10 ગ્રામ ‘સોનું’ સીધું ₹ 2 લાખ પર પહોંચશે? ભાવમાં આવશે ‘ઐતિહાસિક ઉછાળો’, આની પાછળનું ગણિત સમજો
શું 'સોનું' ખરેખર સામાન્ય માણસની પહોંચથી બહાર થઈ જશે? જો તમે પણ સોનામાં રોકાણ કરવાનું વિચારી રહ્યા છો અથવા દાગીના ખરીદવાની યોજના બનાવી રહ્યા છો, તો આ સમાચાર તમારા માટે ખૂબ જ મહત્વપૂર્ણ છે. વાત એમ છે કે, આવનારા સમયમાં 'સોનું' તમામ જૂના રેકોર્ડ તોડીને પ્રતિ 10 ગ્રામ ₹2 લાખની ઐતિહાસિક સપાટી વટાવી શકે છે.
આજકાલ સોનાના ભાવમાં સતત વધઘટ જોવા મળી રહી છે. ક્યારેક ભાવ ઝડપથી વધે છે, તો ક્યારેક ઘટાડાના કારણે રોકાણકારોની ચિંતા વધી જાય છે. આવા સમયે જો તમે પણ સોનામાં રોકાણ કરવાની યોજના બનાવી રહ્યા છો, તો આગામી સમયમાં તેના ભાવ પર નજર રાખવી જરૂરી છે.
સોનાના ભાવમાં વધઘટ વચ્ચે બજારના નિષ્ણાતોનો અંદાજ છે કે, વર્ષ 2027 સુધીમાં તેની કિંમત પ્રતિ 10 ગ્રામ રૂ. 2 લાખને પાર પહોંચી શકે છે. વાસ્તવમાં, સોનાની કિંમત પર અમેરિકી ડોલર, વ્યાજ દરો, મોંઘવારી અને વિશ્વમાં ચાલી રહેલા તણાવની અસર પડે છે. આ સિવાય ચીન સહિત અનેક દેશોની સેન્ટ્રલ બેંકો દ્વારા સોનાની ખરીદી પણ તેની માંગને પ્રભાવિત કરે છે.
જેપી મોર્ગનના જૂન 2026માં પ્રકાશિત થયેલા રિપોર્ટ અનુસાર, સોનાનો ભાવ વર્ષ 2026ના અંત સુધીમાં 6,000 ડોલર (લગભગ રૂ. 5.5 લાખ) અને વર્ષ 2027ના અંત સુધીમાં 6,300 ડોલર (લગભગ રૂ. 5.8 લાખ) પ્રતિ ઔંસ સુધી પહોંચી શકે છે.
રૂપિયો અને ડોલરના વિનિમય દરને ધ્યાનમાં રાખતા, આ અંદાજ ભારતીય બજારમાં સોનાની કિંમત પ્રતિ 10 ગ્રામ લગભગ રૂ. 2.13 લાખ સુધી પહોંચવાની આશા દર્શાવે છે.
સોનાના ભાવમાં તેજી કે ઘટાડા પાછળ અમેરિકી ડોલર અને બોન્ડ યીલ્ડની મહત્વની ભૂમિકા હોય છે. ડોલર જ્યારે નબળો પડે છે અથવા બોન્ડ પરથી મળતું વળતર ઘટે છે, ત્યારે રોકાણકારો માટે 'સોનું' એક આકર્ષક વિકલ્પ બની શકે છે.
બીજી તરફ, ડોલર મજબૂત થવા અને વ્યાજ દરો ઊંચા રહેવા પર સોનાના ભાવ પર દબાણ આવી શકે છે. સોનાની કિંમત પ્રતિ 10 ગ્રામ રૂ. 2 લાખને પાર પહોંચવા માટે ઘણી બધી પરિસ્થિતિઓનો સાથ મળવો જરૂરી રહેશે.
નિષ્ણાતોના જણાવ્યા મુજબ, જો વૈશ્વિક પરિસ્થિતિઓ સોનાની તરફેણમાં રહે છે, તો તેની કિંમત વર્ષ 2027 સુધીમાં પ્રતિ 10 ગ્રામ રૂ. 1.70 લાખથી રૂ. 2 લાખના સ્તર સુધી પહોંચી શકે છે. તે જ સમયે, 'ચીન' સહિત ઘણા દેશોની સેન્ટ્રલ બેંકો દ્વારા સોનાની ખરીદી પણ તેની માંગને ટેકો આપી શકે છે.
