ભાવ ઘટતા હવે ‘સોનું’ ખરીદવું, વેચવું કે પછી હોલ્ડ કરવું? રોકાણકારો મૂંઝવણમાં મુકાયા
સોનાના ભાવમાં થઈ રહેલ ભારે ઉથલપાથલ વચ્ચે રોકાણકારો મૂંઝવણમાં મુકાયા છે. આવી સ્થિતિમાં પ્રશ્ન એ થાય છે કે, શું 'સોનું' ખરીદવું ફાયદાકારક રહેશે, વેચી દેવું યોગ્ય રહેશે કે પછી યોગ્ય સમયની રાહ જોઈને તેને હોલ્ડ કરવું?
અમેરિકાના મોંઘવારીના મહત્વના આંકડા જાહેર થાય તે પહેલાં રોકાણકારોની નફારૂપી વેચવાલી (પ્રોફિટ બુકિંગ) વધી ગઈ છે. આની અસર સોનાના ભાવ પર પણ જોવા મળી. બુધવાર, 10 જૂનના રોજ સ્થાનિક બજારમાં સોનું 1.50 લાખ રૂપિયા પ્રતિ 10 ગ્રામના સ્તરથી નીચે સરકી ગયું. MCX પર 24 કેરેટ સોનું 1,47,489 રૂપિયા પ્રતિ 10 ગ્રામ પર કારોબાર કરતું જોવા મળ્યું હતું. આ એક જ ટ્રેડિંગ સેશનમાં 3,500 રૂપિયાથી વધુનો ઘટાડો છે. 13 મેના રોજ સોનું 1,64,500 રૂપિયા પ્રતિ 10 ગ્રામના રેકોર્ડ સ્તર પર પહોંચી ગયું હતું. તે સ્તરથી અત્યાર સુધીમાં કિંમતોમાં આશરે 9% નો ઘટાડો આવી ચૂક્યો છે.
LKP Securities ના કોમોડિટી અને કરન્સી રિસર્ચ એનાલિસ્ટ જતિન ત્રિવેદીના જણાવ્યા અનુસાર, 13 મેના રોજ આયાત ડ્યુટી (ઇમ્પોર્ટ ડ્યુટી) વધ્યા પછી સોનામાં જે તેજી આવી હતી, તે મુખ્યત્વે સ્થાનિક ખર્ચ વધવાના કારણે હતી. તેને સોનામાં કોઈ નવી લોન્ગ ટર્મ તેજીના સંકેત તરીકે જોવી જોઈએ નહીં.
હવે બજારનું ધ્યાન ફરીથી વૈશ્વિક આર્થિક સંકેતો અને અમેરિકાની અર્થવ્યવસ્થા પર પરત ફર્યું છે. આ જ કારણે રોકાણકારોએ પ્રોફિટ બુકિંગ શરૂ કરી દીધું છે અને સોના પર દબાણ વધ્યું છે. નિષ્ણાતોનું કહેવું છે કે, આયાત ડ્યુટી વધ્યા પછી સોનું ખૂબ જ ઝડપથી 1.65 લાખ રૂપિયાના લક્ષ્યાંક સુધી પહોંચી ગયું હતું. જો કે, આ તેજી નીતિગત નિર્ણયના કારણે હતી. ત્યારબાદ ઘણા રોકાણકારોએ ઊંચા સ્તરે નફો વસૂલ્યો હતો.
આ સમયે રોકાણકારોની નજર અમેરિકાના મોંઘવારીના આંકડા પર છે. બજારને ચિંતા છે કે, જો મોંઘવારી અપેક્ષા કરતાં વધુ રહેશે, તો યુએસ ફેડરલ રિઝર્વ વ્યાજ દરોને લાંબા સમય સુધી ઊંચા સ્તરે જાળવી રાખી શકે છે. આ જ કારણ છે કે, સોનામાં નવી ખરીદી હાલ પૂરતી મર્યાદિત દેખાઈ રહી છે અને રોકાણકારો સાવધ છે. માર્કેટ એક્સપર્ટ્સના મતે, સોના માટે આગામી મહત્વનો સપોર્ટ 1,45,000 રૂપિયા પ્રતિ 10 ગ્રામની આસપાસ છે. જો કિંમતો વધુ નબળી પડે છે, તો આ સ્તર મહત્વપૂર્ણ સાબિત થઈ શકે છે.
બીજી તરફ, 1,55,000 રૂપિયા પ્રતિ 10 ગ્રામ એક મજબૂત રેઝિસ્ટન્સ માનવામાં આવી રહ્યું છે. એવામાં જ્યાં સુધી સોનું આ સ્તરની ઉપર નહીં નીકળે, ત્યાં સુધી બજારનું વલણ નબળું રહી શકે છે. Geojit Investments ના કોમોડિટી રિસર્ચ હેડ હરીશ વીનું કહેવું છે કે, અમેરિકી ડોલરની મજબૂતી અને લાંબા સમય સુધી ઊંચા વ્યાજ દરોની આશંકાએ સોના પર દબાણ બનાવ્યું છે. આ સિવાય વધતી બોન્ડ યીલ્ડના કારણે પણ સોના જેવા વ્યાજ વગરના રોકાણનું આકર્ષણ ઘટ્યું છે. તેમના જણાવ્યા મુજબ, વર્તમાન ઘટાડો લાંબાગાળાના રોકાણકારો માટે એક તક પણ બની શકે છે. બીજું કે, જે રોકાણકારો સોનામાં રોકાણ કરવા માંગે છે, તેઓ એકસાથે મોટી રકમ લગાવવાને બદલે SIP દ્વારા અથવા ઘટાડો થવા પર ધીમે-ધીમે ખરીદી કરવાની વ્યૂહરચના અપનાવી શકે છે.
