Budget Session of Parliament : એક સપ્તાહ પહેલા શરૂ થયેલા સંસદના બજેટ સત્રમાં કોઈ મુદ્દા પર ચર્ચા થઈ નથી. રાષ્ટ્રપતિના અભિભાષણ પર આભાર પ્રસ્તાવ પર બંને ગૃહમાં ચર્ચા થવાની હતી. પરંતુ વિપક્ષના હોબાળાને કારણે કાર્યવાહી ઘણી વખત સ્થગિત કરવી પડી હતી. આજે એટલે કે સોમવારે ફરી એકવાર સંસદની કાર્યવાહી શરૂ થવા જઈ રહી છે. આવી સ્થિતિમાં તમામની નજર સંસદની કાર્યવાહી પર ટકેલી છે.
બજેટ રજૂ થયું ત્યારથી જ વિપક્ષ અદાણી કેસની JPC એટલે કે સંયુક્ત સંસદીય સમિતિ દ્વારા તપાસ કરાવવાની માગણી પર અડગ છે. કોંગ્રેસે આરોપ લગાવ્યો કે કેન્દ્ર સરકારનુ મૌન અદાણી કેસમાં મિલીભગત હોવાની શંકા પ્રેરે છે. યુએસ સ્થિત ફાઇનાન્શિયલ રિસર્ચ ફર્મ હિંડનબર્ગ રિસર્ચ દ્વારા ગૌતમ અદાણીની આગેવાની હેઠળના ગ્રૂપ પર છેતરપિંડી અને શેરના ભાવમાં હેરાફેરી સહિતના અનેક ગંભીર આરોપો મૂક્યા બાદ, અદાણી જૂથના શેરના ભાવમાં તીવ્ર ઘટાડો થયો છે.
શિવસેનાના નેતા સંજય રાઉતે કહ્યું કે, દેશને ડૂબાવવા માટે જે મામલો સામે આવ્યો છે તેના પર તમામ વિરોધ પક્ષો સાથે બેસીને ચર્ચા કરશે, પરંતુ મને લાગે છે કે જ્યાં સુધી સરકાર જવાબ નહીં આપે ત્યાં સુધી આ મામલે જેપીસીની માંગ રહેશે. અમારી આ માંગણી ચાલુ રહેશે.
Published On - 10:28 am, Mon, 6 February 23