Breaking News : EPFOના નવા નિયમો લાગુ, શું PF વ્યાજ, 12% યોગદાન અને ઉપાડના નિયમોમાં કોઈ ફેરફાર થશે ?
કેન્દ્ર સરકારે નવી EPF Scheme 2026 જાહેર કરી છે, જે EPF Scheme 1952નું સ્થાન લેશે. આ યોજના Social Security Code, 2020 હેઠળ લાગુ થશે.
કેન્દ્ર સરકારે કર્મચારી ભવિષ્ય નિધિ (EPF) માટે નવી EPF Scheme 2026 જાહેર કરી છે. આ નવી યોજના 1952થી અમલમાં રહેલી EPF Scheme 1952નું સ્થાન લેશે અને તેને સામાજિક સુરક્ષા સંહિતા, 2020 (Social Security Code, 2020) હેઠળ લાગુ કરવામાં આવી છે. જોકે, સરકારે સ્પષ્ટ કર્યું છે કે હાલના EPF ખાતાધારકોના ખાતા, જમા રકમ અને મળતા લાભો પર આ નવી યોજનાની કોઈ નકારાત્મક અસર નહીં થાય.
નવી યોજનાનો મુખ્ય હેતુ EPFOની સેવાઓને વધુ ડિજિટલ, પારદર્શક અને જવાબદાર બનાવવાનો છે. સરકારે જણાવ્યું છે કે કર્મચારીઓ માટે સૌથી મહત્વપૂર્ણ નિયમો, જેમ કે EPF પર મળતું વ્યાજ, કર્મચારી અને નોકરીદાતા દ્વારા કરવામાં આવતું 12 ટકા યોગદાન, UAN અને PF ઉપાડના નિયમોમાં કોઈ ફેરફાર કરવામાં આવ્યો નથી.
EPF Scheme 2026 હેઠળ હવે અનેક પ્રક્રિયાઓને સંપૂર્ણપણે ડિજિટલ બનાવવામાં આવશે. તેમાં ઓનલાઈન રિટર્ન ફાઇલિંગ, ડિજિટલ રેકોર્ડ જાળવવા, ઓનલાઈન ક્લેમ સબમિટ કરવા, ઇલેક્ટ્રોનિક વાર્ષિક સ્ટેટમેન્ટ જારી કરવા અને ડિજિટલ નિરીક્ષણ જેવી સેવાઓનો સમાવેશ થાય છે. આ બદલાવથી EPFOની સેવાઓ વધુ ઝડપી, સરળ અને પારદર્શક બનવાની અપેક્ષા છે.
નવી યોજના હેઠળ એવી કંપનીઓ માટે પણ નિયમો વધુ કડક બનાવવામાં આવ્યા છે, જે EPFOને બદલે પોતાના EPF ટ્રસ્ટનું સંચાલન કરે છે. ટ્રસ્ટીઓની નિમણૂક, નિયમિત બેઠક, ઇલેક્ટ્રોનિક એકાઉન્ટિંગ, વાર્ષિક ઓડિટ, રોકાણ સંબંધિત રિપોર્ટિંગ અને ઓનલાઈન માહિતી જાહેર કરવાની પ્રક્રિયા હવે વધુ કડક રીતે અમલમાં મૂકવામાં આવશે. જો રિપોર્ટિંગમાં વિલંબ થશે તો તેના માટે પણ કાર્યવાહી કરવાની જોગવાઈ કરવામાં આવી છે.
નવી EPF યોજના હેઠળ કેન્દ્ર સરકારને વિશેષ સત્તા આપવામાં આવી છે કે રાષ્ટ્રીય આપત્તિ, મહામારી અથવા અન્ય અસાધારણ પરિસ્થિતિમાં વધુમાં વધુ ત્રણ મહિના માટે EPF યોગદાનને અસ્થાયી રીતે ઘટાડવા અથવા મુલતવી રાખી શકે. જોકે, આ જોગવાઈ માત્ર કટોકટીની પરિસ્થિતિ માટે છે અને EPFની કાયમી યોગદાન વ્યવસ્થામાં કોઈ ફેરફાર કરતી નથી.
નવી યોજના અમલમાં આવ્યા બાદ પણ કર્મચારીઓ માટેના મોટાભાગના મહત્વપૂર્ણ નિયમો પહેલાની જેમ જ રહેશે. કર્મચારી અને નોકરીદાતા બંનેનું EPF યોગદાન 12 ટકા જ રહેશે. સ્વૈચ્છિક ભવિષ્ય નિધિ (VPF)ની સુવિધા યથાવત રહેશે અને પગાર મર્યાદામાં પણ કોઈ ફેરફાર કરવામાં આવ્યો નથી. આ ઉપરાંત, દરેક સભ્ય માટે Universal Account Number (UAN) કાયમી ઓળખ તરીકે જ ચાલુ રહેશે. EPF પર મળતું વ્યાજ, PF ઉપાડના નિયમો, નોમિનેશનની પ્રક્રિયા, કરમાં મળતા લાભો અને PF બેલેન્સ ટ્રાન્સફરની તમામ સુવિધાઓમાં પણ કોઈ ફેરફાર કરવામાં આવ્યો નથી. એકંદરે, EPF Scheme 2026નો હેતુ કર્મચારીઓના લાભોમાં ઘટાડો કરવાનો નહીં પરંતુ સમગ્ર EPFO સિસ્ટમને વધુ આધુનિક, ડિજિટલ અને પારદર્શક બનાવવાનો છે.
Published On - 8:36 pm, Wed, 1 July 26
