Stock Market : 50 કરોડ ડોલરનું બાકી ‘ડિવિડન્ડ’ મળશે ! વેનેઝુએલાના ક્રૂડ ઓઇલ પરના પ્રતિબંધ હટશે, તો આ ઓઇલ કંપનીના શેર બની શકે છે ‘ચર્ચાનો વિષય’
શનિવારે એટલે કે 03 જાન્યુઆરીના રોજ અમેરિકાએ વેનેઝુએલા પર હુમલો કર્યો અને ત્યાંના રાષ્ટ્રપતિ નિકોલસ માદુરો તેમજ તેમની પત્નીને પકડી લીધા. અમેરિકા દ્વારા વેનેઝુએલાના તેલ ઉદ્યોગ પર કબજો થવાથી વેનેઝુએલાના કાચા તેલના વેચાણ પર લાગેલા પ્રતિબંધ દૂર થવાની શક્યતા છે.
બ્રોકરેજ ફર્મ જેફરીઝના મતે, ONGC માટે આ 'મિડિયમ ટર્મ રિસ્ક' વેનેઝુએલામાં ફરી શરૂ થતું ઉત્પાદન બની શકે છે. આનાથી વૈશ્વિક સ્તરે ક્રૂડ ઓઇલ સપ્લાય વધી શકે છે અને તેલના ભાવ પર દબાણ આવી શકે છે. જો ક્રૂડ ઓઇલના ભાવ ઘટે છે, તો તે ONGC ની કમાણી પર નકારાત્મક અસર કરી શકે છે.
05 જાન્યુઆરીએ ઓઇલ એન્ડ નેચરલ ગેસ કોર્પોરેશન લિમિટેડના શેર શરૂઆતમાં વધ્યા અને પછીથી તેમાં જંગી ઘટાડો જોવા મળ્યો. BSE પર શેર ઊંચો ખુલ્યો અને ₹246.40 ના લેવલે પહોંચ્યો પરંતુ પછીથી તે ₹238.50 ની નીચી સપાટીએ પહોંચ્યો. કંપનીનું માર્કેટ કેપ ₹3 લાખ કરોડ સુધી પહોંચી ગયું છે અને શેરની ફેસ વેલ્યુ ₹5 છે.
સરકારી માલિકીની ONGC એ જુલાઈ-સપ્ટેમ્બર 2025 ક્વાર્ટરમાં વાર્ષિક ધોરણે 18 ટકા ઘટીને ₹9,848 કરોડનો ચોખ્ખો નફો નોંધાવ્યો હતો, જે એક વર્ષ અગાઉ ₹11,984 કરોડ હતો. નાણાકીય વર્ષ 2025 માટે કંપનીનો સ્ટેન્ડ-અલોન આવક ₹1,37,846.29 કરોડ હતી, જ્યારે ચોખ્ખો નફો ₹35,610.32 કરોડ હતો.
