Gold ETF અને Gold Fund માં ફરી કરી શકાશે ‘રોકાણ’, દેશના 4 અગ્રણી મ્યુચ્યુઅલ ફંડ હાઉસનો ‘મોટો નિર્ણય’
રોકાણકારો માટે એક મોટા અને રાહતના સમાચાર સામે આવ્યા છે. દેશના ચાર મોટા મ્યુચ્યુઅલ ફંડ હાઉસે પોતાના એક ખાસ રોકાણ સેગમેન્ટ પર મૂકેલો અસ્થાયી પ્રતિબંધ હવે હટાવી લીધો છે. માર્કેટની સ્થિતિ થાળે પડતાં જ રોકાણકારો માટે આ લોકપ્રિય વિકલ્પમાં ફરીથી લમ્પ સમ અને સ્વિચ-ઈનની પ્રક્રિયા શરૂ કરી દેવામાં આવી છે.
HDFC મ્યુચ્યુઅલ ફંડ અને Axis મ્યુચ્યુઅલ ફંડે પોતાની તમામ ગોલ્ડ ETF, ગોલ્ડ ફંડ અને ગોલ્ડ ETF FoF સ્કીમ્સમાં સબ્સ્ક્રિપ્શન ફરીથી શરૂ કરી દીધું છે. આ નિર્ણય Tata Mutual Fund અને Aditya Birla Sun Life Mutual Fund દ્વારા પોતાની ગોલ્ડ-બેઝ્ડ સ્કીમ્સમાં સબ્સ્ક્રિપ્શન પહેલાથી જ ફરીથી શરૂ કર્યા બાદ લેવામાં આવ્યો છે.
એક રિપોર્ટ મુજબ, HDFC મ્યુચ્યુઅલ ફંડે એક નોટિસ-કમ-એડેન્ડમ દ્વારા માહિતી આપી છે કે; HDFC Gold ETF અને HDFC Gold ETF Fund of Fund માં લમ્પ સમ સબ્સ્ક્રિપ્શન પર મૂકેલો અસ્થાયી પ્રતિબંધ હટાવી લેવામાં આવ્યો છે. 14 ઓગસ્ટ 2026 થી HDFC Gold ETF Fund of Fund માં લમ્પ સમ ખરીદી અને સ્વિચ-ઈન કોઈપણ રોકટોક વગર સ્વીકારવામાં આવી રહ્યા છે.
Axis મ્યુચ્યુઅલ ફંડે પણ પોતાના ગોલ્ડ ETF અને ગોલ્ડ ફંડ પર મૂકેલો અસ્થાયી પ્રતિબંધ હટાવી લીધો છે. Axis Gold ETF માં 25 કરોડ રૂપિયાથી વધુના મોટા રોકાણકારોના ડાયરેક્ટ ટ્રાન્ઝેક્શન 18 ઓગસ્ટ 2026 થી સ્વીકારવામાં આવી રહ્યા છે. Axis Gold Fund માં લમ્પ સમ સબ્સ્ક્રિપ્શન અને સ્વિચ-ઈન કોઈપણ મર્યાદા વગર 18 ઓગસ્ટ 2026 થી સ્વીકારવામાં આવી રહી છે. ફંડ હાઉસે સ્પષ્ટ કર્યું છે કે, સ્કીમ્સના SID (સ્કીમ ઈન્ફોર્મેશન ડોક્યુમેન્ટ) અને KIM (કી ઈન્ફોર્મેશન મેમોરેન્ડમ) ની બાકીની તમામ શરતો પહેલા જેવી જ રહેશે.
Tata Mutual Fund એ 21 ઓગસ્ટ 2026થી 25 કરોડ અને તેથી વધુનું રોકાણ કરનારા મોટા રોકાણકારો માટે Tata Gold ETF નું સબ્સ્ક્રિપ્શન ફરીથી શરૂ કરી દીધું છે. આ સાથે જ Tata Gold ETF FOF માં લમ્પ સમ ખરીદી અને સ્વિચ-ઈન પર મુકાયેલી રોકાણ મર્યાદા પણ હટાવી લેવામાં આવી છે. હવે આ ફેરફાર આગામી સૂચના સુધી ચાલુ રહેશે.
ત્યાં જ Aditya Birla Sun Life Mutual Fund એ સૌથી પહેલા 13 ઓગસ્ટ 2026 થી Aditya Birla Sun Life Gold Fund માં ફ્રેશ લમ્પ સમ સબ્સ્ક્રિપ્શન અને સ્વિચ-ઈનને કોઈપણ પ્રતિબંધ વગર ફરીથી શરૂ કર્યું હતું. આ રીતે હવે ચારેય મોટા ફંડ હાઉસ HDFC, Axis, Tata અને Aditya Birla Sun Life પોતાની ગોલ્ડ સ્કીમ્સમાં સામાન્ય રીતે રોકાણ સ્વીકારી રહ્યા છે. તમામ ફંડ હાઉસીસનું કહેવું છે કે, આ ફેરફાર માર્કેટની સ્થિતિ સામાન્ય થવાને કારણે કરવામાં આવ્યો છે.
જૂન 2026 માં અનેક મ્યુચ્યુઅલ ફંડ હાઉસીસે ગોલ્ડ સાથે જોડાયેલી સ્કીમ્સમાં આવી રહેલા ભારે રોકાણને મેનેજ કરવા માટે અસ્થાયી રૂપે સબ્સ્ક્રિપ્શન પર રોક લગાવી હતી. HDFC મ્યુચ્યુઅલ ફંડે 4 જૂને, Axis મ્યુચ્યુઅલ ફંડે 5 અને 10 જૂને તેમજ Tata Mutual Fund એ 8 જૂનથી આ પ્રતિબંધ લગાવ્યો હતો. સરકારે વેપાર ખાધ ઘટાડવા માટે ફિઝિકલ ગોલ્ડ પર ઈમ્પોર્ટ ડ્યુટી વધારી હતી, જેના પછી ગોલ્ડ ETFની માંગ અચાનક ખૂબ વધી ગઈ હતી. આ વધેલી માંગના કારણે ફંડ હાઉસીસ પર નવી ETF યુનિટ્સ માટે ફિઝિકલ ગોલ્ડ એકઠું કરવાનું દબાણ વધી ગયું હતું, જ્યારે સપ્લાય ચેઈન પહેલાથી જ મર્યાદિત હતી.
આ જ કારણે ફંડ હાઉસીસે મોટા ડાયરેક્ટ રોકાણ અને રિટેલ લમ્પ સમ ખરીદી પર થોડા સમય માટે મર્યાદા મૂકી હતી. હવે માર્કેટની સ્થિતિ સામાન્ય થયા બાદ ચારેય ફંડ હાઉસે પોતાની ગોલ્ડ સ્કીમ્સમાં રોકાણની સુવિધા ફરીથી શરૂ કરી દીધી છે.
Published On - 7:24 pm, Sun, 23 August 26
