Breaking News: ટેસ્ટ ક્રિકેટના 149 વર્ષના ઈતિહાસમાં બીજી વાર બન્યો આવો અનોખો સંયોગ, 37 રન કેમ બન્યા ખાસ?
ટેસ્ટ ક્રિકેટમાં ક્યારેક એવા સંયોગ જોવા મળે છે, જે વર્ષો સુધી યાદ રહે છે. ઓસ્ટ્રેલિયાના માર્નસ લાબુશેન સાથે પણ કંઈક આવું જ બન્યું છે. દક્ષિણ આફ્રિકા સામેની ટેસ્ટમાં તેના એક જ સ્કોરે ક્રિકેટજગતનું ધ્યાન ખેંચ્યું છે. 149 વર્ષના ટેસ્ટ ઇતિહાસમાં આ ઘટના બીજી વાર બની હોવાનું કહેવાય છે. ચાલો જાણીએ આખરે લાબુશેનના 37 રન કેમ ખાસ છે?
ઓસ્ટ્રેલિયા અને દક્ષિણ આફ્રિકા વચ્ચે ડર્બનના કિંગ્સમીડ મેદાન પર રમાયેલી પ્રથમ ટેસ્ટમાં માર્નસ લાબુશેનના નામે એક દુર્લભ સંયોગ નોંધાયો. તેણે બંને ઇનિંગમાં સમાન બોલનો સામનો કર્યો અને સમાન રન બનાવ્યા હતા .
પ્રથમ ઇનિંગમાં લાબુશેને 58 બોલમાં 37 રન બનાવ્યા હતા. તેણે છ ચોગ્ગા ફટકાર્યા, પરંતુ દક્ષિણ આફ્રિકાના બોલર વિઆન મુલ્ડરે તેને LBW આઉટ કર્યો હતો.
બીજી ઇનિંગમાં પણ લાબુશેનની બેટિંગનો અંત એ જ આંકડા સાથે આવ્યો. તેણે ફરી 58 બોલનો સામનો કરીને 37 રન બનાવ્યા અને એક ખાસ સંયોગ બની ગયો.
ટેસ્ટ ક્રિકેટના ઇતિહાસમાં આવો જ કિસ્સો અગાઉ ફક્ત એક જ વાર જોવા મળ્યો હતો. ભારતના ભૂતપૂર્વ વિકેટકીપર સૈયદ કિરમાનીએ 1977-78માં ઓસ્ટ્રેલિયા સામે મેલબર્ન ટેસ્ટની બંને ઇનિંગ્સમાં 62 બોલમાં 29-29 રન બનાવ્યા હતા.
આ મેચમાં ભારતે પ્રથમ ઇનિંગમાં 256 રન બનાવ્યા હતા, જેમાં કિરમાનીનું યોગદાન 29 રનનું હતું. બીજી ઇનિંગમાં પણ તેણે એટલા જ રન બનાવ્યા હતા. ભારતે આ ટેસ્ટ 222 રનથી જીતી હતી.
લાબુશેન માટે આ સંયોગ નોંધપાત્ર હોવા છતાં, તેની બેટિંગમાં મોટી ઇનિંગ્સનો અભાવ ચિંતાનો વિષય છે. સારી શરૂઆત મળ્યા પછી પણ તે બંને ઇનિંગ્સમાં મોટો સ્કોર કરી શક્યો નહીં.
ટેસ્ટ ક્રિકેટમાં સદી ફટકારવા માટે લાબુશેન લાંબા સમયથી રાહ જોઈ રહ્યો છે. તેની છેલ્લી ટેસ્ટ સદી 2023માં આવી હતી. ત્યારથી મોટી ઇનિંગ ન રમી શકવાને કારણે તેના ફોર્મ અંગે ચર્ચા થઈ રહી છે.
આમ, લાબુશેનના 37 રન માત્ર એક સામાન્ય સ્કોર નથી, પરંતુ કિરમાની સાથેના સમાન કનેક્શન સાથે આ ક્રિકેટ ઇતિહાસના આંકડાઓનો જોરદાર સંયોગ બન્યો છે. (PC:PTI/X)
