હેલ્મેટ જ ન બની જાય ઈજાનું કારણ: ખરીદતી વખતે આ 5 બાબતોનું ખાસ રાખો ધ્યાન
માત્ર ચલણથી બચવા માટે નહીં, પરંતુ પોતાના જીવની સુરક્ષા માટે યોગ્ય હેલ્મેટ પસંદ કરવું ખૂબ જરૂરી છે. હેલ્મેટ ખરીદતી વખતે ISI માર્ક, યોગ્ય ફિટિંગ, વાઇઝરની ગુણવત્તા અને લોક જેવી મહત્વપૂર્ણ બાબતો ધ્યાનમાં રાખવી જોઈએ.
બાઇક ચલાવતી વખતે હેલ્મેટ તમારી સુરક્ષા માટે હોય છે, પરંતુ મોટાભાગના લોકો આ બાબતે જ બેદરકારી દાખવતા હોય છે. માત્ર હેલ્મેટ પહેરી લેવું પૂરતું નથી, પરંતુ તેને ખરીદતી વખતે કેટલીક ખાસ બાબતો ધ્યાનમાં રાખવી પણ એટલી જ જરૂરી છે.
બાઇક કે સ્કૂટર માટે હેલ્મેટ માત્ર એટલા માટે ખરીદવું કે ટ્રાફિકનું ચલણ ન કપાય, તો એ તમારી મોટી ભૂલ સાબિત થઈ શકે છે. હેલ્મેટ રાઇડિંગ દરમિયાન તમને ગંભીર ઈજાઓથી બચાવવાનું કામ કરે છે. જો તમે તમારા માટે યોગ્ય હેલ્મેટની પસંદગી નહીં કરો, તો આ જ સુરક્ષા કવચ તમારા જીવનું દુશ્મન બની શકે છે. હેલ્મેટ માત્ર ટ્રાફિક નિયમોના પાલન ખાતર ન ખરીદો, પરંતુ એટલા માટે ખરીદો જેથી અકસ્માતના સમયે તમારા માથામાં ગંભીર ઈજા ન પહોંચે.
હેલ્મેટ ખરીદતી વખતે લોકો તેની ડિઝાઇન અને કલર જેવી બાબતો પર વધુ ધ્યાન આપે છે અને સસ્તા ભાવે મળી જાય તેવો પ્રયાસ કરે છે. આવી નાની બેદરકારી ખૂબ ભારે પડી શકે છે. આ આર્ટિકલમાં જાણો કે હેલ્મેટ ખરીદતી વખતે કઈ બાબતો ચોક્કસપણે તપાસવી જોઈએ.
સર્ટિફાઇડ હેલ્મેટ ખરીદવું જરૂરી: હેલ્મેટ ખરીદતી વખતે ખાસ ધ્યાન રાખો કે તે ISI માર્ક સર્ટિફાઇડ હોવું જોઈએ. તેના પર ફક્ત સ્ટીકર જ ન જુઓ, પરંતુ માર્કિંગ યોગ્ય રીતે ચકાસો. ઘણી વખત લોકો હલકી ગુણવત્તાવાળા ડુપ્લિકેટ હેલ્મેટ સર્ટિફાઇડ કહીને વેચી દેતા હોય છે. તેને હંમેશાં સારી બ્રાન્ડમાંથી જ ખરીદો જે સુરક્ષાના તમામ માપદંડો પૂર્ણ કરતી હોય.
મજબૂતી અને પેડિંગ પર ધ્યાન આપો: હેલ્મેટ ખરીદતી વખતે ચકાસો કે તે કેટલું મજબૂત છે. ઘણી વખત હેલ્મેટ દેખાવમાં ખૂબ આકર્ષક લાગે છે, પરંતુ કોઈ ટક્કર થાય ત્યારે તૂટી જાય છે. આવા સંજોગોમાં માથામાં વધુ ગંભીર ઈજા થઈ શકે છે. આ ઉપરાંત અંદરનું પેડિંગ તપાસવું પણ જરૂરી છે, જેથી પહેર્યા પછી કોઈ અગવડ ન પડે. આ પેડિંગ તમારા માથાને આંચકા કે ઈજાથી બચાવવામાં મદદ કરે છે.
વાઇઝર કેવું છે?: હેલ્મેટનું વાઇઝર એટલે કે આગળનો કાચ યોગ્ય રીતે તપાસો. તે તમારી આંખો અને ચહેરાની સુરક્ષા માટે ખૂબ જરૂરી છે. ખરીદતી વખતે ધ્યાન રાખો કે તે સારી ગુણવત્તાવાળા પોલીકાર્બોનેટ મટીરિયલમાંથી બનેલું હોવું જોઈએ. તે સ્ક્રેચ-રેઝિસ્ટન્ટ અને એન્ટી-ફોગ હોવું પણ જરૂરી છે. બજારમાં સામાન્ય રીતે 4 પ્રકારના વાઇઝર મળે છે:
ક્લિયર વાઇઝર (Clear Visor): આ સૌથી સામાન્ય છે, જે વરસાદ અને પવન-ધૂળથી ચહેરાનું રક્ષણ કરે છે. સ્મોક અથવા ટિન્ટેડ વાઇઝર (Smoke/Tinted Visor): તે તેજ તડકો કે પ્રખર પ્રકાશમાં આંખોને અંજાઈ જવાથી બચાવવામાં મદદરૂપ બને છે. મિરર / ઇરિડિયમ / રેઇન્બો વાઇઝર (Mirror / Rainbow Visor): આ બહારથી ચમકદાર હોય છે, જેથી અંદર તડકાની ચમક ઓછી લાગે છે. ડે એન્ડ નાઇટ / રેવો વાઇઝર (Day & Night Visor): તેને બદલ્યા વગર તમે દિવસ અને રાત બંને સમયે સરળતાથી ડ્રાઇવિંગ કરી શકો છો.
હેલ્મેટ પહેરીને ટ્રાય કરો: માત્ર ડિઝાઇન કે મજબૂતી પૂરતી નથી, તમારા માથામાં હેલ્મેટ યોગ્ય રીતે ફિટ થાય છે કે નહીં તે પણ જરૂરી છે; તેથી તેને પહેરીને ચોક્કસ ચેક કરો. જુઓ કે તે વધુ પડતું ઢીલું તો નથી ને? જો પહેર્યા પછી તે માથા પર હલતું હોય કે ફરતું હોય તો ન ખરીદો. આ ઉપરાંત, વધુ પડતું ટાઇટ હેલ્મેટ તમને અસ્વસ્થ કરી શકે છે. માથા પર બરાબર ટકી રહે તેવું આરામદાયક ફિટિંગવાળું હેલ્મેટ જ પસંદ કરવું જોઈએ.
લોક મજબૂત હોવું જોઈએ: પાંચમી મહત્વની બાબત એ છે કે હેલ્મેટનું લોક મજબૂત હોવું જોઈએ. તેની ચિન-સ્ટ્રેપ (દાઢીનો પટ્ટો) તપાસો અને ખાતરી કરો કે લોક લગાવ્યા પછી તે પોતાની જાતે ખુલી ન જાય. જરૂરી છે કે જ્યારે તમે હેલ્મેટ પહેરીને ટ્રાય કરો, ત્યારે ફિટિંગની સાથે સાથે તેનો સ્ટ્રેપ લોક કરીને પણ ચકાસી લો.
