જસપ્રીત બુમરાહને ટેસ્ટ ટીમનો કેપ્ટન બનાવાયો, મેલબોર્ન ટેસ્ટ બાદ કરવામાં આવી મોટી જાહેરાત
જસપ્રીત બુમરાહે ઓસ્ટ્રેલિયા સામેની ટેસ્ટ શ્રેણીમાં પોતાની ઘાતક બોલિંગથી બેટ્સમેનોમાં ડર જગાવ્યો છે. તેણે સિરીઝમાં અત્યાર સુધી 30 વિકેટ ઝડપી છે. આ આખા વર્ષમાં પણ તેના નામે સૌથી વધુ 71 વિકેટ છે. આવી સ્થિતિમાં તેને વર્ષના અંતમાં ટેસ્ટ ટીમનો કેપ્ટન પસંદ કરવામાં આવ્યો છે.
મેલબોર્ન ટેસ્ટમાં ટીમ ઈન્ડિયાની હાર બાદ રોહિત શર્માને હટાવી જસપ્રીત બુમરાહને કેપ્ટન બનાવવાની ફેન્સ માંગ કરી રહ્યા છે.
સિરીઝની પ્રથમ મેચમાં બુમરાહે ટીમ ઈન્ડિયાની કેપ્ટનશીપ કરી હતી અને ભારતે તે મેચ જીતી હતી. હવે સિડનીમાં રમાનાર છેલ્લી ટેસ્ટ મેચ પહેલા બુમરાહને ટેસ્ટ ટીમની કમાન સોંપવામાં આવી છે. પરંતુ આ કેપ્ટનશીપ ટીમ ઈન્ડિયા નહીં, પરંતુ ક્રિકેટ ઓસ્ટ્રેલિયા દ્વારા આ વર્ષની સર્વશ્રેષ્ઠ ટેસ્ટ ટીમની છે.
ક્રિકેટ ઓસ્ટ્રેલિયાની મીડિયા વેબસાઈટ cricket.com.au એ મેલબોર્ન ટેસ્ટના એક દિવસ પછી 31 ડિસેમ્બરે આ વર્ષની સર્વશ્રેષ્ઠ ટેસ્ટ ટીમની પસંદગી કરી હતી. વર્ષના અંતિમ દિવસે તેણે પોતાની સર્વશ્રેષ્ઠ ટેસ્ટ ઈલેવનમાં ભારત અને ઓસ્ટ્રેલિયા સહિત વિશ્વની વિવિધ ટીમોના ખેલાડીઓને સામેલ કર્યા હતા.
ક્રિકેટ ઓસ્ટ્રેલિયાની મીડિયા વેબસાઈટ cricket.com.au એ બધાને ચોંકાવી દેતા આ ટીમની કમાન ઓસ્ટ્રેલિયન કેપ્ટન પેટ કમિન્સને નહીં, પરંતુ સ્ટાર ભારતીય ફાસ્ટ બોલરને આપી હતી. જ્યારે કમિન્સને ટીમમાં સ્થાન પણ નથી મળ્યું.
વર્ષ 2024માં બુમરાહે સૌથી વધુ 71 વિકેટ લઈને અન્ય તમામ બોલરોને પાછળ છોડી દીધા છે. વર્તમાન બોર્ડર-ગાવસ્કર ટ્રોફીમાં બુમરાહે અત્યાર સુધી 4 મેચમાં સૌથી વધુ 30 વિકેટ લીધી છે. આ સિવાય તેની કેપ્ટનશિપમાં ટીમ ઈન્ડિયાએ ઓસ્ટ્રેલિયાને પર્થ ટેસ્ટમાં પણ હરાવ્યું હતું, જેમાં બુમરાહે સૌથી વધુ 9 વિકેટ લીધી હતી. (All Photo Credit : PTI / GETTY)