BHIM એપ પર લોકોનો વધતો વિશ્વાસ, 11 મહિનામાં ટ્રાન્ઝેક્શન ત્રણ ગણાથી વધુ વધ્યા
ડિજિટલ પેમેન્ટ ક્ષેત્રમાં BHIM એપની લોકપ્રિયતા ઝડપથી વધી રહી છે. છેલ્લા 11 મહિનામાં એપ પર થતા ટ્રાન્ઝેક્શન ત્રણ ગણાથી વધુ વધ્યા છે. મે 2026માં BHIM દ્વારા 26,952 કરોડ રૂપિયાના ટ્રાન્ઝેક્શન નોંધાયા હતા.
ભારતમાં ડિજિટલ પેમેન્ટનો વ્યાપ સતત વધી રહ્યો છે અને હવે BHIM એપ પણ લોકોની પ્રથમ પસંદગી બનતી જઈ રહી છે. NPCI BHIM Services Limited દ્વારા જાહેર કરાયેલા આંકડાઓ અનુસાર, છેલ્લા 11 મહિનામાં BHIM એપ પર થતા ટ્રાન્ઝેક્શનની સંખ્યામાં ત્રણ ગણાથી વધુનો વધારો નોંધાયો છે.
આંકડાઓ મુજબ, જૂન 2025 દરમિયાન BHIM એપ પર આશરે 7.96 કરોડ ટ્રાન્ઝેક્શન થયા હતા. જ્યારે મે 2026 સુધી આ સંખ્યા વધીને 24.4 કરોડ પર પહોંચી ગઈ હતી. માત્ર 11 મહિનામાં થયેલો આ વધારો દર્શાવે છે કે દેશના લોકો હવે ઝડપથી ડિજિટલ પેમેન્ટ તરફ વળી રહ્યા છે.
માત્ર ટ્રાન્ઝેક્શનની સંખ્યા જ નહીં, પરંતુ ટ્રાન્ઝેક્શનના મૂલ્યમાં પણ નોંધપાત્ર વધારો જોવા મળ્યો છે. મે 2026 દરમિયાન BHIM એપ મારફતે કુલ 26,952 કરોડ રૂપિયાના વ્યવહારો નોંધાયા હતા. આ દર્શાવે છે કે એપનો ઉપયોગ હવે માત્ર નાના પેમેન્ટ સુધી મર્યાદિત રહ્યો નથી, પરંતુ મોટા નાણાકીય વ્યવહારો માટે પણ લોકો તેનો વિશ્વાસપૂર્વક ઉપયોગ કરી રહ્યા છે.
રોજિંદા જીવનમાં ડિજિટલ પેમેન્ટનો ઉપયોગ સૌથી વધુ કરિયાણાની દુકાનો, ફૂડ આઉટલેટ્સ અને ક્વિક કોમર્સ સેવાઓમાં જોવા મળ્યો છે. મે 2026 દરમિયાન તેલંગાણામાં BHIM એપ દ્વારા થયેલા મર્ચન્ટ ટ્રાન્ઝેક્શનમાં કરિયાણાની દુકાનોનો હિસ્સો 23.9 ટકા રહ્યો હતો. ત્યારબાદ ફૂડ આઉટલેટ્સનો હિસ્સો 18.1 ટકા અને ક્વિક કોમર્સનો હિસ્સો 11.6 ટકા નોંધાયો હતો.
નિષ્ણાતોના મતે, સરળ ઉપયોગ, ઝડપી ટ્રાન્ઝેક્શન અને વધતી ડિજિટલ જાગૃતિના કારણે BHIM એપ પ્રત્યે લોકોનો વિશ્વાસ સતત વધી રહ્યો છે. દેશમાં કેશલેસ અર્થતંત્રને મજબૂત બનાવવામાં પણ BHIM એપ મહત્વની ભૂમિકા ભજવી રહી છે. આ આંકડાઓ સ્પષ્ટ કરે છે કે ભારત ડિજિટલ પેમેન્ટ ક્ષેત્રમાં ઝડપથી આગળ વધી રહ્યું છે અને BHIM એપ આ પરિવર્તનનો મહત્વપૂર્ણ ભાગ બની રહી છે.
