Breaking News : પેટ્રોલ પંપ પરથી એક દિવસમાં કેટલું પેટ્રોલ-ડીઝલ ખરીદી શકો? જાણી લો આ નિયમો
મિડિલ ઈસ્ટમાં ચાલી રહેલા યુદ્ધના માહૌલ વચ્ચે દેશભરમાં એલપીજી બાદ પેટ્રોલ-ડીઝલની ઉણપની ચિંતા લોકોને થઈ રહી છે. લોકો પેટ્રોલ પંપે ડ્રમ લઈને પહોચી રહ્યા છે. તો ચાલો જાણીએ કે, તમે પેટ્રોલ પંપ પરથી કેટલું પેટ્રોલ ખરીદી શકો.
મિડિલ ઈસ્ટમાં યુદ્ધ બંધ થવાનું નામ લઈ રહ્યું નથી.હવે આ યુદ્ધની અસર દેશભરમાં જોવા મળી રહી છે. ખાસકરીને પેટ્રોલ,ડીઝલ અને રસોઈ ગેસને લઈ અનેક પ્રકારની ચર્ચાઓ થઈ રહી છે.
આ વચ્ચે દેશના કેટલાક શહેરોમાં પેટ્રોલ પંપ પર લાંબી લાઈનો જોવા મળી રહી છે. લોકો બાઈક કાર લઈ ગાડીની ટાંકી ફુલ કરાવી રહ્યા છે. તો કેટલાક લોકો પ્લાસ્ટિકના ટેન્કર લઈ પેટ્રોલ પંપની લાઈનમાં ઉભા છે.
પરંતુ હવે એ સાવલ થાય છે કે, પેટ્રોલ પંપ પરથી તમે કેટલું પેટ્રોલ ખરીદી શકો. આમ તો નિયમ એવો છે કે, તમે વાહનમાં જેટલું પેટ્રોલ ભરાવવા માંગો ભરાવી શકો છો. પરંતુ પેટ્રોલ અને ડીઝલ અલગથી ખરીદવાની વાત કરીએ તો, તમને સામાન્ય રીતે કેનમાં 2 થી 5 લિટર પેટ્રોલ મળી શકે છે.
ઘણા પેટ્રોલ પંપ વિનંતી પર 5-10 લિટર પણ આપે છે. જો કે, તમને સામાન્ય પ્લાસ્ટિક બોટલોમાં મળશે નહીં, તમને તે ફક્ત સ્ટીલ અથવા ભારે પ્લાસ્ટિકમાં મળશે.
જો કોઈને 20, 50 કે 200 લીટર પેટ્રોલ-ડીઝલ ડ્રમમાં જોઈએ તો, સામાન્ય રીતે પરમિટ,લાઈસન્સ જરુરી હોય છે. પેટ્રોલિયમ એક્ટ 1934 હેઠળ આ નિયમ નિર્ધારિત છે. આ કાનુન હેઠળ ગ્રાહકોને લેખિતમાં જણાવવું પડશે કે, ડ્રેમમાં પેટ્રોલ-ડિઝલ ક્યા કામ માટે જોઈએ છે.
જો તમે વધુ ઇંધણનો સંગ્રહ કરવા માંગતા હો, તો તમારે પેટ્રોલિયમ અને વિસ્ફોટકો સલામતી સંગઠન (PESO) પાસેથી ખાસ લાઇસન્સ મેળવવું પડશે. લાઇસન્સ વિના ઘરે મોટી માત્રામાં ઇંધણનો સંગ્રહ કરવો એ માત્ર ગેરકાયદેસર જ નથી પણ સલામતીના દૃષ્ટિકોણથી અત્યંત જોખમી પણ છે.
