Breaking News: મધ્યમ વર્ગ માટે ‘મોટી તક’! સોનામાં ₹1,100 અને ચાંદીમાં ₹3,300 નો ઘટાડો, રોકાણકારોના શ્વાસ અધ્ધર થયા
વૈશ્વિક બજારમાં આવેલા મોટા ઉલટફેરને કારણે ભારતીય સર્રાફા બજારમાં સોના અને ચાંદીના ભાવમાં મોટો ઘટાડો નોંધાયો છે. સોનામાં ₹1,100 અને ચાંદીમાં ₹3,300 નો કડાકો બોલાતા જ્યાં એકતરફ મોટા રોકાણકારો ચિંતામાં મુકાયા છે, ત્યાં બીજી તરફ ખરીદીની રાહ જોઈને બેઠેલા મધ્યમ વર્ગ માટે આ એક ‘મોટી તક’ સમાન છે.
વૈશ્વિક બજારોમાં આવેલી નબળાઈ અને ડૉલરની વધતી મજબૂતીના કારણે ભારતીય સર્રાફા બજારમાં બુધવારે સોના-ચાંદીના ભાવમાં મોટો ઘટાડો નોંધાયો છે. દિલ્હીના સર્રાફા (સોના-ચાંદી) બજારમાં સોનાના ભાવ 1,100 રૂપિયા તૂટીને 1.61 લાખ રૂપિયા પ્રતિ 10 ગ્રામના સ્તરે આવી ગયા છે. યુએસ ડૉલરની સુરક્ષિત રોકાણ તરીકે વધતી માંગ અને અમેરિકા-ઈરાન વચ્ચે ચાલી રહેલા તણાવ વચ્ચે રોકાણકારોના વલણથી કીમતી ધાતુઓના બજાર પર આ મોટું દબાણ જોવા મળી રહ્યું છે.
ઑલ ઇન્ડિયા સર્રાફા એસોસિએશનના જણાવ્યા અનુસાર, 99.9 ટકા શુદ્ધતા ધરાવતું સોનું 1,100 રૂપિયાના ઘટાડા સાથે 1,61,300 રૂપિયા પ્રતિ 10 ગ્રામ (તમામ ટેક્સ સહિત) પર આવી ગયું છે. મંગળવારે તે 1,62,400 રૂપિયા પર બંધ થયું હતું.
ચાંદીના ભાવમાં પણ 3,300 રૂપિયાનો મોટો ઘટાડો આવ્યો છે, જેનાથી તેના ભાવ 2,69,700 રૂપિયા પ્રતિ કિલોગ્રામ (તમામ ટેક્સ સહિત) રહી ગયા છે. છેલ્લા ટ્રેડિંગ સેશનમાં ચાંદી 2,73,000 રૂપિયા પ્રતિ કિલો પર બંધ થઈ હતી.
એચડીએફસી સિક્યોરિટીઝના સિનિયર એનાલિસ્ટ (કોમોડિટીઝ) સૌમિલ ગાંધીના જણાવ્યા મુજબ, અમેરિકા અને ઈરાન વચ્ચેની વાટાઘાટોને લઈને બનેલી અનિશ્ચિતતાથી કીમતી ધાતુઓ પર દબાણ વધ્યું છે. ટૂંક સમયમાં સમજૂતી થવાની આશાઓ ધૂંધળી થતાં વૈશ્વિક વેપાર પ્રભાવિત થવાનો અને મોંઘવારી લાંબા સમય સુધી ઊંચા સ્તરે રહેવાનો ડર છે.
મોંઘવારીના આ ડરથી એવો અંદાજ મજબૂત બન્યો છે કે, યુએસ ફેડરલ રિઝર્વ (Fed) લાંબા સમય સુધી કડક નાણાકીય નીતિ (ઊંચા વ્યાજ દરો) ચાલુ રાખી શકે છે. આ પરિસ્થિતિ સોના-ચાંદી માટે નકારાત્મક માનવામાં આવે છે. કોટક સિક્યોરિટીઝના કાયનાત ચેનવાલા (એવીપી કોમોડિટી રિસર્ચ) એ જણાવ્યું કે, ઈરાનમાં નવા અમેરિકી હુમલા બાદ સુરક્ષિત રોકાણ તરીકે ડૉલર મજબૂત થયો છે, જેના કારણે સોના-ચાંદીમાં મંગળવાર પછી બુધવારે પણ ઘટાડો જારી રહ્યો હતો.
આંતરરાષ્ટ્રીય બજારોમાં પણ વેચવાલીનો માહોલ જોવા મળ્યો હતો. હાજર સોનું (Spot Gold) 1.03 ટકા ઘટીને 4,461.02 ડૉલર પ્રતિ ઔંસ પર ટ્રેડ કરી રહ્યું હતું. બીજી તરફ, આંતરરાષ્ટ્રીય બજારમાં ચાંદી પણ લગભગ 3 ટકા તૂટીને 74.96 ડૉલર પ્રતિ ઔંસના સ્તરે આવી ગઈ હતી. હવે રોકાણકારોની નજર અમેરિકાના રોજગારના આંકડા (ADP એમ્પ્લોયમેન્ટ) અને ગુરુવારે જાહેર થનારા પીસીઈ (PCE) મોંઘવારીના આંકડા પર ટકેલી છે, જેનાથી વ્યાજ દરોની ભવિષ્યની દિશા સ્પષ્ટ થશે.
Published On - 8:44 pm, Wed, 27 May 26
