TR to PR : કેનેડાના આ વિસ્તારમાં રહેતા લોકોને સરળતાથી મળશે PR! જાણી લો
કેનેડાએ કામચલાઉ રહેવાસીઓ (Temporary Residents - TR) માટે કાયમી રહેઠાણ (Permanent Residency - PR) મેળવવાનો નવો માર્ગ રજૂ કર્યો છે.
TR થી PR: કેનેડાના ગ્રામીણ વિસ્તારોમાં રહેતા કામચલાઉ રહેવાસીઓ માટે કાયમી રહેઠાણનો રસ્તો વધુ સરળ બન્યો છે. આ નવી TR-ટુ-PR પાથવે ખાસ કરીને ગ્રામીણ વિસ્તારો અને નાના શહેરોમાં રહેતા વિદેશી કામદારોને ધ્યાનમાં રાખીને તૈયાર કરવામાં આવી છે. નોંધનીય છે કે આ કાર્યક્રમમાં ટોરોન્ટો, વાનકુવર અને મોન્ટ્રીયલ જેવા મોટા શહેરોને સામેલ કરવામાં આવ્યા નથી.
સરકારનો મુખ્ય ઉદ્દેશ ઇમિગ્રેશનને મોટા શહેરી વિસ્તારોમાંથી દૂર કરીને નાના શહેરો અને ગ્રામિણ વિસ્તારો તરફ દોરવાનો છે. આથી, જે કામદારો હાલમાં આવા વિસ્તારોમાં રહે છે અને કામ કરી રહ્યા છે, તેઓને PR મેળવવાની વધુ તક મળી શકે છે.
માર્ચમાં કેનેડિયન સરકારે જાહેરાત કરી હતી કે 2026 અને 2027 દરમિયાન આશરે 33,000 કામચલાઉ કામદારોને કાયમી રહેઠાણ આપવામાં આવશે. આ પહેલ ખાસ કરીને એવા લોકો માટે છે, જે પહેલેથી જ કેનેડામાં રહીને કામ કરી રહ્યા છે, ખાસ કરીને ગ્રામિણ વિસ્તારોમાં. આ નીતિના કારણે ટોરોન્ટો, વાનકુવર અને મોન્ટ્રીયલ જેવા મોટા શહેરોમાં કામ કરતા TR ધારકો આ કાર્યક્રમ માટે પાત્ર નહીં રહે. એટલે કે, શહેરોની તુલનામાં નાના શહેરો અને ગામડાઓમાં રહેતા કામદારોને વધુ લાભ મળશે.
તાજેતરમાં ઇમિગ્રેશન મંત્રી Lena Metlege Diab એ આપેલા એક ઇન્ટરવ્યુમાં જણાવ્યું હતું કે આ પ્રોગ્રામ તમામ સેન્સસ મેટ્રોપોલિટન વિસ્તારો (CMA) માટે લાગુ નહીં પડે. તેમણે વધુમાં જણાવ્યું કે આ અંગેની વિગતવાર માર્ગદર્શિકા આગામી અઠવાડિયામાં જાહેર કરવામાં આવશે. હાલ પ્રોગ્રામ શરૂ થઈ ગયો છે, પરંતુ તેની સંપૂર્ણ માહિતી હજુ જાહેર થવાની બાકી છે.
Statistics Canada અનુસાર, CMA (Census Metropolitan Area) એ એક અથવા વધુ નજીક આવેલી નગરપાલિકાઓનો સમૂહ છે, જે મોટા શહેરી કેન્દ્રની આસપાસ રચાય છે. તેમાં કુલ વસ્તી ઓછામાં ઓછી 100,000 હોવી જોઈએ, જેમાંથી ઓછામાં ઓછા 50,000 લોકો મુખ્ય શહેર વિસ્તારમાં રહેતા હોવા જરૂરી છે.
2021ની વસ્તી ગણતરી મુજબ, કેનેડામાં કુલ 41 CMA છે, જેમાં દેશની આશરે 84% વસ્તી રહે છે. આમાં ટોરોન્ટો, વાનકુવર અને મોન્ટ્રીયલ ઉપરાંત કેલગરી, એડમોન્ટન, હેલિફેક્સ, હેમિલ્ટન, કિચનર-કેમ્બ્રિજ-વોટરલૂ, ઓટાવા-ગેટિનો, વિનીપેગ અને ક્વિબેક સિટી જેવા શહેરોનો સમાવેશ થાય છે.
TR થી PR પાથવે એક ખાસ ફેડરલ ઇમિગ્રેશન પ્રોગ્રામ છે, જેના માધ્યમથી 2026 અને 2027 દરમિયાન આશરે 33,000 કામચલાઉ કામદારોને કાયમી રહેઠાણ આપવામાં આવશે. આ પ્રોગ્રામને Immigration, Refugees and Citizenship Canada દ્વારા માર્ચમાં શરૂ કરવામાં આવ્યો હતો. આ પહેલ ખાસ કરીને એવા વિદેશી કામદારો માટે છે, જે પહેલેથી જ કેનેડામાં રહીને કામ કરી રહ્યા છે, ખાસ કરીને ગ્રામિણ વિસ્તારોમાં. અગાઉ પણ 14 એપ્રિલ, 2021ના રોજ સમાન પ્રકારનો પ્રોગ્રામ શરૂ કરવામાં આવ્યો હતો, જેની અરજી મર્યાદા 16 જુલાઈ, 2021 સુધીમાં પૂર્ણ થઈ ગઈ હતી.
CMA વિસ્તારોને બહાર રાખવાનો મુખ્ય હેતુ એ છે કે ઇમિગ્રેશનને મોટા શહેરોમાંથી દૂર કરીને નાના શહેરો અને ગ્રામિણ વિસ્તારોમાં વધારવું. આથી, ત્યાં કામ કરતા કામચલાઉ વિદેશી કામદારોને કાયમી રહેઠાણ મેળવવાની વધુ તક મળશે અને તે વિસ્તારોનો વિકાસ પણ પ્રોત્સાહિત થશે.
