનવાર સૂકા બને છે અને તળતી વખતે તૂટવાની કે ફાટવાની શક્યતા વધી જાય છે. આ સાથે જ મેંદાનું પ્રમાણ પણ સંતુલિત રાખો. ખૂબ વધારે મેંદો નાખવાથી ગુલાબ જાંબુ કડક થઈ જાય છે, જ્યારે ખૂબ ઓછો મેંદો હોવા પર તે તેલમાં વણસી કે વિખેરાઈ શકે છે.
લોટ બાંધતી વખતે પણ ઉતાવળ ન કરો. મિશ્રણમાં જેટલા પ્રવાહીની જરૂર હોય એટલું જ નાખો અને લોટ તૈયાર કર્યા પછી તેને 5 મિનિટ માટે ઢાંકીને રાખી દો. આનાથી બધી સામગ્રી સારી રીતે સેટ થઈ જાય છે. તૈયાર થયેલો લોટ નરમ અને સુવાળો (ચીકણો) હોવો જોઈએ. જો તેમાં તિરાડો દેખાશે તો તળતી વખતે ગુલાબ જાંબુ ફાટી શકે છે.
ગુલાબ જાંબુ બનાવતી વખતે બેકિંગ પાવડરનો ઉપયોગ કરો પરંતુ બેકિંગ સોડા વધારે ન નાખો. જરૂરિયાત કરતાં વધુ બેકિંગ સોડા નાખવાથી જાંબુ તેલમાં જતાની સાથે જ ફાટી શકે છે. આ જ ભૂલ ઘણા લોકો અજાણતા કરી બેસે છે. હવે ગોળીઓ બનાવતી વખતે હાથ પર થોડું ઘી લગાવી લો અને કોઈ પણ તિરાડ વગરના સુવાળા બોલ્સ તૈયાર કરો. જો સપાટી પર સહેજ પણ ક્રેક (તિરાડ) હશે તો ગરમ તેલમાં એ જ ભાગ સૌથી પહેલા ફાટશે. તેથી આ સ્ટેપને બિલકુલ અવગણશો નહીં.
તળવાની રીત પણ એટલી જ મહત્વપૂર્ણ છે. હંમેશા મધ્યમથી ધીમી આંચ પર જ ગુલાબ જાંબુ તળો. જો તેલ ખૂબ વધારે ગરમ હશે તો બહારનો ભાગ ઝડપથી બ્રાઉન થઈ જશે, જ્યારે અંદરનો ભાગ કાચો રહી જશે અને જાંબુ ફાટી શકે છે. તળતી વખતે તેને ધીમે-ધીમે ફેરવતા રહો, જેથી તે ચારેય બાજુથી સરખી રીતે ચડી જાય.
ચાસણી પણ સહેજ ગરમ હોવી જોઈએ. ખૂબ વધારે ઉકળતી ચાસણીમાં ગરમ ગુલાબ જાંબુ નાખવાથી તે અચાનક ફૂલીને તૂટી શકે છે. તેથી તળ્યા પછી તરત જ તેને નવશેકી ચાસણીમાં નાખો અને ઓછામાં ઓછા 2 થી 3 કલાક સુધી તેને ડૂબેલા રહેવા દો. આનાથી ગુલાબ જાંબુ અંદર સુધી ચાસણી સોષી લે છે અને સ્વાદની સાથે-સાથે તેનું ટેક્સચર (બનાવટ) પણ અદભુત થઈ જાય છે.
