8th Pay Commission : સરકારી કર્મચારીઓને હોળી પહેલા મળશે મોટી ભેટ, થઈ શકે છે DA ની જાહેરાત
Breaking News : કેન્દ્ર સરકાર સરકારી કર્મચારીઓને હોળી પહેલા 5% મોંઘવારી ભથ્થા (DA) વધારાની ભેટ આપી શકે છે, જેથી DA 58% થી 63% થશે. આ સાથે 8મા પગાર પંચની રચના, તેની સત્તાવાર વેબસાઈટ અને 25 ફેબ્રુઆરીએ કર્મચારી સંગઠનોની મહત્વપૂર્ણ બેઠક અંગે પણ ચર્ચા છે.
કેન્દ્ર સરકાર હોળી પહેલા સરકારી કર્મચારીઓને મોટી ભેટ આપી શકે છે. અહેવાલો મુજબ, મોંઘવારી ભથ્થા (DA)માં 5 ટકા વધારાની જાહેરાત થવાની શક્યતા છે, જેના કારણે હાલનો DA 58 ટકા પરથી વધીને 63 ટકા થઈ શકે છે. આ વધારો ફુગાવાના સમયમાં કર્મચારીઓ અને પેન્શનરો માટે મહત્વપૂર્ણ રાહત સાબિત થશે.
ઓલ ઇન્ડિયા NPS એમ્પ્લોયીઝ યુનિયનના પ્રમુખ મનજીત સિંહ પટેલના જણાવ્યા અનુસાર, કેન્દ્ર સરકાર માર્ચ મહિનાની શરૂઆતમાં હોળીના તહેવારને ધ્યાનમાં રાખીને DAમાં વધારાની જાહેરાત કરી શકે છે. જો આવું થાય તો કર્મચારીઓને એપ્રિલ મહિનાના પગાર સાથે વધેલો DA મળશે, જેમાં જાન્યુઆરી 2026થી બાકી રહેલો વધારો પણ સામેલ રહેશે.
શ્રમ અને રોજગાર મંત્રાલય દ્વારા ડિસેમ્બર મહિનાનો ઓલ ઇન્ડિયા ઇન્ડસ્ટ્રીયલ વર્કર્સ કન્ઝ્યુમર પ્રાઇસ ઇન્ડેક્સ (AICPI-IW) 148.2 પર યથાવત રાખવામાં આવ્યો છે. આ સૂચકાંકના આધારે મોંઘવારી ભથ્થાની ગણતરી કરવામાં આવે છે. સૂચકાંક સ્થિર રહેતા DAમાં 5 ટકાનો વધારો શક્ય હોવાનું માનવામાં આવી રહ્યું છે. નોંધનીય છે કે DAમાં સુધારો સામાન્ય રીતે દર વર્ષે જાન્યુઆરી અને જુલાઈમાં કરવામાં આવે છે. જુલાઈમાં DA 54 ટકાથી વધારીને 58 ટકા કરવામાં આવ્યો હતો.
8મું કેન્દ્રીય પગાર પંચ 1 જાન્યુઆરી, 2026થી અમલમાં આવ્યું હોવા છતાં, નવા પગાર માળખાને અંતિમ મંજૂરી અને નોટિફિકેશન મળ્યા સુધી 10 મિલિયનથી વધુ કેન્દ્ર સરકારી કર્મચારીઓ અને પેન્શનરો સાતમા પગાર પંચના માળખા હેઠળ જ પગાર મેળવે છે. કેન્દ્ર સરકારે ઓક્ટોબરમાં પગાર પંચના કાર્યક્ષેત્ર (TOR)ને મંજૂરી આપી હતી. પંચને તેની ભલામણો તૈયાર કરવામાં અંદાજે 18 મહિના લાગી શકે છે, જેના કારણે પગાર અને ભથ્થામાં સુધારો થવામાં થોડો સમય લાગવાની શક્યતા છે.
8મા પગાર પંચનું કાર્યાલય નવી દિલ્હીમાં શરૂ કરવામાં આવ્યું છે. પગાર સુધારણા મુદ્દે ચર્ચા માટે મુખ્ય કેન્દ્ર સરકારના કર્મચારી અને પેન્શનર સંગઠનોના પ્રતિનિધિઓ 25 ફેબ્રુઆરીએ નવી દિલ્હીમાં બેઠક યોજશે. રેલ્વે, સંરક્ષણ, ટપાલ, આવકવેરા સહિતના વિભાગોના પ્રતિનિધિઓ લઘુત્તમ વેતન, ભથ્થાં અને સેવા શરતો અંગે ચર્ચા કરશે. ચર્ચા બાદ સંયુક્ત ડ્રાફ્ટ તૈયાર કરી તેને 8મા પગાર પંચ સમક્ષ રજૂ કરવામાં આવશે.
કેન્દ્ર સરકારે તાજેતરમાં 8મા કેન્દ્રીય પગાર પંચની સત્તાવાર વેબસાઇટ www.8cpc.gov.in શરૂ કરી છે. આ વેબસાઇટ માહિતી, દસ્તાવેજો અને જાહેર ભાગીદારી માટેનું મુખ્ય મંચ બનશે. અહીં પંચના કાર્યક્ષેત્ર, માળખું, પ્રશ્નાવલીઓ અને પ્રતિસાદ માટેનું ઑનલાઇન પોર્ટલ ઉપલબ્ધ રહેશે. કર્મચારીઓ, પેન્શનરો અને અન્ય હિસ્સેદારો આ વેબસાઇટ મારફતે પોતાના સૂચનો અને અભિપ્રાયો રજૂ કરી શકશે.
ઓલ ઇન્ડિયા NPS એમ્પ્લોયીઝ ફેડરેશન દ્વારા દેશભરના લગભગ 400 જિલ્લાઓમાં રાષ્ટ્રવ્યાપી કાર્યક્રમ શરૂ કરવામાં આવ્યો છે. ફેડરેશનની માંગ છે કે 8મું પગાર પંચ 200 દિવસની અંદર પોતાનો અહેવાલ રજૂ કરે. સાથે જ, કેન્દ્રશાસિત પ્રદેશોમાં કેન્દ્ર સરકારના નિયમો સમાન રીતે લાગુ કરવામાં આવે અને રાજ્ય સરકારના કર્મચારીઓ માટે પણ મૂળભૂત પગાર તથા DA કેન્દ્ર સરકારના કર્મચારીઓની જેમ સુધારવામાં આવે તેવી માંગ ઉઠાવવામાં આવી છે. આ તમામ માંગણીઓ સાથેનું પત્ર વડા પ્રધાન કાર્યાલયને સુપરત કરવામાં આવ્યું છે.
