Frankie Recipe : લારી પર મળતી અને બાળકોની મનપસંદ ફ્રેંકી હવે મિનિટોમાં ઘરે બનાવો
બજારમાં વિવિધ પ્રકારની વાનગીઓનું વેચાણ થતુ હોય છે. જે નાના-મોટા સૌ લોકોને સ્વાદિષ્ટ લાગતું હોય છે. ત્યારે હોટલ કે રોડ પર મળતી ફ્રેંકીના જો ઘરે બને તો વાત જ કંઈક અલગ છે. તો ઘરે કેવી રીતે ફ્રેંકી સરળતાથી બનાવી શકાય તે જાણીશું.
નાના બાળકોને જ નહીં મોટી વયના લોકોને પણ ફ્રેંકી ખાવાનું પસંદ હોય છે. તો આજે સ્વાદિષ્ટ અને ટેસ્ટી ફ્રેંકી ઘરે બનાવો. તેના માટે કોબી, ડુંગળી, કેપ્સિકમ, તેલ, લીલા મરચા, શેઝવાન સોસ, ટામેટાની પ્યુરી, આદુ-લસણ, ટામેટા સોસ, બાફેલા બટાકા, રોટલી સહિતની સામગ્રીની જરુર પડશે.
આ ઉપરાંત ફ્રેંકીનો મસાલો બનાવવા માટે જીરું, મરી, સૂકા ધાણા, તજ, મીઠું, મેયોનીઝ, ચીઝ સહિતના વસ્તુઓની જરુર પડશે. વેજ ફ્રેંકી બનાવવા માટે કોબી, ડુંગળી, કેપ્સિકમને લાંબા અને પાતળા કાપી લો.
એક પેનમાં તેલ ઉમેરો ત્યારબાદ તેમાં કાપેલી ડુંગળી ઉમેરી લો. ત્યારબાદ તેમાં કેપ્સીકમ ઉમેરી સાંતળો. હવે તેમાં ટામેટાનો સોસ નાખી બરાબર મિક્સ કરી લો. તેમાં આદુ- મરચાંની પેસ્ટ, અને બટાકાનો માવો ઉમેરી બરાબર મિક્સ કરો.
હવે ફ્રેંકીનો મસાલો બનાવવા માટે એક મિક્સર જારમાં ધાણાજીરું, જીરું, કાળા મરી, તજ, મીઠું, લાલ મરચું પાવડર, સૂકી કેરીનો પાવડર નાખીને મિક્સ કરો. ત્યારબાદ એક રોટલી પર શેઝવાન ચટણી લગાવી લો. ત્યારબાદ કોબી, ઝીણી કાપેલી ડુંગળી અને તૈયાર કરેલો માવો ઉમેરો. તેના પર ચાટ મસાલો અને ચીઝ ઉમેરી તેનો રોલ બનાવી લો.
હવે એક તવી પર તેલ, બટર અથવા ઘી મુકી તમે ફ્રેંકીને બંન્ને બાજુથી બરાબર શેકી લો. જેથી તે ક્રિસ્પી બને. આ ફ્રેંકીને તમે નાસ્તામાં ખાઈ શકો છો. તેમજ બાળકોને ટીફીનમાં પણ આપી શકો છો.