IND vs SL: શ્રીલંકાના યુવા બેટ્સમેને રચ્યો ઈતિહાસ, ભારત સામે આવું કરનાર વિશ્વનો ત્રીજો ખેલાડી બન્યો
ભારત સામેની ટેસ્ટ શ્રેણીમાં શ્રીલંકાના એક યુવા બેટ્સમેને સતત શાનદાર બેટિંગ કરીને ખાસ સિદ્ધિ પોતાના નામે કરી છે. ત્રણ સતત ઇનિંગ્સમાં 80થી વધુ રન બનાવી તેણે ક્રિકેટના દિગ્ગજોની યાદીમાં સ્થાન મેળવ્યું છે. આ સાથે જ તેણે ભારત સામે આવું કરનાર વિશ્વનો માત્ર ત્રીજો બેટ્સમેન બનીને અનેક વર્ષ જૂના રેકોર્ડની બરાબરી કરી છે.
ભારત અને શ્રીલંકા વચ્ચેની ટેસ્ટ શ્રેણીમાં કેટલાક યુવા ખેલાડીઓએ પોતાના પ્રદર્શનથી ધ્યાન ખેંચ્યું છે. શ્રીલંકાના 25 વર્ષીય બેટ્સમેન સોનલ દિનુષા પણ તેમાં સામેલ છે. મધ્યમ ક્રમમાં બેટિંગ કરતા દિનુષાએ પોતાની શાનદાર ટેકનિક અને ધીરજથી ભારતીય બોલિંગ સામે મજબૂત બેટિંગ કરી છે.
દિનુષાએ ગાલેમાં રમાયેલી પ્રથમ ટેસ્ટથી જ પોતાની ક્ષમતા સાબિત કરી હતી. પ્રથમ ઇનિંગમાં તેણે સદી ફટકારી હતી, જ્યારે બીજી ઇનિંગમાં 84 રનની મહત્વપૂર્ણ ઇનિંગ રમી હતી. આ પ્રદર્શન બાદ કોલંબોમાં પણ તેણે પોતાની લય જાળવી રાખી હતી.
કોલંબો ટેસ્ટની પ્રથમ ઇનિંગમાં દિનુષાએ વધુ એક શાનદાર સદી ફટકારી અને 103 રન બનાવ્યા. બીજી ઇનિંગમાં ચોથા દિવસની રમતના અંતે તે 37 બોલમાં 7 રન બનાવીને અણનમ હતો. આ સાથે ભારત સામે તેની પ્રથમ ત્રણ ટેસ્ટ ઇનિંગમાં 100, 84 અને 103 રન થઈ ગયા.
આ ત્રણેય ઇનિંગમાં 80થી વધુ રન બનાવવાની સાથે દિનુષા ભારત સામે આવું કરનાર દુનિયાનો માત્ર ત્રીજો બેટ્સમેન બન્યો છે. અગાઉ પાકિસ્તાનના ઝહીર અબ્બાસ અને ઇંગ્લેન્ડના એવર્ટન વીક્સે આ સિદ્ધિ મેળવી હતી. અબ્બાસે 176, 96 અને 235* રન, જ્યારે વીક્સે 128, 194 અને 162 રન બનાવ્યા હતા.
દરમિયાન કોલંબો ટેસ્ટમાં ભારતની જીતની શક્યતા પણ મજબૂત છે. ભારતે પ્રથમ દાવ 503/9 પર ડિકલેર કર્યો હતો, જ્યારે શ્રીલંકા 290 રનમાં ઓલઆઉટ થયું. ફોલોઓન બાદ ચોથા દિવસના અંતે શ્રીલંકાએ 229/6નો સ્કોર કર્યો હતો અને માત્ર 16 રનની લીડ મેળવી હતી. (PC:PTI/X)
