IPL 2025 મેગા ઓક્શનમાં 13 વર્ષનો ખેલાડી સામેલ, ભારત માટે ફટકારી છે સદી
IPL 2025 પહેલા મેગા ઓક્શનમાં કુલ 574 ખેલાડીઓની હરાજી કરવામાં આવશે. IPL ગવર્નિંગ કાઉન્સિલ દ્વારા આ ખેલાડીઓના નામની પણ જાહેરાત કરવામાં આવી છે. આ યાદીમાં 13 વર્ષનો એક ખેલાડી પણ સામેલ છે. આ ખેલાડીએ હાલમાં જ ભારતીય અંડર-19 ટીમ તરફથી રમતા સદી ફટકારી હતી.
IPL 2025 પહેલા મેગા ઓક્શન 24 અને 25 નવેમ્બરે સાઉદી અરેબિયાના જેદ્દાહમાં યોજાશે. આ વખતે કુલ 1,574 ખેલાડીઓએ રજીસ્ટ્રેશન કરાવ્યું હતું. નોંધણી કરાવનારા ખેલાડીઓમાં 1,165 ભારતીય અને 409 વિદેશીઓનો સમાવેશ થાય છે.
IPL ગવર્નિંગ કાઉન્સિલે 574 ખેલાડીઓની યાદી જાહેર કરી છે જેઓ હરાજીમાં જોવા મળશે. એટલે કે 1000 ખેલાડીઓ હરાજીમાંથી બહાર થઈ ગયા છે. કોઈપણ ટીમ આ ખેલાડીઓ પર દાવ લગાવવા માંગતી નથી. હરાજી માટે પસંદ કરાયેલા 574 ખેલાડીઓમાં 13 વર્ષીય ક્રિકેટરનો પણ સમાવેશ થાય છે.
IPL ગવર્નિંગ કાઉન્સિલ દ્વારા જાહેર કરવામાં આવેલી હરાજીની યાદીમાં 366 ભારતીય અને 208 વિદેશી ખેલાડીઓનો સમાવેશ થાય છે. આમાંથી એક નામ બિહારના સમસ્તીપુરના વૈભવ સૂર્યવંશીનું છે. વૈભવ સૂર્યવંશી હજુ માત્ર 13 વર્ષનો છે. આ નાની ઉંમરે તેણે રણજી ટ્રોફી, હેમંત ટ્રોફી, કૂચ બિહાર ટ્રોફી અને વિનુ માંકડ ટ્રોફી રમી છે. હાલમાં જ તેની ભારતીય અંડર-19 ટીમમાં પણ પસંદગી થઈ હતી. વૈભવ સૂર્યવંશી વિશે એવો દાવો કરવામાં આવી રહ્યો છે કે તેણે અલગ-અલગ ટૂર્નામેન્ટ સહિત એક વર્ષમાં કુલ 49 સદી ફટકારી છે.
વૈભવ સૂર્યવંશીએ 5 વર્ષની ઉંમરે ક્રિકેટ શીખવાનું શરૂ કર્યું હતું. અહેવાલો અનુસાર, તેના પિતા સંજીવે પાંચ વર્ષની ઉંમરથી વૈભવને નેટ પ્રેક્ટિસ કરવાનું શરૂ કર્યું હતું. આ માટે તેના પિતાએ ઘરે નેટ્સ લગાવી આપી હતી. વૈભવને રણજી ટ્રોફીની છેલ્લી સિઝનમાં બિહાર માટે ડેબ્યૂ કરવાની તક મળી હતી. વૈભવ માત્ર 12 વર્ષ અને 284 દિવસની ઉંમરે તેની પ્રથમ ફર્સ્ટ ક્લાસ મેચ રમ્યો હતો. તે જ વર્ષે, વૈભવ સૂર્યવંશીએ બિહાર ક્રિકેટ એસોસિએશન દ્વારા આયોજિત રણધીર વર્મા અંડર-19 ODI સ્પર્ધામાં પણ ત્રેવડી સદી ફટકારી હતી. અંડર-19 ટૂર્નામેન્ટના ઈતિહાસમાં આ પ્રથમ ત્રિપલ સદી પણ હતી.
વૈભવ સૂર્યવંશીએ ગયા મહિને જ ઓસ્ટ્રેલિયાની અંડર 19 ટીમ સામે શાનદાર ઈનિંગ રમી હતી. તેણે ઓસ્ટ્રેલિયા સામે 64 બોલનો સામનો કરીને 104 રન બનાવ્યા હતા. આ દરમિયાન તેણે માત્ર 58 બોલમાં પોતાની સદી પૂરી કરી હતી. આ વિસ્ફોટક ઈનિંગમાં તેણે 14 ચોગ્ગા અને 4 છગ્ગા ફટકાર્યા હતા. આ સાથે તે અંડર-19 ટેસ્ટમાં સૌથી ઝડપી સદી ફટકારનાર ભારતીય બેટ્સમેન પણ બની ગયો છે. (All Photo Credit : X / INSTAGRAM)