સૌથી ઝડપી બોલ ફેંકી આ બોલરે મહિલા ક્રિકેટમાં લાવી ‘ક્રાંતિ’, WPL 2024માં રચાયો ઈતિહાસ
વુમન્સ પ્રીમિયર લીગમાં મુંબઈ અને દિલ્હી વચ્ચેની મેચમાં એક એવી ઘટના બની જેણે બધાનું ધ્યાન ખેંચ્યું. આ મેચમાં મહિલા ફાસ્ટ બોલરે જે કર્યું એ વુમન્સ ક્રિકેટના ઈતિહાસમાં પહેલા ક્યારેય નથી થયું. 132.1kmph ની ઝડપથી બોલ ફેંકી મુંબઈ ઈન્ડિયન્સની ખેલાડી સૌથી ફાસ્ટેસ્ટ બોલ ફેંકનાર મહિલા ખેલાડી બની ગઈ છે.
WPL 2024માં 5 માર્ચની સાંજે મુંબઈ ઈન્ડિયન્સ અને દિલ્હી કેપિટલ્સ વચ્ચેની મેચમાં શબનીમ ઈસ્માઈલે એવો બોલ ફેંક્યો જે માત્ર WPLના ઈતિહાસમાં જ નહીં પરંતુ મહિલા ક્રિકેટના ઈતિહાસમાં પણ સૌથી ઝડપી બોલ હતો.
આંતરરાષ્ટ્રીય મહિલા ક્રિકેટમાં પણ સૌથી ઝડપી બોલનો રેકોર્ડ શબનીમ ઈસ્માઈલના નામે છે, જે તેણે વર્ષ 2016માં વેસ્ટ ઈન્ડિઝ સામે 128 કિમી પ્રતિ કલાકની ઝડપે ફેંક્યો હતો. પરંતુ, આ વખતે તેણે 130 કિમી પ્રતિ કલાકની ઝડપે અવરોધ તોડીને ક્રાંતિ લાવી દીધી છે.
મહિલા ક્રિકેટના ઈતિહાસમાં આવું પહેલીવાર બન્યું છે જ્યારે કોઈ બોલરે 130 કિમી પ્રતિ કલાકથી વધુની ઝડપે બોલ ફેંક્યો હોય.
આ મેચની ત્રીજી ઓવરનો બીજો બોલ હતો. ઓસ્ટ્રેલિયન બેટ્સમેન મેગ લેનિંગ, જે દિલ્હી કેપિટલ્સની કેપ્ટનશીપ કરી રહી હતી, તેણે શબનીમની રેકોર્ડ બ્રેકિંગ સ્પીડ સાથે આ બોલ રમ્યો હતો. લેનિંગ ગતિ ચૂકી ગઈ અને બોલ સીધો તેના પેડ્સ પર ગયો. LBW માટે જોરદાર અપીલ કરવામાં આવી હતી પરંતુ અમ્પાયરે અપીલ ફગાવી દીધી હતી.
જોકે, મહિલા ક્રિકેટના ઈતિહાસમાં સૌથી ઝડપી બોલ ફેંકનાર શબનીમનું પ્રદર્શન આ મેચમાં કંઈ ખાસ રહ્યું ન હતું. તેણે 4 ઓવરમાં 46 રન આપ્યા અને બદલામાં માત્ર એક વિકેટ લીધી. એટલું જ નહીં તેની ટીમ મુંબઈ ઈન્ડિયન્સ મેચ પણ હારી ગઈ હતી. દિલ્હી કેપિટલ્સે તેમને 29 રને હરાવ્યું હતું.
Published On - 6:19 pm, Wed, 6 March 24