Breaking News: ઈંગ્લેન્ડ ક્રિકેટમાં મોટો ભૂકંપ, નાઈટ ક્લબ વિવાદ બાદ બેન સ્ટોક્સ ટીમની બહાર, નવા કેપ્ટનની જાહેરાત
ઈંગ્લેન્ડ અને વેલ્સ ક્રિકેટ બોર્ડ (ECB) એ એક મહત્વપૂર્ણ નિર્ણય લીધો છે. નાઈટક્લબની ઘટના બાદ કેપ્ટન બેન સ્ટોક્સ અને ફાસ્ટ બોલર ગુસ એટકિન્સનને ટીમમાંથી બહાર કરી દેવામાં આવ્યા છે. ન્યૂઝીલેન્ડ સામેની બીજી ટેસ્ટ માટે નવા કેપ્ટનની નિમણૂક કરવામાં આવી છે.
ન્યૂઝીલેન્ડ સામેની બીજી ટેસ્ટ પહેલા ઈંગ્લેન્ડ ક્રિકેટ ટીમમાં એક મોટો વિવાદ ફાટી નીકળ્યો છે. નિયમિત કેપ્ટન બેન સ્ટોક્સ અને ફાસ્ટ બોલર ગુસ એટકિન્સનને અનુશાસનહીનતા અને ટીમ પ્રોટોકોલનો ભંગ કરવાના આરોપસર આગામી ટેસ્ટ મેચ માટે ટીમમાંથી બહાર કરવામાં આવ્યા છે.
આ મોટા વિવાદ બાદ ઈંગ્લેન્ડ અને વેલ્સ ક્રિકેટ બોર્ડ (ECB) એ ભૂતપૂર્વ કેપ્ટન અને દિગ્ગજ બેટ્સમેન જો રૂટને વચગાળાના કેપ્ટન તરીકે નિયુક્ત કર્યો છે. ઈંગ્લેન્ડ અને ન્યૂઝીલેન્ડ વચ્ચે ટેસ્ટ શ્રેણીની બીજી મેચ 17 જૂનથી લંડનના ઓવલ ખાતે રમાશે, જ્યાં જો રૂટ ઈંગ્લેન્ડ ટીમનું નેતૃત્વ કરશે.
હકીકતમાં, લોર્ડ્સ ખાતે રમાયેલી પ્રથમ ટેસ્ટમાં ન્યૂઝીલેન્ડ સામે ઈંગ્લેન્ડની 115 રનની મોટી જીત બાદ બેન સ્ટોક્સ અને ગુસ એટકિન્સને ટીમના મીડનાઈટ કર્ફ્યુ નિયમનું ઉલ્લંઘન કર્યું હતું.
અહેવાલો અનુસાર, બંને ખેલાડીઓ લંડનના એક નાઈટક્લબમાં હતા, જ્યાં એક ઝઘડાને કારણે ઈંગ્લેન્ડ ટીમના સુરક્ષા ગાર્ડ સાથે ઝપાઝપી થઈ હતી.
મામલાની ગંભીરતાને જોતાં, ECB એ તાત્કાલિક તપાસ શરૂ કરી છે અને તપાસ પૂર્ણ ન થાય ત્યાં સુધી બંને ખેલાડીઓને ટીમ પસંદગીમાંથી બહાર કર્યા છે. (PC:X/ECB)
