હાથરસમાં ખુલ્લેઆમ ગુંડાગીરી, પુત્રી સાથે છેડતીની ફરિયાદ કરનાર પિતાની કરાઇ હત્યા
ઉત્તરપ્રદેશના હાથરસના એક ગામમાં પુત્રી સાથે થયેલી છેડતીની ફરિયાદ નોંધાવનાર પિતાની ગોળી મારીને હત્યા કરી નાખવામાં આવી છે.
ઉત્તરપ્રદેશના હાથરસના એક ગામમાં પુત્રી સાથે થયેલી છેડતીની ફરિયાદ નોંધાવનાર પિતાની ગોળી મારીને હત્યા કરી નાખવામાં આવી છે. ઉત્તરપ્રદેશના હાથરસમાં વારંવાર આવી ઘટનાઓ સામે આવતી હોય છે, જેને કારણે ઉત્તરપ્રદેશની સુરક્ષા વ્યવસ્થા અને પોલીસ પ્રશાસન ઉંઘતુ હોય તેમ જણાય છે. અહીં ગુંડાગીરી એટલા પ્રમાણમાં વધી ચુકી છે કે હવે ફરિયાદી પણ સુરક્ષિત નથી. મળતી માહિતી અનુસાર ઓરોપી છેડતીનો કેસ પાછો લેવા માટે ફરિયાદીને દબાણ કરી રહ્યો હતો. મૃતકની પુત્રીએ કુલ 6 લોકો સામે ફરિયાદ નોંધાવી છે, જેમાંથી એકની ધરપકડ કરી લેવામાં આવી છે.
તમને જણાવી દઇએ કે ફરિયાદી પિતા ખેતરમાં કામ કરી રહ્યો હતો, ત્યારે આરોપી ગૌરવ પોતાના ત્રણ મિત્રો સાથે ત્યાં આવી પહોંચ્યો અને અમરીશ પર ફાયરિંગ કર્યુ. ઘાયલ અમરીશને તરત જ હોસ્પિટલ લઇ જવાયો, પરંતુ ત્યાં ડોકટરોએ તેને મૃત જાહેર કર્યો હતો. અમરીશે 16 જુલાઇએ ગૌરવ શર્મા વિરુદ્ધ પોતાની દીકરીની છેડતી કરવા બદલ ફરિયાદ નોંધાવી હતી. ફરિયાદ બાદ ગૌરવ થોડાં દિવસો જેલમાં પણ રહ્યો હતો. જામીન પર બહાર આવ્યા બાદ તે અમરીશ પર કેસ પરત ખેંચવા સતત દબાણ કરી રહ્યો હતો.