નીતા અંબાણીએ કર્યો ‘અનંત આશ્રય’નો શિલાન્યાસ! 5,000થી વધુ અનાથો, વડીલો અને દિવ્યાંગોને મળશે ઘર
મહારાષ્ટ્રના કરજતમાં લગભગ 100 એકરમાં વિસ્તરેલું આ સંકુલ 5000થી વધુ અનાથો, વડીલો અને દિવ્યાંગ વ્યક્તિઓને ઘર જેવું વાતાવરણ અને સંભાળ પૂરી પાડશે. આ શિલાન્યાસ સમારોહમાં ઈશા અંબાણી પણ ઉપસ્થિત રહ્યાં હતાં.
રિલાયન્સ ફાઉન્ડેશન અનાથો, વડીલો અને દિવ્યાંગ વ્યક્તિઓ માટે 100 એકરમાં ફેલાયેલું એક રહેણાંક સંકુલ (રેસિડેન્શિયલ કોમ્પ્લેક્સ) બનાવવા જઈ રહ્યું છે. આ જાહેરાત રવિવારે રિલાયન્સ ફાઉન્ડેશનના સ્થાપક અને ચેરપર્સન નીતા અંબાણી દ્વારા કરવામાં આવી હતી. ‘નીતા મુકેશ અંબાણી અનંત આશ્રય’ નામનું આ સંકુલ 5000થી વધુ જરૂરિયાતમંદ લોકોને ઘર પૂરું પાડશે. રવિવારે આ સુવિધા માટે ભૂમિ પૂજન (શિલાન્યાસ વિધિ) સંપન્ન થયું હતું.
અનંત આશ્રય’નો શિલાન્યાસ
મહારાષ્ટ્રના કરજતમાં લગભગ 100 એકરમાં વિસ્તરેલું આ સંકુલ 5000થી વધુ અનાથો, વડીલો અને દિવ્યાંગ વ્યક્તિઓને ઘર જેવું વાતાવરણ અને સંભાળ પૂરી પાડશે. આ શિલાન્યાસ સમારોહમાં ઈશા અંબાણી પણ ઉપસ્થિત રહ્યાં હતાં. રિલાયન્સ ફાઉન્ડેશનની આ એક બિન-લાભકારી (નોન-પ્રોફિટ) પહેલ છે અને જરૂરી મંજૂરીઓ મળ્યા બાદ, આ સંકુલનું નિર્માણ તબક્કાવાર કરવામાં આવશે.
ઉલ્લેખનીય છે કે, નીતા અંબાણીએ તેમના જન્મદિવસ (1લી નવેમ્બર) નિમિત્તે આ પહેલનો શિલાન્યાસ કર્યો હતો. પોતાના સંબોધનમાં તેમણે આ પ્રોજેક્ટને એક માતા તરફથી ‘ભારત માતા’ને અર્પણ કરવામાં આવેલી એક નાનકડી ભેટ ગણાવી હતી. શિલાન્યાસ સમારોહમાં બોલતા નીતા અંબાણીએ જણાવ્યું હતું કે ‘અનંત આશ્રય’ તેમના અને તેમના પરિવારના હૃદયની ખૂબ નજીક છે.
અનાથ બાળકોને, વડીલો અને દિવ્યાંગોને મળશે આશ્રય
તેમણે કહ્યું, “એક માતા તરીકે, મારી સૌથી મોટી ઈચ્છા એ છે કે એવા માતા-પિતા જેઓ હંમેશા ચિંતા કરતા હોય છે કે તેમના ગયા પછી તેમના બાળકોની સંભાળ કોણ રાખશે. તેમને એવો ભરોસો મળે કે તેમના બાળકો પાસે હંમેશા પોતાનું ઘર અને પોતાનો પરિવાર હશે.” અહીં તેમને એવો જ પ્રેમ મળશે, જેવો તેમને તેમના પોતાના પરિવારમાં મળતો હોય છે.
તેમણે આશા વ્યક્ત કરી કે અહીં દરેક ઉંમરની વ્યક્તિઓને ગરિમાપૂર્ણ જીવન જીવવાની તક મળશે અને તેઓ આશાની ભાવના સાથે દરેક નવા દિવસની રાહ જોઈ શકશે. ‘અનંત આશ્રય’ની કલ્પના માત્ર એક આશ્રયસ્થાન તરીકે જ નહીં, પરંતુ એક એવા સમુદાય તરીકે કરવામાં આવી છે જ્યાં દરેક વ્યક્તિને સન્માન અને પોતાનાપણાની લાગણીનો અનુભવ થાય. આ સંકુલમાં નાના, પારિવારિક શૈલીના ઘરો હશે, જ્યાં સમર્પિત કર્મચારીઓ રહેવાસીઓની સંભાળ રાખશે.
આરોગ્યસંભાળ, શિક્ષણ અને વ્યક્તિગત વિકાસની ખાસ યોજના
દરેક વ્યક્તિની વિશિષ્ટ જરૂરિયાતોને ધ્યાનમાં રાખીને તેમના માટે આરોગ્યસંભાળ, શિક્ષણ અને વ્યક્તિગત વિકાસની ખાસ યોજનાઓ તૈયાર કરવામાં આવશે. આ સમુદાયને ડોક્ટરો, શિક્ષકો અને અન્ય નિષ્ણાતો સહિતના વ્યાવસાયિકોની એક ટીમનો સહયોગ મળશે. અંદાજ છે કે સમય જતાં આ સમુદાયમાં લગભગ 15,000 લોકો વસવાટ કરશે.
આ પ્રસ્તાવિત સંકુલમાં વિશિષ્ટ હોસ્પિટલો, પુનર્વસન કેન્દ્રો, ફિઝિયોથેરાપી યુનિટ્સ અને અન્ય તબીબી સુવિધાઓ હશે; સાથે જ અહીં શિક્ષણ, રમતગમત, સંગીત અને કલા માટેની તકો પણ ઉપલબ્ધ હશે. બેકરી, કાફે અને હસ્તકલા કેન્દ્રો દ્વારા રોજગાર અને કૌશલ્ય વિકાસની પહેલને પ્રોત્સાહન આપવામાં આવશે.
આ પરિસરમાં એક મંદિર, બગીચાઓ અને ‘વંતારા’ (Vantara) ના સહયોગથી વિકસાવવામાં આવેલ એક ફાર્મ (ખેતર) પણ હશે, જેનો ઉદ્દેશ્ય પ્રાણીઓ સાથેના સંપર્ક અને સંવાદને પ્રોત્સાહન આપવાનો છે. આસપાસના ગામોના રહેવાસીઓ પણ આમાંથી કેટલીક સુવિધાઓનો લાભ લઈ શકશે. રિલાયન્સ ફાઉન્ડેશનના જણાવ્યા અનુસાર, આ સંકુલમાં વ્યવસાયિક તાલીમ અને કૌશલ્ય નિર્માણના વિવિધ કાર્યક્રમો ચલાવવામાં આવશે, જેમાં બેકરી સંચાલન, કાફે મેનેજમેન્ટ અને અન્ય વ્યાવસાયિક ક્ષેત્રોની તાલીમનો સમાવેશ થાય છે.
