શું તમારી લોન વારંવાર રિજેક્ટ થઈ રહી છે? કોઈ એજન્ટને પૈસા આપ્યા વગર આ 5 સરળ રીતોથી ઘરે બેઠા સુધારો તમારો CIBIL સ્કોર
ખરાબ સિબિલ સ્કોરને કારણે બેંકો લોન આપવાની મનાઈ કરી શકે છે. ઘણા લોકો સ્કોર સુધારવા માટે એજન્ટોને હજારો રૂપિયા આપે છે, પરંતુ વાસ્તવમાં તમે પોતે જ શિસ્તબદ્ધ નાણાકીય વ્યવહાર દ્વારા તેને સુધારી શકો છો. જાણો 750થી વધુનો ક્રેડિટ સ્કોર મેળવવાની પાંચ સૌથી અસરકારક રીતો.
જો બેંક વારંવાર તમારી લોન અરજી નકારી રહી હોય, તો તેનું સૌથી મોટું કારણ નબળો સિબિલ (CIBIL) સ્કોર અથવા ક્રેડિટ સ્કોર હોઈ શકે છે. સામાન્ય રીતે બેંકો 750 કે તેથી વધુ ક્રેડિટ સ્કોર ધરાવતા ગ્રાહકોને જ સરળતાથી લોન આપે છે. સ્કોર સુધારવા માટે કોઈને પૈસા આપવાની જરૂર નથી, બસ નીચે મુજબની પદ્ધતિઓ અપનાવવાની જરૂર છે.
EMI અને બિલો સમયસર ભરો: ક્રેડિટ સ્કોર સુધારવાનો સૌથી સરળ રસ્તો એ છે કે તમે તમારા તમામ EMI અને ક્રેડિટ કાર્ડના બિલ નિયત તારીખે ભરો. એક પણ પેમેન્ટ મોડું થવાથી સ્કોર પર નકારાત્મક અસર પડે છે. ભૂલ ન થાય તે માટે ફોનમાં રિમાઇન્ડર અથવા ઓટો-ડેબિટ સુવિધા સેટ કરી લેવી હિતાવહ છે.
ક્રેડિટ કાર્ડની લિમિટનો મર્યાદિત ઉપયોગ: એક મહત્વનો નિયમ છે 'ક્રેડિટ યુટિલાઈઝેશન રેશિયો' (CUR). હંમેશા પ્રયાસ કરો કે તમે તમારા ક્રેડિટ કાર્ડની કુલ લિમિટના 30-40% થી વધુ વપરાશ ન કરો. વધુ પડતો વપરાશ બેંકને એવો સંકેત આપે છે કે તમે દેવામાં ડૂબેલા છો, જેનાથી સ્કોર ઘટે છે.
ક્રેડિટ રિપોર્ટની નિયમિત તપાસ કરો: ઘણીવાર સિબિલ રિપોર્ટમાં ટેકનિકલ ભૂલો પણ હોઈ શકે છે, જેમ કે કોઈ જૂની લોન ચૂકવી દીધા પછી પણ 'એક્ટિવ' દેખાવી. આથી સમયાંતરે તમારો ક્રેડિટ રિપોર્ટ ચેક કરતા રહો. જો કોઈ ભૂલ જણાય તો તરત જ સુધારા માટે અરજી કરો.
એકસાથે અનેક લોન માટે અરજી ન કરો: ઘણા લોકો એક જ સમયે અનેક બેંકોમાં લોન માટે પૂછપરછ કે અરજી કરે છે. આનાથી તમારા રિપોર્ટમાં વારંવાર 'હાર્ડ ઇન્ક્વાયરી' થાય છે, જે સ્કોર ઘટાડે છે. જ્યારે ખરેખર જરૂર હોય ત્યારે જ વિચારીને લોન માટે અરજી કરવી જોઈએ.
નાની લોન કે ક્રેડિટ કાર્ડનો નિયમિત વપરાશ: જો તમારી ક્રેડિટ હિસ્ટ્રી બહુ ઓછી હોય, તો એક નાની પર્સનલ લોન અથવા ક્રેડિટ કાર્ડ લઈને તેનો નિયમિત ઉપયોગ કરો અને સમયસર ચુકવણી કરો. આનાથી ધીરે-ધીરે તમારી શાખ વધશે અને સ્કોર વધુ મજબૂત બનશે.
નિષ્ણાંતોની સલાહ: યાદ રાખો કે સિબિલ સ્કોર રાતોરાત સુધરતો નથી. જો તમે આ નિયમોનું સતત પાલન કરશો, તો આગામી 3 થી 6 મહિનામાં તમને તમારા સ્કોરમાં મોટો સુધારો જોવા મળશે. આ માટે સાચી નાણાકીય શિસ્ત જ એકમાત્ર ચાવી છે.
