વસ્ત્રાપુર તળાવે ઉંદરના કારણે સુંદરતા ગુમાવી, ખાણીપીણી બજારને લઈ સર્જાઈ સમસ્યા
અમદાવાદના વસ્ત્રાપુર તળાવને સુંદર રીતે તૈયાર કરવામાં આવ્યુ હતુ. પરંતુ અહીં સમય જતા ઉંદરો વધી જતા સમસ્યા સર્જાઈ ગઈ છે. ઉંદરના સંખ્યાબંધ દર સર્જાવાને લઈ જમીનમાં પોલાણ સર્જાયા છે. જેને લીધે જમીન દબી જતી હોય છે. તો વળી વોકવેની પણ હાલત આ કારણથી ખરાબ થઈ ગઈ છે. ઉંદરની સમસ્યા વધવા પાછળનુ કારણ ખાણી પીણીનુ બજાર માનવામાં આવી રહ્યુ છે.
અમદાવાદના વસ્ત્રાપુર તળાવની હાલત દિવસે દિવસે કફોડી બની રહી છે. વસ્ત્રાપુર તળાવની ફરતે બનેલું ખાણીપીણી માર્કેટ સાંજના સમયે ધમધમતું જોવા મળે છે. પરંતુ આ ખાણીપીણી માર્કેટનો વધ્યો ઘટ્યો ખોરાક ઉંદરો માટેનું ભોજન બની રહ્યો છે.
વસ્ત્રાપુર તળાવ ડેવલોપમેન્ટ પાછળ લાખો રૂપિયાનો ખર્ચ અનેક વખત કરવામાં આવ્યો છે. પરંતુ તેમ છતાં ઉંદરોના ત્રાસના કારણે તળાવમાં ચાલવા માટે બનાવવામાં આવેલો વોકવે ની હાલત પણ દયનીય જોવા મળી રહી છે. એટલું જ નહીં ઉંદરો દ્વારા કરાયેલા દર ના કારણે જમીન પોલી થઈ ગઈ હોવાના કારણે ગમે ત્યારે જમીનનો ભાગ બેસી જાય છે.
બીજી તરફ મોર્નિંગ વોક માટે આવતા લોકો દ્વારા પશુ પક્ષીઓ માટે અલગ અલગ પ્રકારના અનાજ તેમજ વધેલો ખોરાક મૂકવામાં આવતો હોય છે. જેના કારણે સંખ્યાબંધ ઉંદરોએ વસ્ત્રાપુર તળાવને જ પોતાનું આશિયાનું બનાવી દીધું છે.
કોર્પોરેશનમાં અનેક વખત રજૂઆતો કરવામાં આવી, પરંતુ તેમ છતાં આ બાબતની સમસ્યાનું નિરાકરણ આવ્યું જ નથી. સ્થાનિકો સ્થાનિક નેતાઓ સામે નારાજગી દર્શાવી રહ્યા છે. વસ્ત્રાપુરના સ્થાનિક કોર્પોરેટર દેવાંગ દાણી હાલમાં સ્ટેન્ડિંગ કમિટીના ચેરમેન છે. તેમ છતાં પણ આ સમસ્યાનું કોઈ નિરાકરણ તેઓ લાવી શક્યા નથી. જે બાબતે પણ સ્થાનિકોમાં રોષ જોવા મળી રહ્યો છે
કોર્પોરેશનના અધિકારીઓ માટે પણ વસ્ત્રાપુર તળાવમાં ઉંદરોના ત્રાસને કેવી રીતે નિરાકરણ લાવવું તે એક મોટો પ્રશ્ન બની ગયો છે. વસ્ત્રાપુર તળાવ પર સુંદર નિર્માણ સાથે જ વિસ્તારની એક અલગ જ આગવી ઓળખ ઉભી થઈ હતી. તળાવ પર કરાયેલ સુંદર નિર્માણ કાર્યથી વિસ્તારના લોકોમાં ગૌરવ જોવા મળતુ હતુ.
Published On - 10:56 pm, Mon, 6 November 23