Breaking News: વિરાટ કોહલીએ નવા જૂતા લોન્ચ કર્યા, તેની ટેસ્ટ કારકિર્દી સાથે છે ખાસ કનેક્શન
વિરાટ કોહલીનો ટેસ્ટ ક્રિકેટ પ્રત્યેનો પ્રેમ કોઈથી છૂપો નથી અને તેથી જ આ ફોર્મેટમાંથી નિવૃત્તિ લેવા છતાં તેણે પોતાના બ્રાન્ડને પ્રમોટ કરવા માટે ટેસ્ટ ક્રિકેટનો ઉપયોગ કર્યો છે, જે તેના નવા જૂતામાં સ્પષ્ટ દેખાય છે.
ભારતીય ક્રિકેટ ટીમના સ્ટાર બેટ્સમેન વિરાટ કોહલીની કારકિર્દી ભલે ધીમે-ધીમે પણ તેના અંત તરફ જઈ રહી હોય, પરંતુ તે બિઝનેસ મામલે એક નવી શરૂઆત કરી રહ્યો છે. આ સંદર્ભમાં, કોહલીએ સ્પોર્ટ્સ અને કેઝ્યુઅલ શૂઝની સિરીઝ લોન્ચ કરી છે.
કોહલીની કંપની વન 8 એ ટેસ્ટ ક્રિકેટ પ્રત્યેના તેના પ્રેમને સમર્પિત એક ખાસ લાલ કેઝ્યુઅલ શૂ લોન્ચ કર્યો છે. આ શૂઝ ટેસ્ટ ક્રિકેટમાં વપરાતા લાલ બોલની થીમ પર આધારિત છે.
આ જૂતા ડિઝાઇન કરવામાં કોહલીએ પોતે મુખ્ય ભૂમિકા ભજવી હતી. પરંતુ સૌથી આકર્ષક બાબત એ છે કે આ જૂતા અને કોહલીની ટેસ્ટ કારકિર્દી વચ્ચે જોરદાર કનેક્શન છે, જેણે બધાનું ધ્યાન ખેંચ્યું છે.
આ જૂતાની કિંમત અને કોહલીના ટેસ્ટ રન સમાન છે. કોહલીએ 'સીમ XVIII સિગ્નેચર ટેસ્ટ રેડ' નામના આ જૂતાની કિંમત 9,230 રૂપિયા રાખી છે. આ કિંમત તેના ટેસ્ટ ક્રિકેટ રનને અનુરૂપ છે, ટેસ્ટમાં તેણે 9,230 રન બનાવ્યા હતા.
કોહલીએ ટેસ્ટ રેડ જેવી જ ડિઝાઇનમાં સફેદ શૂઝ પણ લોન્ચ કર્યા છે, જેને "સીમ XVIII સિગ્નેચર વ્હાઇટ" કહેવામાં આવે છે, જે ₹8,999 માં ઉપલબ્ધ થશે. તેણે ક્રિકેટ ખેલાડીઓ માટે ખાસ કવર શૂઝ પણ લોન્ચ કર્યા: ડ્રાઇવ 18 પ્રો અને 18 X, જે ચાહકો માટે ₹13,999 માં ઉપલબ્ધ થશે. (Photo: PTI/One8)
