Breaking News: ભારતીય મહિલા ટીમે ઈતિહાસ રચ્યો, ઓસ્ટ્રેલિયા ને તેના જ ઘરમાં આપી માત
ભારતીય મહિલા ક્રિકેટ ટીમે ઓસ્ટ્રેલિયાની ધરતી પર ઇતિહાસ રચતા ત્રણ મેચોની T20 શ્રેણી 2-1થી પોતાના નામે કરી છે. દાયકાની લાંબી રાહ બાદ મળેલી આ જીત માત્ર શ્રેણી વિજય જ નહીં, પરંતુ આત્મવિશ્વાસનો સંદેશ પણ છે. હરમનપ્રીત કૌરની આગેવાની હેઠળ ટીમે દમદાર પ્રદર્શન કરીને વિશ્વ ચેમ્પિયન ઓસ્ટ્રેલિયાને ચોંકાવી દીધું.
ભારતીય મહિલા ટીમે ઓસ્ટ્રેલિયા પ્રવાસની શાનદાર શરૂઆત કરી છે. ટેસ્ટ અને વનડે મુકાબલાઓ પહેલાં જ T20 શ્રેણી જીતતા ટીમે મલ્ટી-ફોર્મેટ સિરીઝમાં મજબૂત લીડ મેળવી લીધી છે. શ્રેણીની ત્રીજી અને નિર્ણાયક મેચમાં ભારતે 17 રને જીત મેળવી અને 2-1થી ટ્રોફી પોતાના હાથમાં લીધી. આ જીત દસ વર્ષ બાદ ઓસ્ટ્રેલિયા સામે T20 શ્રેણીમાં ભારતની પ્રથમ સફળતા છે.
એડિલેડ ખાતે રમાયેલી અંતિમ મેચમાં ભારતીય ટીમે પ્રથમ બેટિંગ કરવાનો નિર્ણય લીધો. શરૂઆત થોડું ધીમું રહી અને શેફાલી વર્મા ત્રીજી ઓવરમાં પેવેલિયન પરત ફરી. જોકે, સ્મૃતિ મંધાના અને જેમીમા રોડ્રિગ્સે સંભાળપૂર્વક ઇનિંગ ગોઠવી અને ટીમને મજબૂત સ્થિતિમાં પહોંચાડી. બંનેએ મળીને 121 રનની મહત્વપૂર્ણ ભાગીદારી નોંધાવી.
સ્મૃતિ મંધાનાએ આક્રમક અને સમજદારીપૂર્વકની બેટિંગ કરતા 55 બોલમાં 82 રન બનાવ્યા. તેમની ઇનિંગ્સમાં આકર્ષક ચોગ્ગા અને છગ્ગાઓનો સમાવેશ હતો. જેમીમાએ પણ 59 રનની શાનદાર અડધી સદી ફટકારી. બંનેની જોડીના કારણે ભારતે 20 ઓવરમાં 176 રનનો પડકારજનક સ્કોર ઉભો કર્યો. ઓસ્ટ્રેલિયા તરફથી એનાબેલ સધરલેન્ડે બે વિકેટ ઝડપી.
લક્ષ્યાંકનો પીછો કરવા ઉતરેલી ઓસ્ટ્રેલિયાની શરૂઆત તોફાની રહી. પરંતુ ત્યારબાદ ભારતીય બોલરોનો જાદૂ દેખાયો. શ્રેયંકા પાટિલે 22 રનમાં ત્રણ વિકેટ લઈને જીતનો પાયો ઘડ્યો, જ્યારે અરુંધતી રેડ્ડી અને શ્રી ચારાની પણ અસરકારક સાબિત થયા. અંતે ઓસ્ટ્રેલિયા 20 ઓવરમાં 159 રન જ બનાવી શક્યું અને ભારતે ઐતિહાસિક વિજય નોંધાવ્યો.
આ જીત સાથે ભારતે મલ્ટી-ફોર્મેટ શ્રેણીમાં 4-2ની લીડ મેળવી છે. હવે બંને ટીમો વચ્ચે વનડે અને ટેસ્ટ મુકાબલો રમાશે. T20 શ્રેણીનો આ વિજય ભારતીય ટીમના આત્મવિશ્વાસને નવી ઊંચાઈ આપનાર છે અને વિશ્વ ક્રિકેટમાં ભારતની મજબૂત હાજરીનો સંકેત પણ છે. (PC: X/BCCI)
Published On - 6:59 pm, Sat, 21 February 26
