સંસદના નવા બિલ્ડિંગ માટે નવસર્જન ટ્રસ્ટ મોકલશે 2,000 કિલોનો સ્પેશિયલ સિક્કો, જેના પર લખી હશે આ વાત

સંસદના નવા ભવનનું નિર્માણ જોરશોરથી ચાલી રહ્યું છે. 2022માં આ ભવન તૈયાર થવાની આશા છે. આ દરમિયાન ગુજરાતની એક માનવાધિકારી સંસ્થાએ પાર્લિયામેન્ટ બિલ્ડિંગ માટે એક અનોખો સિક્કો મોકલવાની યોજના બનાવી છે. નવસર્જન ટ્રસ્ટે રાજ્યના લોકોને પિત્તળના વાસણો અને અન્ય મેટલની ચીજો આપવાની માંગ કરી છે. આ પિત્તળના વાસણોમાંથી એક વિશેષ સિક્કો બનાવવામાં આવશે, જેના પર અસ્પુશ્યતાના વિરોધમાં એક સંદેશ લખવામાં આવશે. જેને નવી દિલ્હી મોકલવામાં આવશે અને એને નવી સંસદ બિલ્ડિંગમાં મોકલવામાં આવશે.

સિક્કા પર બાબા સાહેબની તસ્વીર

સંસ્થાના આહવાનના પ્રથમ દિવસ 500 કિલો પિત્તળના વાસણ જમા થઈ ગયા છે. સંસ્થાનું કહેવું છે કે લગભગ 2,000 કિલો પિત્તળ જમા કરવામાં આવશે. જેની મદદથી 1111 મિલિગ્રામ ડાયામીટરના એક ખાસ સિક્કાને તૈયાર કરવામાં આવશે. જેના પર લખેલું હશે કે શું અસ્પુશ્યતા મુક્ત 1947નું ભારતનું સપનું 2047માં પૂર્ણ થઈ શકશે. આ સંદેશ સાથે સિક્કા પર બાબા સાહેબ ભીમરાવ આંબેડકરની તસ્વીર હશે. આ સિક્કાને ન્યૂ પાર્લામેન્ટ બિલ્ડિંગમાં લગાવવા માટે મોકલવામાં આવશે. સંસ્થાની યોજના લોકો પાસેથી એક રૂપિયાનો સિક્કો લેવાની પણ છે.

પરંપરાનું કરાશે પાલન

સૂત્રો દ્વારા મળેલી માહિતી અનુસાર નવસર્જન ટ્રસ્ટના માર્ટિન મેકવાને કહ્યું કે સંસદ ભવનનું નવું ભવન ભવ્ય હોવું જોઈએ, પરંતુ આ નવી બિલ્ડિંગમાં શું હોવું જોઈએ તે વધુ મહત્ત્વનું છે. તેમણે કહ્યું કે આઝાદીના 75 વર્ષ પછી પણ અસ્પૃશ્યતા હયાત છે. તેથી અમારો સંદેશ એ છે કે જો આપણે એક દેશ છીએ તો આપણે એક રાષ્ટ્ર હોવું જોઈએ કારણ કે દરેક ગામ અસ્પૃશ્યતાને કારણે બે રાષ્ટ્રોમાં વહેંચાયેલું છે.

તેમણે કહ્યું કે આપણો દેશ સાંસ્કૃતિક પરંપરાથી ચાલે છે અને જ્યારે પણ આપણે આ પરંપરા હેઠળ નવી ઈમારત બનાવીએ છીએ, ત્યારે આપણે તેના પાયામાં પિત્તળની વસ્તુ શાંતિ અને સમૃદ્ધિ માટે મૂકીએ છીએ. તેથી જ અમે નવી સંસદ ભવનના પાયામાં 2000 કિલોગ્રામ પિત્તળનો સિક્કો મૂકવા માગીએ છીએ.

ઓગસ્ટમાં 2022 પહોંચશે દિલ્હી

નવસર્જન ટ્રસ્ટ દ્વારા સંસદ ભવન માટે 1 રૂપિયાનો સિક્કો દાન આપવાની ઝુંબેશ પણ શરૂ કરવામાં આવી છે. લોકો સ્વેચ્છાએ એક રૂપિયાનો સિક્કો દાન કરશે. તેને પણ સંસદ ભવનમાં મોકલવામાં આવશે. માર્ટીન મેકવાને કહ્યું કે સંસદે દરેક ભારતીયનું એકમાત્ર રાજકીય અને નૈતિક મંદિર છે, જે ભારતના બંધારણમાં નોંધાયેલા તમામ નાગરિકોના હકોનું રક્ષણ કરે છે. તેમના જણાવ્યા મુજબ 2000 કિલોનો સિક્કો આગામી ત્રણ મહિનામાં તૈયાર થઈ જશે.

તેને 15 ઓગસ્ટ 2022 સુધીમાં નવી દિલ્હી લઈ જવામાં આવશે. આ સાથે એક કરોડ રૂપિયાના મુલ્યનો એક રૂપિયાનો સિક્કો પણ મોકલવામાં આવશે. તે સંસદ ભવનના નવા મકાનમાં સ્થાપિત કરવાની વાત પણ કરવામાં આવી છે. મળેલી માહિતી અનુસાર બીજી કેટલીક સ્વૈચ્છિક સંસ્થાઓ ઉત્તર પ્રદેશ, ઝારખંડ, ઉત્તરાખંડ, પશ્ચિમ બંગાળ, રાજસ્થાન, મધ્યપ્રદેશ, છત્તીસગઢ, મહારાષ્ટ્ર અને તામિલનાડુમાં પણ આ કાર્યક્રમો ચલાવવામાં આવી રહ્યા છે.

આ પણ વાંચો: Devbhumi Dwarka: દ્વારકાના જગતમંદિરને મળ્યું વર્લ્ડ અમેઝિંગ પેલેસનું સન્માન