ગોવામાં RSS કો-ઓર્ડિનેશન બેઠક, BJP-ABVPના નેતાઓ પણ હાજરી આપશે

રાષ્ટ્રીય સ્વયંસેવક સંઘ (RSS) ગોવામાં એક સંકલન બેઠકનું આયોજન કરવા જઈ રહ્યું છે. આ બેઠક 5-6 જાન્યુઆરી વચ્ચે યોજાશે, જેમાં સંગઠનના પદાધિકારીઓ, સંલગ્ન સંગઠનો અને ભારતીય જનતા પાર્ટી (BJP)ના વરિષ્ઠ નેતાઓ ભાગ લેશે. આરએસએસ આ વર્ષે સપ્ટેમ્બરમાં રાયપુરમાં આયોજિત અખિલ ભારતીય કાર્યકારી બેઠકમાં ચર્ચા કરવામાં આવેલા મુદ્દાઓ પર પ્રગતિની સમીક્ષા પણ કરશે.

આ બેઠકમાં આરએસએસના સરસંઘચાલક મોહન ભાગવત, સરકારવાહ દત્તાત્રેય હોસાબલે, વિશ્વ હિન્દુ પરિષદ (વીએચપી)ના મહાસચિવ મિલિંદ પરાંડે, અખિલ ભારતીય વિદ્યાર્થી પરિષદ (એવીબીપી)ના રાષ્ટ્રીય સંગઠન સચિવ આશિષ ચૌહાણ, બી સુરેન્દ્રન અને સંઘના અખિલ ભારતીય પદાધિકારીઓ હાજર રહેશે. આ બેઠકમાં ભાજપના રાષ્ટ્રીય મહાસચિવ (સંગઠન) બીએલ સંતોષ પણ હાજરી આપશે. આ ઉપરાંત વિદ્યા ભારતી, ભારતીય કિસાન સંઘ અને અન્ય સંસ્થાઓના વરિષ્ઠ અધિકારીઓ પણ સંકલન બેઠકમાં ભાગ લેશે.

ભાગવત 2 થી 7 જાન્યુઆરી સુધી ગોવામાં રહેશે

આરએસએસના જણાવ્યા અનુસાર, સરસંઘચાલક મોહન ભાગવત 2 થી 7 જાન્યુઆરી સુધી ગોવામાં રહેશે. RSSના અખિલ ભારતીય પ્રચાર પ્રમુખ સુનીલ આંબેકરે એક નિવેદનમાં જણાવ્યું હતું કે ગયા સપ્ટેમ્બરમાં છત્તીસગઢની રાજધાની રાયપુરમાં સંઘની મુખ્ય અખિલ ભારતીય સમન્વય બેઠક યોજાઈ હતી. હવે છત્તીસગઢની બેઠકની સમીક્ષા તરીકે 5 થી 6 જાન્યુઆરી વચ્ચે ગોવામાં બેઠક યોજાઈ રહી છે.

રાયપુરમાં આ મુદ્દાઓ પર ચર્ચા કરવામાં આવી હતી

સપ્ટેમ્બરમાં છત્તીસગઢના રાયપુરમાં આયોજિત ત્રણ દિવસીય કો-ઓર્ડિનેશન બેઠકમાં અનેક મુદ્દાઓ પર ચર્ચા કરવામાં આવી હતી. બેઠકમાં જીડીપીને બદલે રોજગારલક્ષી સમાવિષ્ટ ન્યુ ઈકોનોમિક ઈન્ડિયા ઈન્ડેક્સની તૈયારી, જૈવિક ખેતીને પ્રોત્સાહન, કૃષિ શિક્ષણમાં ફેરફાર તેમજ ભારતીય શૈક્ષણિક સંસ્થાઓમાં હિન્દુત્વને લગતા અભ્યાસક્રમો તૈયાર કરવા અંગે પણ ચર્ચા થઈ હતી. આ સાથે અદાલતોની કાર્યવાહી અને નિર્ણયોમાં ભારતીય ભાષાઓને પ્રોત્સાહન આપવા પર પણ ચર્ચા કરવામાં આવી હતી.