નવા વર્ષના શરૂઆતના ત્રણ મહિનામાં ટીમ ઈન્ડિયા કેટલી મેચો રમશે? જાણો અહીં
વર્ષ 2023ને પૂર્ણ થવાને હવે માત્ર ત્રણ દિવસ બાકી છે અને હજી ભારતનો આફ્રિકા પ્રવાસ પણ પૂરો થવાનો બાકી છે, ત્યારે બધાના મનમાં એ જ સવાલ છે કે ભારતીય ટીમનો આગામી વર્ષ એટલે કે 2024માં શું કાર્યક્રમ છે, તેમાં પણ IPL પહેલા ભારત કઈ સિરીઝ રમશે, શું છે ટીમ ઈન્ડિયાનું આગામી શેડ્યૂલ. તમને આ બધા સવાલોના જવાબ આ આર્ટિકલમાં મળશે.
વિશ્વ કપ 2023 બાદ ઓસ્ટ્રેલિયા સામે 5 મેચની T20 સિરીઝ જીતી ભારતીય ટીમ હાલ આફ્રિકામાં 3 T20, 3 ODI અને 2 ટેસ્ટ મેચ રમવા આફ્રિકાના પ્રવાસે છે, જ્યાં T20 અને ODI સિરીઝ પૂર્ણ થઈ ચૂકી છે. જ્યારે પહેલી ટેસ્ટ મેચ હાલ ચાલી રહી છે.
જાન્યુઆરી 2024માં ભારતીય ટીમનો આફ્રિકા પ્રવાસ ચાલુ જ રહેશે અને ભારત-આફ્રિકા વચ્ચે બીજી અને અંતિમ ટેસ્ટ મેચ 3 જાન્યુઆરીથી શરૂ થશે. ભારતનો આફ્રિકા પ્રવાસ 7 જાન્યુઆરીએ સમાપ્ત થશે.
આફ્રિકા પ્રવાસ બાદ 11 જાન્યુઆરીથી ભારત અને અફઘાનિસ્તાન વચ્ચે ત્રણ મેચની T20 સિરીઝ યોજાશે, જેમાં પહેલી મેચ 11, બીજી T20 14 અને ત્રીજી મેચ 17 જાન્યુઆરીએ રમાશે.
અફઘાનિસ્તાન સામે T20 સિરીઝ બાદ ટીમ ઈન્ડિયાનો સામનો ઈંગ્લેન્ડ સામે થશે. ઈંગ્લેન્ડની ટીમ 5 મેચની ટેસ્ટ સિરીઝ રમવા ભારત આવશે. 25 જાન્યુઆરીથી 7 માર્ચ દરમિયાન પાંચ ટેસ્ટ મેચો યોજાશે.
પાંચ મેચની સિરીઝની પહેલી ટેસ્ટ 25 જાન્યુઆરી, બીજી મેચ 2 ફેબ્રુઆરી, ત્રીજી ટેસ્ટ 15 ફેબ્રુઆરી, ચોથી મેચ 23 ફેબ્રુઆરી અને પાંચમી ટેસ્ટ 7 માર્ચથી શરૂ થશે. જે બાદ માર્ચ મહિનાના અંતમાં IPL શરૂ થશે એવી શક્યતા છે.