Breaking News : એક જ ઝાટકે કિંમતો ધડામ ! અચાનક સોનાનો દમ નીકળ્યો, ચાંદી પણ કડડભૂસ થઈ
વૈશ્વિક બજારમાં થયેલા મોટા ફેરફારો અને આંતરરાષ્ટ્રીય તણાવની સીધી અસર હવે કિંમતી ધાતુઓ પર જોવા મળી રહી છે. અઠવાડિયાના પહેલા જ દિવસે સોના અને ચાંદીના ભાવમાં મોટો કડાકો બોલાયો છે, જેને પગલે બજારમાં ભારે હલચલ મચી ગઈ છે.
રાષ્ટ્રીય રાજધાની (દિલ્હી)માં સોમવારે સોનાની કિંમતમાં ₹2,500નો મોટો કડાકો (Gold Price Crash) જોવા મળ્યો છે, જેનાથી સોનાનો ભાવ ઘટીને ₹1,60,400 પ્રતિ 10 ગ્રામ થઈ ગયો છે. આ અગાઉ સોનાનો ભાવ ₹1,62,900 પ્રતિ 10 ગ્રામ હતો. સોનાની સાથે ચાંદીના ભાવમાં પણ ₹5,000નો ઘટાડો નોંધાયો છે, જેથી ચાંદી પ્રતિ કિલો ₹2,69,700 પર પહોંચી ગઈ છે, જે અગાઉ ₹2,74,700 પ્રતિ કિલો હતી.
ઓલ ઈન્ડિયા સર્રાફા એસોસિએશન (All India Sarafa Association)ના જણાવ્યા અનુસાર, આ ઘટાડો વૈશ્વિક બજારની અસરને કારણે આવ્યો છે. યુએસ (US) અને ઈરાન વચ્ચે તણાવ વધવાને કારણે કાચા તેલ (ક્રૂડ ઓઈલ)ની કિંમતોમાં ઉછાળો આવ્યો છે અને ડોલર મજબૂત થયો છે, જેના કારણે સોના પર દબાણ વધ્યું છે.
એચડીએફસી સિક્યોરિટીઝ (HDFC Securities)ના સિનિયર એનાલિસ્ટ સૌમિલ ગાંધીએ જણાવ્યું કે, અઠવાડિયાની શરૂઆતમાં સોનું નબળું રહ્યું હતું. તેમણે ઉમેર્યું કે, યુએસ ટ્રેઝરી બોન્ડ યીલ્ડ (US Treasury Bond Yield) વધવાને કારણે પણ સોના અને ચાંદીના ભાવ પર અસર પડી છે.
આંતરરાષ્ટ્રીય બજારમાં સ્પોટ ગોલ્ડ (Spot Gold) આશરે 1 ટકા ઘટીને 4,504.97 ડોલર પ્રતિ ઔંસ રહ્યું હતું. બીજી તરફ, ચાંદી 1 ટકા વધીને 75.93 ડોલર પ્રતિ ઔંસ પર પહોંચી ગઈ હતી.
કોટક સિક્યોરિટીઝ (Kotak Securities)ના એવીપી કોમોડિટી રિસર્ચ કાયનાત ચેનવાલાએ જણાવ્યું હતું કે, આ અઠવાડિયે બજારની નજર યુએસ જોબ્સ ડેટા (US Jobs Data), ફેડરલ રિઝર્વના અધિકારીઓની ટિપ્પણીઓ અને ટ્રેઝરી સેક્રેટરી સ્કોટ બેસેન્ટ (Scott Bessent)ના નિવેદન પર રહેશે. આ સાથે જ પશ્ચિમ એશિયા (મિડલ ઈસ્ટ)ની પરિસ્થિતિ પર પણ બજારની નજર ટકેલી રહેશે.
