18 ચોગ્ગા, 7 છગ્ગા અને 170 રન… જેને દિલ્હીએ રિષભ પંતના સ્થાને રિટેન કર્યો, તેણે બોલરોને બતાવ્યો ક્લાસ
વિજય હજારે ટ્રોફીની પહેલી જ મેચમાં બંગાળ માટે રમી રહેલા યુવા બેટ્સમેને મેચની શરૂઆત કરતી વખતે આ વિસ્ફોટક ઈનિંગ રમી હતી અને પોતાની ટીમને દિલ્હી સામે 6 વિકેટે આસાનીથી જીત અપાવી હતી. ટીમના 274 રનમાંથી એકલા આ બેટ્સમેને 170 રન બનાવ્યા હતા.
વિજય હજારે ટ્રોફી 2025 શરૂ થઈ ગઈ છે અને દરેક ખેલાડીએ પોતાની પ્રતિભા દર્શાવવાનું શરૂ કરી દીધું છે. IPLની હરાજીમાં દિલ્હી કેપિટલ્સે જે ખેલાડીને રિષભ પંતની જગ્યાએ રિટેન કર્યો હતો, તે ખેલાડીએ ટૂર્નામેન્ટની પોતાની પહેલી જ મેચમાં દમદાર ઈનિંગ રમી શાનદાર સદી ફટકારી ટીમને આસાનીથી જીત અપાવી. આ ખેલાડી 22 વર્ષનો અભિષેક પોરેલ છે.
બંગાળ તરફથી રમતા અભિષેક પોરેલે શનિવારે 21 ડિસેમ્બરે દિલ્હી સામે યાદગાર ઈનિંગ રમી હતી. હૈદરાબાદના રાજીવ ગાંધી સ્ટેડિયમમાં રમાયેલી આ મેચમાં દિલ્હીની ટીમે પ્રથમ બેટિંગ કરતા 7 વિકેટ ગુમાવીને 272 રન બનાવ્યા હતા.
બંગાળ માટે ઓપનિંગ કરી રહેલા ડાબા હાથના બેટ્સમેન અભિષેકે આવતાની સાથે જ આક્રમક બેટિંગ શરૂ કરી. આ યુવા બેટ્સમેને એકલા હાથે દિલ્હીના બોલરોનો સામનો કર્યો અને માત્ર 130 બોલમાં 170 રનની આશ્ચર્યજનક ઈનિંગ રમીને હલચલ મચાવી દીધી.
બંગાળે માત્ર 41.3 ઓવરમાં 274 રન બનાવીને જીત મેળવી હતી, જેમાંથી 170 રન પોરેલના બેટમાંથી આવ્યા હતા. તેણે પોતાની ઈનિંગમાં 18 ફોર અને 7 સિક્સર ફટકારી હતી.
આ વર્ષે મેગા ઓક્શન પહેલા દિલ્હી કેપિટલ્સે અભિષેકને અનકેપ્ડ ખેલાડી તરીકે 4 કરોડ રૂપિયામાં રિટેન કર્યો હતો. નવાઈની વાત એ છે કે પોરેલને બે વર્ષ પહેલા યોજાયેલી હરાજીમાં કોઈ ટીમે ખરીદ્યો ન હતો.
પરંતુ રિષભ પંતના અકસ્માત બાદ, દિલ્હી કેપિટલ્સે તેને 2023ની સિઝન માટે રૂ.20 લાખમાં રિપ્લેસમેન્ટ તરીકે સામેલ કર્યો. ત્યારથી તે દિલ્હીનો ભાગ છે. આ પછી, પોરેલને 2024 સિઝનમાં સતત તકો મળી અને 14 મેચોમાં તેણે 159.51ના સ્ટ્રાઈક રેટથી 327 રન બનાવ્યા હતા. (All Photo Credit : X / PTI)