તડકામાંથી આવીને તરત ઠંડુ પાણી પીવું કેમ બની શકે છે નુકસાનકારક? તમે નહીં જાણતા હોવ..
ગરમી કે તડકામાંથી આવીને તરત જ ફ્રિજનું ઠંડુ પાણી પીવું શરીર માટે નુકસાનકારક બની શકે છે. નિષ્ણાતોના કહેવા મુજબ, અચાનક ઠંડુ પાણી પીવાથી શરીરના તાપમાનમાં ઝડપથી ફેરફાર થાય છે, જેના કારણે પાચન પર અસર પડી શકે છે અને હૃદયને પણ વધારાનું દબાણ સહન કરવું પડી શકે છે.
ઉનાળાની ભારે ગરમીમાં બહારથી આવ્યા પછી ઘણા લોકો તરત જ ફ્રિજનું ઠંડુ પાણી પી લે છે જેથી શરીરને ઠંડક મળે. પરંતુ ડોક્ટરો મુજબ, આવી આદત સ્વાસ્થ્ય માટે સારી નથી. ખૂબ ગરમી બાદ અચાનક ઠંડુ પાણી પીવાથી શરીર પર ખરાબ અસર પડી શકે છે અને આગળ જઈને તકલીફો પણ ઉભી થઈ શકે છે.
તડકામાં રહેતાં શરીરનું તાપમાન વધી જાય છે. આવા સમયે તરત જ ઠંડુ પાણી પીવાથી શરીરને અચાનક ઠંડક લાગે છે, જેના કારણે રક્તવાહિનીઓ સંકોચાઈ શકે છે અને બ્લડ સર્ક્યુલેશન પર ખરાબ અસર પડી શકે છે. નિષ્ણાતો આ સ્થિતિને “થર્મલ શોક” તરીકે ઓળખાવે છે.
ખૂબ ઠંડુ પાણી પીવાથી પાચન પ્રક્રિયા પર અસર પડી શકે છે. અચાનક ઠંડક મળતાં પેટની નસો સંકોચાઈ જાય છે, જેના કારણે ખોરાક પચવાની ગતિ ધીમી થઈ શકે છે. પરિણામે પેટમાં દુખાવો, ગેસ, ખેંચાણ અથવા કબજિયાત જેવી તકલીફો થઈ શકે છે.
ગરમીમાંથી આવ્યા પછી તરત જ ઠંડુ પાણી પીવાથી ગળા અને શ્વાસ સંબંધિત તકલીફો થઈ શકે છે. તેનાથી ગળામાં દુખાવો, ઉધરસ અથવા ઈન્ફેક્શનનું જોખમ વધી શકે છે. ઉપરાંત, અચાનક વધારે ઠંડક મળવાથી કેટલાક લોકોને માથાનો દુખાવો અથવા ચક્કર જેવી સમસ્યાઓ પણ અનુભવાઈ શકે છે.
આરોગ્ય નિષ્ણાતોના કહેવા મુજબ, ખૂબ ઠંડુ પાણી પીવાથી શરીરની કેટલીક મહત્વપૂર્ણ નસો પર અસર પડી શકે છે, જે હૃદયના ધબકારા નિયંત્રિત કરવામાં મદદ કરે છે. અચાનક વધારે ઠંડક મળવાથી હૃદયની ગતિ ધીમી પડી શકે છે, જે સ્વાસ્થ્ય માટે સારું માનવામાં આવતું નથી. તેથી તડકામાંથી આવ્યા પછી થોડો સમય આરામ કરીને પછી સામાન્ય અથવા માટલાનું પાણી પીવું વધુ સારું છે. ( Disclaimer: આ લેખ માત્ર જાણકારી માટે છે. તેનો ઉપયોગ પુર્વે આપ આપના તબીબ અથવા તજજ્ઞોની સલાહ ખાસ લેવી જરૂરી છે. )
