Heart Attack Symptoms : હાર્ટ એટેક પહેલા શરીર આપે છે આ 8 ચેતવણીના સંકેત, ભૂલથી પણ ન કરો અવગણના
આજકાલનો વધતો તણાવ, અનિયમિત ખાણીપીણી અને બેદરકાર જીવનશૈલીના કારણે યુવાનોમાં પણ હાર્ટ એટેકનું જોખમ વધી રહ્યું છે. હાર્ટ એટેક માત્ર મોટી ઉંમરના લોકોમાં જ થાય છે એવું હવે નથી. નિષ્ણાતોના મતે, હાર્ટ એટેક પહેલાં શરીર કેટલાક સંકેતો આપી શકે છે, જે થોડા કલાકો, દિવસો કે ક્યારેક અઠવાડિયા પહેલાં પણ જોવા મળી શકે છે.
ઘણા લોકો હાર્ટ એટેકના શરૂઆતના લક્ષણોને સામાન્ય થાક, ગેસ, અપચો કે માનસિક તણાવ સમજીને અવગણી દે છે. પરંતુ આ સંકેતોને સમયસર ઓળખી યોગ્ય સારવાર લેવાથી ગંભીર પરિસ્થિતિનું જોખમ ઓછું કરી શકાય છે.
હાર્ટ એટેક પહેલાં હૃદય સુધી લોહી પહોંચાડતી ધમનીઓમાં લોહીનો પ્રવાહ ધીમો પડી શકે છે. ધમનીઓમાં કોલેસ્ટ્રોલ પ્લેક અસ્થિર બની શકે છે અને લોહીનો ગઠ્ઠો બની શકે છે, જેના કારણે હૃદયને પૂરતો ઓક્સિજન ન મળતાં હાર્ટ એટેકનું જોખમ વધી જાય છે.
હાર્ટ એટેક પહેલાં છાતીમાં ભાર, દબાણ, બળતરા અથવા અજીબ પ્રકારની અસ્વસ્થતા અનુભવાઈ શકે છે. આ તકલીફ થોડા સમય માટે રહીને ઓછી થઈ શકે છે અને ફરીથી પણ થઈ શકે છે. આવા લક્ષણો દેખાય તો તેને સામાન્ય માનીને અવગણવા નહીં અને સમયસર તબીબી સલાહ લેવી જરૂરી છે.
પૂરતો આરામ કર્યા પછી પણ સતત થાક અને નબળાઈ અનુભવાય તો તેને અવગણશો નહીં. ચાલવું, સીડી ચડવી કે સામાન્ય કામ કરવામાં પણ વધુ થાક લાગતો હોય તો તે ચેતવણીનો સંકેત હોઈ શકે છે. આ પ્રકારનું લક્ષણ ખાસ કરીને મહિલાઓમાં જોવા મળી શકે છે.
હૃદય સુધી લોહી અને ઓક્સિજનનો પુરતો પુરવઠો ન પહોંચે તો શ્વાસ લેવામાં તકલીફ થઈ શકે છે. થોડું ચાલવું, સીડી ચડવી અથવા સામાન્ય કામ કરતી વખતે પણ જો શ્વાસ ચઢવા લાગે, તો તેને અવગણવું નહીં.
હાર્ટ એટેકની તકલીફ માત્ર છાતીમાં જ થાય એવું જરૂરી નથી. ખભા, હાથ, પીઠ, ગરદન, જડબા, દાંત અથવા પેટના ઉપરના ભાગમાં પણ દુખાવો કે અસ્વસ્થતા થઈ શકે છે. ઘણીવાર લોકો તેને ગેસ અથવા સામાન્ય સ્નાયુના દુખાવા સમજીને અવગણી દે છે.
અચાનક ઠંડો પરસેવો આવવો, ચક્કર, ઉબકા, ઉલટી કે બેભાન થવું હાર્ટ એટેકના સંકેત હોઈ શકે છે. ક્યારેક વ્યક્તિને કોઈ કારણ વગર બેચેની, ચિંતા અથવા કંઈક ખોટું થવાની લાગણી પણ થઈ શકે છે. ખાસ કરીને ડાયાબિટીસ, હાઈ બ્લડ પ્રેશર અથવા હાઈ કોલેસ્ટ્રોલ ધરાવતા લોકોએ આવા લક્ષણોને અવગણવા નહીં અને તાત્કાલિક તબીબી મદદ લેવી જોઈએ.
જો છાતીમાં દબાણ, શ્વાસ લેવામાં તકલીફ, વધારે પરસેવો અથવા હાથ-જડબામાં દુખાવો 5 મિનિટથી વધુ સમય રહે, તો વિલંબ કર્યા વગર તાત્કાલિક તબીબી મદદ લો. હાર્ટ એટેક પહેલાં શરીર કેટલાક સંકેતો આપી શકે છે, તેથી આ લક્ષણોને ઓળખીને સમયસર સારવાર મેળવવી ખૂબ જરૂરી છે. ( Disclaimer: આ લેખ માત્ર જાણકારી માટે છે. તેનો ઉપયોગ પુર્વે આપ આપના તબીબ અથવા તજજ્ઞોની સલાહ ખાસ લેવી જરૂરી છે. )
