Breaking News : ઈરાન સંકટ વચ્ચે હવાઈ મુસાફરી થઈ મોંઘી, એર ઈન્ડિયાએ ફ્યુઅલ સરચાર્જ વધાર્યો

મધ્ય પૂર્વમાં વધતી તણાવપૂર્ણ પરિસ્થિતિ વચ્ચે હવાઈ મુસાફરી વધુ મોંઘી બનવાની શક્યતા વધી છે. વધતા ઉડ્ડયન ઇંધણના ભાવને ધ્યાનમાં રાખીને એર ઇન્ડિયા ગ્રુપે તેની ફ્લાઇટ્સ પર ઇંધણ સરચાર્જ વધારવાનો નિર્ણય લીધો છે. આ નિર્ણયના કારણે એર ઇન્ડિયા અને એર ઇન્ડિયા એક્સપ્રેસની સ્થાનિક તેમજ આંતરરાષ્ટ્રીય ફ્લાઇટ્સની ટિકિટો મોંઘી થશે.

એરલાઇન દ્વારા જણાવવામાં આવ્યું છે કે મધ્ય પૂર્વમાં ચાલી રહેલી કટોકટીના કારણે ઉડ્ડયન ઇંધણ (ATF)ના ભાવમાં નોંધપાત્ર વધારો થયો છે. સામાન્ય રીતે એરલાઇન્સના કુલ ખર્ચમાં ઇંધણનો હિસ્સો લગભગ 40 ટકા જેટલો હોય છે. ભારત જેવા દેશમાં ATF પર લાગતી ઊંચી એક્સાઇઝ ડ્યુટી અને VATને કારણે એરલાઇનના ખર્ચમાં વધુ વધારો થાય છે. આ વધતા ખર્ચનો સામનો કરવા માટે એર ઇન્ડિયા ગ્રુપે ઇંધણ સરચાર્જ વધારવાનો નિર્ણય કર્યો છે.

મધ્ય પૂર્વ માટે $10નો સરચાર્જ

આ સરચાર્જનો વધારો એકસાથે લાગુ કરવામાં નહીં આવે, પરંતુ તેને ત્રણ તબક્કામાં અમલમાં મુકવામાં આવશે. પ્રથમ તબક્કો 12 માર્ચથી અમલમાં આવશે અને તે નવી બુકિંગ પર લાગુ થશે. આ તબક્કામાં ઘરેલુ ફ્લાઇટ્સ અને સાર્ક દેશો માટે ₹399નો સરચાર્જ લાગુ કરવામાં આવશે. પશ્ચિમ એશિયા અથવા મધ્ય પૂર્વ માટે $10નો સરચાર્જ રહેશે.

દક્ષિણપૂર્વ એશિયા માટેનો સરચાર્જ $40થી વધારીને $60 કરવામાં આવશે, જ્યારે આફ્રિકા માટેનો સરચાર્જ $60થી વધારીને $90 કરવામાં આવશે. સિંગાપોર રૂટ પર અત્યાર સુધી કોઈ સરચાર્જ નહોતો, પરંતુ પ્રથમ તબક્કાથી ત્યાં પણ સરચાર્જ લાગુ થશે.

બીજો તબક્કો 18 માર્ચથી અમલમાં આવશે. આ તબક્કામાં યુરોપ માટેનો સરચાર્જ $100થી વધારીને $125 કરવામાં આવશે. ઉત્તર અમેરિકા અને ઓસ્ટ્રેલિયા માટેનો સરચાર્જ $150થી વધારીને $200 કરવામાં આવશે.

ત્રીજા તબક્કામાં હોંગકોંગ, જાપાન અને દક્ષિણ કોરિયા માટેના સરચાર્જ અંગેની જાહેરાત બાદમાં કરવામાં આવશે. જોકે, 12 અને 18 માર્ચ પહેલા બુક કરાયેલી ટિકિટો પર નવા સરચાર્જ લાગુ નહીં થાય. પરંતુ જો મુસાફરો ટિકિટની તારીખ અથવા રૂટમાં ફેરફાર કરે છે, તો નવી ભાડાની સાથે સરચાર્જ પણ લાગુ થઈ શકે છે.

એરલાઇનનું કહેવું છે કે ઉડ્ડયન ઇંધણના ભાવમાં થયેલા વધારાને ધ્યાનમાં રાખીને આ પગલું ભરવું જરૂરી બન્યું છે. નહીં તો કેટલીક ફ્લાઇટ્સનું સંચાલન કરવું એરલાઇન માટે મુશ્કેલ બની શકે છે.