ન તેજી, ન મંદી ! સોના-ચાંદીના ભાવમાં આજે કેમ ના થઈ કોઈ ખાસ હલચલ?
સોમવારે સોના-ચાંદીના ભાવમાં કોઈ ખાસ મોટી હલચલ જોવા મળી નહોતી. વૈશ્વિક બજારની વધઘટ વચ્ચે સ્થાનિક બજારમાં કિંમતો લગભગ સ્થિર જેવી જ રહી હતી, જેના કારણે ખરીદદારોને થોડી રાહત મળી છે.
સોમવારે દિલ્હીમાં સોનાના ભાવ પ્રતિ 10 ગ્રામ રૂ. 1.62 લાખ પર સ્થિર રહ્યા હતા, જ્યારે ચાંદીના ભાવ થોડા વધીને પ્રતિ 1 કિલોગ્રામ રૂ. 2.76 લાખ પર પહોંચ્યા હતા. જણાવી દઈએ કે, ચાંદીની આયાત પર નવા નિયંત્રણો અને રૂપિયામાં નબળાઈના કારણે આવું જોવા મળ્યું છે. ઓલ ઈન્ડિયા સર્રાફા એસોસિએશનના જણાવ્યા અનુસાર, ચાંદીની કિંમત રૂ. 1,000 વધીને પ્રતિ 1 કિલોગ્રામ રૂ. 2,76,000 (તમામ ટેક્સ સહિત) થઈ ગઈ છે, જે શુક્રવારે બજાર બંધ થતી વખતે પ્રતિ કિલોગ્રામ રૂ. 2,75,000 હતી.
એસોસિએશનના જણાવ્યા મુજબ, સર્રાફા બજારમાં 99.9 ટકા શુદ્ધતાવાળા સોનાની કિંમત પ્રતિ 10 ગ્રામ રૂ. 1,62,800 પર યથાવત રહી હતી. વિશ્લેષકોએ જણાવ્યું હતું કે, વૈશ્વિક બજારમાં નબળાઈ છતાં સ્થાનિક સર્રાફા બજારના ભાવો પ્રમાણમાં મજબૂત રહ્યા હતા. HDFC સિક્યોરિટીઝના કોમોડિટીઝના સિનિયર એનાલિસ્ટ સૌમિલ ગાંધીએ જણાવ્યું હતું કે, સ્થાનિક બજારમાં સોનાના ભાવ સોમવારે સ્થિર રહ્યા હતા. આ પહેલાના સત્રમાં આંતરરાષ્ટ્રીય સર્રાફા બજારમાં નબળાઈના કારણે સોનામાં ભારે વેચવાલી જોવા મળી હતી.
સ્થાનિક ભાવોમાં ઘટાડો મર્યાદિત રહ્યો હતો, કારણ કે ભારતીય રૂપિયો યુએસ ડોલર સામે વધુ નબળો પડીને લગભગ 96.37 ના રેકોર્ડ નીચલા સ્તરે પહોંચી ગયો હતો. તેમણે વધુમાં ઉમેર્યું હતું કે, નબળા રૂપિયાએ સ્થાનિક સોનાના ભાવોમાં ઘટાડો રોકવામાં મદદ કરી છે. નિષ્ણાતોએ કેન્દ્ર સરકારના એ નિર્ણય પર પણ પ્રતિક્રિયા આપી હતી, જેમાં ચાંદીના લગભગ તમામ સ્વરૂપની આયાત પર તાત્કાલિક પ્રતિબંધ મૂકવામાં આવ્યો છે. આ પગલાનો હેતુ રૂપિયા પરનું દબાણ ઘટાડવાનો અને બિનજરૂરી આયાત પર રોક લગાવવાનો છે.
ગાંધીએ જણાવ્યું હતું કે, 'આ પગલાથી ચાંદીની આયાત ઘટવાની અને સ્થાનિક બજારમાં તેની ઉપલબ્ધતા ઓછી થવાની ધારણા છે, જેનાથી સ્થાનિક બજારમાં ચાંદી પર મળતું પ્રીમિયમ વધી શકે છે.' આંતરરાષ્ટ્રીય બજારમાં સ્પોટ ગોલ્ડ (Spot gold) સામાન્ય ઘટાડા સાથે 4,535.23 ડોલર પ્રતિ ઔંસ પર ટ્રેડ થઈ રહ્યું હતું, જ્યારે ચાંદી લગભગ 1 ટકા ઘટીને 75.42 ડોલર પ્રતિ ઔંસ પર આવી ગઈ હતી.
મીરા એસેટ શેરખાન (Mirae Asset ShareKhan) માં કોમોડિટીઝના વડા પ્રવીણ સિંહે જણાવ્યું હતું કે, સોમવારે સ્પોટ ગોલ્ડના ભાવમાં ઘટાડો થયો હતો, કારણ કે યુએસ ડોલર અને તેલના ભાવમાં ગયા સપ્તાહથી ચાલી રહેલી તેજી જળવાઈ રહી હતી. LKP સિક્યોરિટીઝના વીપી રિસર્ચ એનાલિસ્ટ (કોમોડિટી અને કરન્સી) જતિન ત્રિવેદીના જણાવ્યા અનુસાર, રોકાણકારો અમેરિકા અને ઈરાન વચ્ચે ચાલી રહેલી ગતિવિધિ તેમજ રૂપિયા-ડોલરની ચાલ પર પણ નજર રાખી રહ્યા છે, જે બુલિયન માર્કેટમાં ઉતાર-ચઢાવનું કારણ બની રહ્યા છે.
Published On - 8:37 pm, Mon, 18 May 26
