Cotton Farming Tips : જૈવિક અને પરંપરાગત પદ્ધતિથી કપાસની ખેતી કરવાની 7 અસરકારક રીત !
કપાસ ભારતનો મહત્વપૂર્ણ રોકડ પાક છે. જે ખેડૂતોને આર્થિક રીતે મજબૂત બનાવવામાં મોટી ભૂમિકા ભજવે છે. યોગ્ય ખેતી પદ્ધતિ તેમજ પ્રાકૃતિક ઉપાયો અપનાવવાથી કપાસના પાકમાં સારી ગુણવત્તા મેળવી શકાય છે.
કપાસના પાકની વાવણી : કપાસની ખેતીમાં યોગ્ય અંતર અને પાણી વ્યવસ્થાપન ખૂબ જ મહત્વપૂર્ણ છે. સામાન્ય રીતે બે મેઢ વચ્ચે અંદાજે 2 ફૂટનું અંતર રાખવામાં આવે છે અને પાણી પણ આ જ મેઢ વચ્ચે આપવામાં આવે છે. બે મેઢ બનાવ્યા પછી લગભગ 6 ફૂટનું ખાલી સ્થાન રાખીને ફરી બે મેઢ બનાવવામાં આવે છે. આ રીતે એક એકરમાં આશરે 24 મેઢ તૈયાર કરવામાં આવે છે. આનાથી પાણી ભરાય છે. પાકનું રક્ષણ થાય છે. ઓછી વરસાદની સ્થિતિમાં પણ સારી ઉપજ મળે છે. ખાતર અને દવા આપવી સરળ બને છે. હવા અને પ્રકાશનો યોગ્ય ઉપયોગ થાય છે. મોડા વાવેતરમાં પણ સારી વૃદ્ધિ થાય છે
જીવાત નિયંત્રણ માટે હર્બલ દવાઓ: કપાસના ખેતરમાં જીવાત નિયંત્રણ માટે એલોઇવેરા જેલ, કનેરના ફળ, મરી, લીમડાની છાલ અને મરચાં જેવા કુદરતી ઘટકોનો ઉપયોગ કરવામાં આવે છે. આ તમામ સામગ્રીને પાણીમાં ઉકાળીને તેનો અર્ક તૈયાર કરવામાં આવે છે. ત્યારબાદ આ મિશ્રણને ગાળીને કપાસના પાક પર દર મહિને 2થી 3 વખત છંટકાવ કરવાથી જીવાતોનું નિયંત્રણ કરવામાં મદદ મળી શકે છે.
હર્બલ કીટ નિયંત્રણ : લીમડાના પાન, લીમડાનું તેલ, ચિરાયતા, કનેર અને ગોળને અન્ય ઔષધીય છોડ સાથે ગૌમૂત્રમાં 15 દિવસ સુધી સડવા દેવામાં આવે છે. ત્યારબાદ તેને ગાળી છંટકાવ કરવામાં આવે છે. તેનાથી કીટ પર નિયંત્રણ મુકી શકાય છે.
ઇયળ ઉપચાર : નીલગીરી, લીમડો અને ભૃંગરાજ જેવા છોડના પાનાને પીસીને 20 લીટર પાણીમાં ઉકાળવામાં આવે છે. ત્યારબાદ તેને ગાળી 6 દિવસના અંતરે બે વખત કપાસના છોડ પર છંટકાવ કરવામાં આવે તો ઇયળ પર નિયંત્રણ મળી શકે છે.
ઊધઇ પર નિયંત્રણ : સીતાફળ, કરંજ અને આકડાના પાનાને ગૌમૂત્રમાં 15 દિવસ સુધી રાખીને દવા તૈયાર કરવામાં આવે છે. આ દવાને પાણીમાં મિશ્રિત કરીને છંટકાવ કરવાથી ઊધઇ પર અસરકારક નિયંત્રણ મેળવી શકાય છે.
પરંપરાગત જીવાત નિયંત્રણ પદ્ધતિ : બાજરાના લોટને પાણીમાં ભેળવી છાણ સાથે 20 દિવસ સુધી રાખવામાં આવે છે. ત્યારબાદ તેને પાણીમાં મિશ્રિત કરીને છંટકાવ કરવામાં આવે છે, જે જીવાતોને નાશ કરવામાં મદદરૂપ થાય છે.
કપાસ સાથે અડદની મિશ્ર ખેતી : કપાસના છોડ વચ્ચે અડદની ખેતી કરવામાં આવે છે. અડદની મૂળમાં નાઇટ્રોજન ફિક્સિંગ બેક્ટેરિયા હોવાથી જમીનમાં નાઇટ્રોજન વધે છે. આથી જમીન વધુ ઉપજાઉ બને છે અને કપાસના પાકમાં સુધારો થઈ શકે છે.
નોંધ : અહીં, પૂરી પાડવામાં આવેલી વિગતો માત્ર રિપોર્ટ્સ મુજબ આધારિત છે. TV9 ગુજરાતી કોઈપણ પ્રકારની માહિતીને સમર્થન આપતું નથી.
