એક સમયે હતો વિશ્વનો નંબર-1 બોલર, હવે DJ બનીને કમાય છે પૈસા, એક ભૂલે બરબાદ કરી કારકિર્દી
દક્ષિણ આફ્રિકાનો આ ઝડપી બોલર એક સમયે વિશ્વ ક્રિકેટમાં પોતાની આગવી ઓળખ બનાવી ચૂક્યો હતો. 2012માં તે વનડે રેન્કિંગમાં નંબર-1 બોલર પણ બન્યો હતો. પરંતુ થોડા વર્ષોમાં જ તેની કારકિર્દીનો અચાનક અંત આવી ગયો. મેચ ફિક્સિંગના કેસમાં પ્રતિબંધ બાદ હવે તે ક્રિકેટથી દૂર છે અને સંગીતની દુનિયામાં નવી ઓળખ બનાવી રહ્યો છે.
ક્રિકેટ હોય કે જીવન, એક ભૂલ તમારી જિંદગી બરાબર કરી શકે છે. ક્રિકેટમાં આવું અનેક ક્રિકેટરો સાથે થયું છે. જેમાં એક નામ આફ્રિકાના ફાસ્ટ બોલર લોનવાબો ત્સોત્સોબેનું પણ છે.
લોનવાબો ત્સોત્સોબે દક્ષિણ આફ્રિકાનો ખતરનાક ડાબોડી ફાસ્ટ બોલર હતો. 2012માં તે ICC વનડે રેન્કિંગમાં વિશ્વના નંબર-1 બોલર પણ બન્યો હતો. તેની ચોક્કસ લાઇન, લેન્થ અને સ્વિંગથી તે બેટ્સમેનોને પરેશાન કરતો હતો.
2015ના રામ સ્લેમ કૌભાંડ બાદ ત્સોત્સોબે સામે મેચ ફિક્સિંગના ગંભીર આરોપ લાગ્યા. 2017માં તપાસ બાદ તેને એક ફિક્સિંગ ગુના અને તપાસમાં સહયોગ ન આપવાના અન્ય ગુનાઓમાં દોષી જાહેર કરવામાં આવ્યો હતો.
ક્રિકેટ સાઉથ આફ્રિકાએ ત્સોત્સોબે પર આઠ વર્ષનો પ્રતિબંધ લગાવ્યો. આ પ્રતિબંધે તેની આંતરરાષ્ટ્રીય ક્રિકેટ કારકિર્દીનો અંત લાવી દીધો. આ કેસમાં અન્ય કેટલાક દક્ષિણ આફ્રિકન ક્રિકેટરો સામે પણ કાર્યવાહી કરવામાં આવી હતી.
ક્રિકેટમાંથી અચાનક દૂર થયા બાદ ત્સોત્સોબે મુશ્કેલ સમયમાંથી પસાર થયો હતો. જોકે, સંગીત પ્રત્યેના તેના શોખે તેને નવો રસ્તો આપ્યો. તેણે પોતાના શોખને વ્યવસાયમાં ફેરવ્યો હતો.
આજે ત્સોત્સોબે ‘DJ Tso’ તરીકે ઓળખાય છે. તે દક્ષિણ આફ્રિકાના વિવિધ શહેરોમાં ક્લબ, કોન્સર્ટ અને અન્ય કાર્યક્રમોમાં DJ તરીકે પરફોર્મ કરે છે. એક સમયે બોલથી બેટ્સમેનોને પરેશાન કરનાર આ ક્રિકેટર હવે સંગીત દ્વારા લોકોનું મનોરંજન કરે છે. (PC:X/INSTAGRAM/GETTY IMAGES)
Published On - 7:59 pm, Fri, 14 August 26
