Breaking News: 41 વર્ષની ઉંમરે સદી ફટકારી આ દિગ્ગજ ખેલાડીએ રચ્યો ઈતિહાસ, 9 વર્ષ જૂનો વર્લ્ડ રેકોર્ડ તોડ્યો
ક્રિકેટમાં ઉંમર માત્ર એક આંકડો છે તે વાત ફાફ ડુ પ્લેસિસે ફરી સાબિત કરી છે. 41 વર્ષની ઉંમરે શાનદાર સદી ફટકારીને દક્ષિણ આફ્રિકાના આ દિગ્ગજ ખેલાડીએ T20 ક્રિકેટમાં સૌથી મોટી ઉંમરે સદી ફટકારવાનો વર્લ્ડ રેકોર્ડ પોતાના નામે કર્યો છે. તેની આ ઐતિહાસિક ઇનિંગે આખી દુનિયાનું ધ્યાન ખેંચ્યું છે.
ક્રિકેટના મેદાન પર ઘણા ખેલાડીઓ યુવાનીમાં જ પોતાની કારકિર્દીનો અંત લાવે છે, પરંતુ ફાફ ડુ પ્લેસિસે સાબિત કર્યું છે કે પ્રતિભા અને મહેનત હોય તો ઉંમર ક્યારેય અડચણ બની શકતી નથી. મેજર લીગ ક્રિકેટની શરૂઆતની મેચમાં ટેક્સાસ સુપર કિંગ્સના કેપ્ટન ફાફ ડુ પ્લેસિસે સિએટલ ઓર્કાસ સામે એવી ઈનિંગ રમી કે તેનું નામ ક્રિકેટ ઈતિહાસમાં નોંધાઈ ગયું.
ડલ્લાસના ગ્રાન્ડ પ્રેઈરી સ્ટેડિયમમાં રમાયેલી આ મેચમાં સિએટલ ઓર્કાસે પ્રથમ બેટિંગ કરીને ટેક્સાસ સુપર કિંગ્સ સામે 221 રનનો મોટો લક્ષ્યાંક આપ્યો હતો. જવાબમાં ફાફ ડુ પ્લેસિસે ઓપનિંગ કરતા ટીમને મજબૂત શરૂઆત અપાવી હતી. તેણે માત્ર 52 બોલમાં અણનમ 113 રનની તોફાની ઈનિંગ રમી હતી.
આ ઈનિંગમાં ડુ પ્લેસિસે 9 ચોગ્ગા અને 7 છગ્ગા ફટકારીને બોલરોની હાલત ખરાબ કરી દીધી હતી. તેની શાનદાર બેટિંગના કારણે ટેક્સાસ સુપર કિંગ્સે 18.3 ઓવરમાં જ ચાર વિકેટ ગુમાવીને 221 રનનો ટાર્ગેટ ચેઝ કરી ટુર્નામેન્ટમાં પોતાની પ્રથમ જીત નોંધાવી હતી.
ફાફ ડુ પ્લેસિસે આ સિદ્ધિ સાથે ઈંગ્લેન્ડના ભૂતપૂર્વ કેપ્ટન પોલ કોલિંગવુડનો નવ વર્ષ જૂનો રેકોર્ડ તોડી નાખ્યો. કોલિંગવુડે 2017 માં 41 વર્ષ અને 65 દિવસની ઉંમરે T20માં સદી ફટકારી હતી. હવે ડુ પ્લેસિસે 41 વર્ષ અને 340 દિવસની ઉંમરે સદી ફટકારીને આ યાદીમાં પ્રથમ સ્થાન મેળવી લીધું છે.
આટલું જ નહીં, ડુ પ્લેસિસ 40 વર્ષની ઉંમર બાદ T20 ક્રિકેટમાં ત્રણ સદી ફટકારનાર વિશ્વનો એકમાત્ર ખેલાડી બની ગયો છે. તેણે MLCમાં પણ 1000 રન પૂરા કરનાર પ્રથમ બેટ્સમેન બનવાની સિદ્ધિ મેળવી છે. તેની આ સફળતા યુવા ખેલાડીઓ માટે પ્રેરણારૂપ બની છે કે ક્રિકેટમાં ઉંમર નહીં પરંતુ પ્રદર્શન મહત્વનું હોય છે. (PC:PTI/X)
