FD મેચ્યોર થયા પછી પૈસા ક્યાં રોકવા? ફરીથી FD કરવી કે SIP? કયો વિકલ્પ તમારા માટે છે ‘બેસ્ટ’?
શું તમારી પણ ફિક્સ્ડ ડિપોઝિટ (FD) મેચ્યોર થઈ ગઈ છે અને એકસાથે મોટી રકમ હાથમાં આવી ગઈ છે? હવે સૌથી મોટો સવાલ એ છે કે, આ પૈસાને ફરીથી FD માં મૂકવા કે પછી SIP દ્વારા મ્યુચ્યુઅલ ફંડમાં રોકાણ કરવું? એવામાં કોઈ પણ ઉતાવળ કર્યા વગર તમારા નાણાકીય લક્ષ્યો, સમયગાળા અને જોખમ લેવાની ક્ષમતા મુજબ સાચો વિકલ્પ પસંદ કરવો જ તમારા પૈસાને સુરક્ષિત રાખીને સારું રિટર્ન આપી શકે છે.
એફડી (FD) ને સુરક્ષિત રોકાણ માટે પસંદ કરવામાં આવે છે. FD જ્યારે મેચ્યોર થઈ જાય છે અને એકસાથે મોટી રકમ હાથમાં આવે છે, ત્યારે આગળનો સવાલ એ જ હોય છે કે, આ પૈસા ક્યાં મૂકવા?
જો તરત જ પૈસાની જરૂર ન હોય તો ફરીથી FD કરાવવી કે SIP દ્વારા રોકાણ કરવું, આ બંને વિકલ્પો સામે હોય છે. આવા સમયે સાચો વિકલ્પ પસંદ કરવા માટે રોકાણના હેતુ અને સમયગાળાને સમજવો જરૂરી છે.
FD મેચ્યોર થયા પછી પૂરી રકમને ફરીથી FD માં રોકી શકાય છે. એનો સૌથી મોટો ફાયદો એ છે કે, રોકાણકારને વ્યાજ દર પહેલેથી જ ખબર હોય છે અને બજારના ઉતાર-ચઢાવની સીધી અસર રોકાણ પર પડતી નથી. જો તમારો ધ્યેય મૂડીને સુરક્ષિત રાખવાનો હોય અથવા આવનારાં વર્ષોમાં આ પૈસાની જરૂર પડી શકે તેમ હોય, તો ફરીથી FD કરવા પર વિચાર કરી શકાય છે.
જો કે, FD નું વ્યાજ મર્યાદિત હોય છે અને વ્યાજમાંથી થતી આવક પર લાગુ ટેક્સના નિયમો મુજબ ટેક્સ આપવો પડી શકે છે. આ સિવાય, FD ના વ્યાજ દર સમય સાથે બદલાઈ શકે છે. તેથી, જૂની FD મેચ્યોર થયા પછી નવી FD કરાવતી વખતે તે સમયે ઉપલબ્ધ વ્યાજ દર અને સમયગાળાની સરખામણી કરવી જરૂરી છે.
જો FD મેચ્યોરિટીની રકમની લાંબા સમય સુધી જરૂર ન હોય તો SIP દ્વારા મ્યુચ્યુઅલ ફંડમાં રોકાણ કરવા પર વિચાર કરી શકાય છે. ખાસ કરીને લાંબાગાળાના નાણાકીય લક્ષ્યો માટે ઇક્વિટી મ્યુચ્યુઅલ ફંડમાંથી FD ની સરખામણીએ વધુ રિટર્ન મળવાની શક્યતા હોઈ શકે છે. અહીં એ સમજવું જરૂરી છે કે, મ્યુચ્યુઅલ ફંડનું રિટર્ન બજાર પર આધારિત હોય છે અને તેની કોઈ ગેરંટી નથી હોતી.
FD ની મેચ્યોરિટીથી મળેલી પૂરી રકમને એકસાથે રોકવાને બદલે તેને કેટલાક હિસ્સામાં વહેંચીને અલગ-અલગ સમયે SIP દ્વારા રોકી શકાય છે. તેનાથી બજારમાં એકસાથે મોટી રકમ રોકવાનું જોખમ અમુક અંશે ઓછું કરવામાં મદદ મળી શકે છે.
જો તમારી પ્રાથમિકતા સુરક્ષા, નિશ્ચિત વ્યાજ અને ઓછું જોખમ હોય, તો ફરીથી FD એક સારો વિકલ્પ બની શકે છે. બીજી તરફ, જો લાંબાગાળાના લક્ષ્યો હોય અને બજારના ઉતાર-ચઢાવ સહન કરવાની ક્ષમતા હોય તો SIP પર વિચાર કરી શકાય છે. જરૂરી નથી કે, પૂરી રકમ એક જ જગ્યાએ રોકવામાં આવે. જરૂરિયાત મુજબ થોડા પૈસા FD માં તેમજ બાકીની રકમ SIP માં રાખવાથી સુરક્ષા અને બજાર આધારિત રોકાણ, બંનેનું સંતુલન બનાવી શકાય છે.
