ટીમ ઈન્ડિયાના સ્ટાર બેટ્સમેન કેએલ રાહુલે આંતરરાષ્ટ્રીય ક્રિકેટમાં 10 વર્ષ પૂરા કર્યા
ટીમ ઈન્ડિયાના સ્ટાર બેટ્સમેન કેએલ રાહુલે પોતાના ઈન્ટરનેશનલ કરિયરના 10 વર્ષ પૂરા કર્યા છે. રાહુલે વર્ષ 2014માં ઓસ્ટ્રેલિયા સામે બોક્સિંગ ડે ટેસ્ટથી પોતાના કરિયરની શરૂઆત કરી હતી, હવે ફરી એકવાર તે એ જ ટીમ સામે બોક્સિંગ ડે ટેસ્ટ રમી રહ્યો છે.
રાહુલે તેની કારકિર્દીમાં અત્યાર સુધી 3216 ટેસ્ટ રન બનાવ્યા છે. આ સિવાય તેણે 77 ODI મેચમાં 2851 રન બનાવ્યા છે. કેએલ રાહુલે તેની T20 કારકિર્દીમાં 72 મેચ રમીને 2,265 રન પણ બનાવ્યા છે. આ દરમિયાન તેણે ટેસ્ટમાં 8 સદી, વનડેમાં 7 સદી અને T20માં 2 સદી ફટકારી છે.
કેએલ રાહુલ હંમેશા ટેસ્ટ ફોર્મેટમાં વિદેશ પ્રવાસ પર ભારત માટે મહત્વના ખેલાડીઓમાંથી એક રહ્યો છે. ટેસ્ટ કારકિર્દીની 8 સદીમાંથી તેણે વિદેશી ધરતી પર 7 સદી ફટકારી છે. અત્યાર સુધીમાં તેણે દક્ષિણ આફ્રિકા અને ઈંગ્લેન્ડમાં 2-2 ટેસ્ટ સદી ફટકારી છે. શ્રીલંકા, ઓસ્ટ્રેલિયા અને વેસ્ટ ઈન્ડિઝમાં તેના નામે 1-1 સદી છે.
બોક્સિંગ ડે ટેસ્ટથી આંતરરાષ્ટ્રીય કરિયરની શરૂઆત કરનાર કેએલ રાહુલના આંકડા શાનદાર છે. જો કે પ્રથમ બોક્સિંગ ડે ટેસ્ટમાં કેએલ રાહુલ માત્ર 03 અને 01 રન જ બનાવી શક્યો હતો. પરંતુ તેણે 2021 અને 2023ની બોક્સિંગ ડે ટેસ્ટમાં સદી ફટકારી છે. તેણે 2021 અને 2023ની બોક્સિંગ ડે ટેસ્ટમાં દક્ષિણ આફ્રિકા સામે સદી ફટકારી હતી. આવી સ્થિતિમાં ચાહકો આ વખતે પણ કેએલ રાહુલ પાસેથી ખાસ ઈનિંગની આશા રાખી રહ્યા છે.
કેએલ રાહુલે 2024-25 બોર્ડર-ગાવસ્કર ટ્રોફીમાં અત્યાર સુધી ખૂબ જ સારું પ્રદર્શન કર્યું છે. તે અત્યાર સુધી આ શ્રેણીમાં ઓપનર તરીકે રમ્યો છે અને ભારત માટે સૌથી વધુ રન બનાવનાર બેટ્સમેન છે. રાહુલે 3 મેચની 6 ઈનિંગ્સમાં 235 રન બનાવ્યા છે, જેમાં 2 અડધી સદી સામેલ છે.
કેએલ રાહુલ આ વર્ષે ટેસ્ટમાં એક પણ સદી ફટકારી શક્યો નથી, તેથી તેના માટે આ એક મોટી તક હશે. રાહુલની નજર બોક્સિંગ ડે ટેસ્ટમાં આ વર્ષના સદીના દુષ્કાળનો અંત લાવવા પર છે. (All Photo Credit : PTI)
Published On - 3:11 pm, Thu, 26 December 24
