Second Hand Electric Cars : શું જૂની ઇલેક્ટ્રિક કાર ખરીદવી યોગ્ય છે? જાણો સ્ટડી શું કહે છે?
હાલમાં મોટાભાગના લોકો ઈંધણની સમસ્યાને કારણે EV તરફ વળી રહ્યા છે. ત્યારે તમારે જો ઇલેક્ટ્રિક વાહન ખરીદવું છે તો શું તમે જૂનું વાહન ખરીદો તો તે ફાયદાનો સોદો ખરો? અહીં જાણો સ્ટડી શું કહે છે..
વડા પ્રધાન Narendra Modi દ્વારા નાગરિકોને પર્યાવરણને અનુકૂળ ઇલેક્ટ્રિક વાહનો (EV) અપનાવવા માટે પ્રોત્સાહિત કરવામાં આવી રહ્યું છે. જોકે, નવી ઇલેક્ટ્રિક કારની ઊંચી કિંમતને કારણે ઘણા લોકો તેને ખરીદવામાં સંકોચ અનુભવે છે. આવી સ્થિતિમાં, વપરાયેલી ઇલેક્ટ્રિક કાર ખરીદવી એક સારો અને આર્થિક વિકલ્પ બની શકે છે. તાજેતરના એક અભ્યાસમાં પણ આ વાત સામે આવી છે કે યુઝ્ડ EV ખરીદવાથી લાંબા ગાળે સારી બચત થઈ શકે છે.
મિશિગન યુનિવર્સિટીના અભ્યાસ મુજબ, વપરાયેલી ઇલેક્ટ્રિક કાર ખરીદવાથી માત્ર ખરીદીના ખર્ચમાં જ નહીં, પરંતુ જાળવણી અને ઇંધણના ખર્ચમાં પણ મોટો ફાયદો મળે છે. ખાસ કરીને એવા લોકો માટે, જેઓ ઓછા બજેટમાં ઇલેક્ટ્રિક કાર ખરીદવાનું સપનું પૂરું કરવા માંગે છે, તેમના માટે આ એક સમજદાર નિર્ણય બની શકે છે. ભારતમાં પણ વડા પ્રધાન મોદીની અપીલ બાદ ઇલેક્ટ્રિક વાહનો તરફ લોકોનો ઝુકાવ વધી રહ્યો છે, જેના કારણે વપરાયેલી EVનું બજાર ઝડપથી વિકસવાની સંભાવના છે.
અહેવાલ મુજબ, 3 વર્ષ જૂની મધ્યમ કદની ઇલેક્ટ્રિક SUV ખરીદવાથી નવી પેટ્રોલ SUVની સરખામણીએ આશરે 13,000 ડોલર એટલે કે અંદાજે 12.47 લાખ રૂપિયાની બચત થઈ શકે છે. જ્યારે સમાન વપરાયેલી પેટ્રોલ SUV ખરીદવાથી માત્ર 3,000 ડોલર એટલે કે અંદાજે 2.87 લાખ રૂપિયાની જ બચત થાય છે. આથી સ્પષ્ટ થાય છે કે લાંબા ગાળે યુઝ્ડ EV વધુ ફાયદાકારક સાબિત થઈ શકે છે.
વપરાયેલી ઇલેક્ટ્રિક કાર સસ્તી મળવાની પાછળનું મુખ્ય કારણ તેનું ઝડપી અવમૂલ્યન છે. શરૂઆતના થોડા વર્ષોમાં ઇલેક્ટ્રિક કારનું રિસેલ વેલ્યુ પેટ્રોલ કાર કરતાં ઝડપથી ઘટે છે. નવી કાર ખરીદનાર માટે આ ગેરલાભ હોઈ શકે, પરંતુ વપરાયેલી કાર ખરીદનાર માટે તે ઓછા ખર્ચે પ્રીમિયમ કાર મેળવવાની તક બની જાય છે.
બીજું મહત્વપૂર્ણ કારણ છે ઘરેથી ચાર્જિંગની સુવિધા. જો કાર માલિક મોટાભાગે ઘરે કાર ચાર્જ કરે છે, તો વીજળીનો ખર્ચ જાહેર ચાર્જિંગ સ્ટેશનની સરખામણીએ ઘણો ઓછો રહે છે. અભ્યાસ મુજબ, જો EV માલિક 80 ટકા ચાર્જિંગ ઘરે અને 20 ટકા જાહેર ચાર્જર પર કરે, તો તેને સૌથી વધુ બચત થાય છે. જોકે, જો કોઈ સંપૂર્ણપણે ડીસી ફાસ્ટ ચાર્જર પર આધાર રાખે, તો ખર્ચ હાઇબ્રિડ કાર કરતાં વધુ થઈ શકે છે, પરંતુ તે છતાં પેટ્રોલ કાર કરતાં સસ્તો જ રહે છે.
અભ્યાસમાં નવા અને વપરાયેલા ઇલેક્ટ્રિક વાહનોના ખર્ચની પણ સરખામણી કરવામાં આવી હતી. સંશોધન મુજબ, નવી ઇલેક્ટ્રિક SUV અથવા પિકઅપ ટ્રક ખરીદવાથી 7 વર્ષ સુધીનો કુલ ખર્ચ પેટ્રોલ અથવા હાઇબ્રિડ વાહન કરતાં વધુ થઈ શકે છે. જ્યારે 3 વર્ષ જૂની ઇલેક્ટ્રિક કાર ખરીદવાથી 7 વર્ષ સુધીનો કુલ ખર્ચ નોંધપાત્ર રીતે ઓછો રહે છે.
યુનિવર્સિટીના નિષ્ણાતોનું માનવું છે કે ઓછા બજેટમાં ગુણવત્તાયુક્ત ઇલેક્ટ્રિક કાર ખરીદવા ઈચ્છતા લોકો માટે આ સારા સમાચાર છે. નવી EV ખરીદતી વખતે તેની ઝડપથી ઘટતી રિસેલ વેલ્યુ ચિંતાનો વિષય બની શકે છે, પરંતુ વપરાયેલી ઇલેક્ટ્રિક કાર ખરીદવી લાંબા ગાળે વધુ સમજદાર અને આર્થિક નિર્ણય સાબિત થઈ શકે છે.
