Breaking News: સોના-ચાંદીના બજારે લીધો જોરદાર ‘યુ-ટર્ન’, સતત ઘટાડા પછી અચાનક આવી ‘મોટી તેજી’
સતત ચાર દિવસના ઘટાડા પછી સોના અને ચાંદીના બજારે ફરી એકવાર જોરદાર યુ-ટર્ન લીધો છે. વૈશ્વિક બજારમાં અચાનક આવેલી તેજી અને આંતરરાષ્ટ્રીય સ્તરે બદલાતા સમીકરણોને કારણે કિંમતોમાં ફરી મોટો ઉછાળો જોવા મળ્યો છે.
સોમવારે રાષ્ટ્રીય રાજધાનીમાં કિંમતી મેટલ્સ (ધાતુઓ)ની કિંમતોમાં સુધારો થયો હતો. ગ્લોબલ માર્કેટમાં ઉછાળો અને રૂપિયાના મૂલ્યમાં ઘટાડાને કારણે સોનું 1,700 રૂપિયા વધીને 1.52 લાખ રૂપિયા પ્રતિ 10 ગ્રામ થઈ ગયું, જ્યારે ચાંદીની કિંમતમાં 4,800 રૂપિયાનો ઉછાળો આવ્યો હતો.
ઓલ ઇન્ડિયા સર્રાફા એસોસિએશનના જણાવ્યા અનુસાર, 99.9 ટકા શુદ્ધતાવાળા સોનાએ સતત ચાર દિવસના ઘટાડાનો સિલસિલો તોડ્યો અને શુક્રવારના 1,50,600 રૂપિયા પ્રતિ 10 ગ્રામના ક્લોઝિંગ લેવલ (બંધ ભાવ) થી 1,700 રૂપિયા વધીને 1,52,300 રૂપિયા પ્રતિ 10 ગ્રામ (તમામ ટેક્સ સહિત) પર બંધ થયું.
ચાંદીની કિંમત પણ 4,800 રૂપિયા વધીને 2,45,500 રૂપિયા પ્રતિ કિલોગ્રામ (તમામ ટેક્સ સહિત) થઈ ગઈ. અગાઉના સેશનમાં ચાંદી 2,40,700 રૂપિયા પ્રતિ કિલોગ્રામ પર બંધ થઈ હતી, જેમાં 8,040 રૂપિયાનો ઘટાડો નોંધાયો હતો. વેપારીઓએ જણાવ્યું હતું કે, રૂપિયાના મૂલ્યમાં ઘટાડો અને વિદેશી બજારોમાં મજબૂતીના કારણે ગયા અઠવાડિયે આવેલા ભારે ઘટાડા બાદ બુલિયન (સોના-ચાંદી)ની માંગમાં ફરી તેજી આવી છે.
HDFC સિક્યોરિટીઝના કોમોડિટીઝ સિનિયર એનાલિસ્ટ સૌમિલ ગાંધીએ જણાવ્યું કે, 'સોમવારે સોનાની કિંમતોમાં થોડો વધારો થયો, કારણ કે ઇન્વેસ્ટર્સે (રોકાણકારોએ) સુધરતા જતા જીઓ-પોલિટિકલ વાતાવરણ અને લાંબા સમય સુધી ઊંચા યુએસ વ્યાજ દરોની અપેક્ષાઓ વચ્ચે સંતુલન બનાવ્યું.'
ઇન્ટરનેશનલ માર્કેટમાં સ્પોટ ગોલ્ડ 49.93 USD અથવા 1.2 ટકા વધીને 4,210.19 USD પ્રતિ ઔંસ થઈ ગયું, જ્યારે ચાંદી 2.4 ટકા વધીને 66.47 USD પ્રતિ ઔંસ થઈ ગઈ. મિરાએ એસેટ શેરખાનના કોમોડિટીઝ અને કરન્સી હેડ પ્રવીણ સિંહે જણાવ્યું કે, 'સ્પોટ ગોલ્ડ અને ચાંદીની કિંમતોમાં વધારો જોવા મળ્યો, કારણ કે અમેરિકા અને ઈરાન સ્વિટ્ઝરલેન્ડમાં વાતચીત દરમિયાન અંતિમ કરાર માટેના રોડમેપ પર સહમત થયા છે.'
તેમણે ઉમેર્યું કે, અંતિમ કરાર સુધી પહોંચવા માટે 60 દિવસના સીઝફાયર (યુદ્ધવિરામ) દરમિયાન ઈરાનના ન્યુક્લિયર પ્રોગ્રામ અને પ્રતિબંધો સહિતના ઘણા મુદ્દાઓ પર ટેકનિકલ વાતચીત ચાલુ રહેશે. એનાલિસ્ટ્સનું કહેવું છે કે, અમેરિકામાં લાંબા સમય સુધી ઊંચા વ્યાજ દરોની અપેક્ષાને કારણે બુલિયનની કિંમતોમાં વધારો મર્યાદિત રહી શકે છે. માર્કેટ સાથે જોડાયેલા લોકો વ્યાજ દરોની ચાલ વિશે નવા સંકેતો મેળવવા માટે આ અઠવાડિયે આવનારા US લેબર માર્કેટના મહત્વના ડેટાની પણ રાહ જોઈ રહ્યા છે.
LKP સિક્યોરિટીઝમાં કોમોડિટી અને કરન્સીના VP રિસર્ચ એનાલિસ્ટ જતિન ત્રિવિદીએ જણાવ્યું કે, 'હવે ધ્યાન આ અઠવાડિયે આવનારા US નોન-ફાર્મ પેરોલ્સ અને બેરોજગારીના ડેટા પર છે, જે સોના-ચાંદીની કિંમતોમાં આગામી મોટી હલચલનું કારણ બની શકે છે.'
