લોહગઢ પુણે હત્યાકાંડમાં અગ્રવાલ પરિવાર પર આભ તૂટ્યું, પૌત્ર કેતનની ક્રૂર હત્યાના આઘાતમાં દાદા દેવીચંદનું પણ કરૂણ મોત !

પુણેના લોહગઢ કિલ્લામાં થયેલા કથિત હત્યાકાંડથી મહારાષ્ટ્ર હચમચી ગયું હતું. ત્યારે હવે અગ્રવાલ પરિવાર પર શોકનો પહાડ તૂટી પડ્યો છે. લોહગઢ કિલ્લામાંથી ધક્કો મારીને હત્યા કરાયેલા 25 વર્ષીય ઉદ્યોગપતિ કેતન અગ્રવાલના દાદા દેવીચંદ અગ્રવાલનું પણ સારવાર દરમિયાન પુણેમાં અવસાન થયું છે. સૂત્રો અનુસાર કહેવામાં આવી રહ્યું છે કે પૌત્રની અકાળ અને ક્રૂર મૃત્યુના આઘાતને સહન ન કરી શકવાના કારણે તેમનું અવસાન થયું છે.

પૌત્રની હત્યાથી લાગ્યો ભારે આઘાત

સૂત્રો અનુસાર, દેવીચંદ અગ્રવાલ છેલ્લા કેટલાક સમયથી બીમાર હતા. થોડા દિવસો પહેલા તેમના પર મોટી હૃદયની સર્જરી સફળતાપૂર્વક કરવામાં આવી હતી. જોકે સર્જરી પછી તેમની તબિયતમાં સુધારો થઈ રહ્યો હતો. ત્યારે જ 18 જૂનના રોજ તેમના પૌત્ર કેતન અગ્રવાલની લોહગઢ કિલ્લા પરથી ધક્કો મારીને હત્યા કરવામાં આવી હતી.

કેન્ડલ માર્ચમાં ભાવુક થયા હતા કેતનના દાદા

કેતનના આ દુઃખદ સમાચારથી તેના દાદા દેવીચંદ અગ્રવાલને ભારે માનસિક આઘાત લાગ્યો હોવાનું પરિવારજનો જણાવે છે. તાજેતરમાં યોજાયેલા કેન્ડલ માર્ચમાં પણ તેઓ ખૂબ જ ભાવુક થઈ ગયા હતા. તેમણે આરોપીઓને ફાંસીની સજા આપવાની માંગ પણ કરી હતી.

બે દિવસથી વેન્ટિલેટર પર સારવાર હેઠળ હતા

પૌત્રના મૃત્યુના ભારે શોક અને આઘાતને કારણે દેવીચંદ અગ્રવાલની હાલત અચાનક બગડી ગઈ હતી. તેથી બે દિવસ પહેલા તેમને તાત્કાલિક પુણેની એક પ્રખ્યાત ખાનગી હોસ્પિટલમાં દાખલ કરવામાં આવ્યા હતા. તેમની હાલત ખૂબ જ નાજુક હોવાથી, તેમને ICUમાં વેન્ટિલેટર પર રાખવામાં આવ્યા હતા અને નિષ્ણાત ડોકટરોની દેખરેખ હેઠળ તેમની સારવાર ચાલી રહી હતી. જોકે, ડોકટરોના શ્રેષ્ઠ પ્રયાસો છતાં તેમનું સારવાર દરમિયાન મૃત્યુ થયું. એક જ મહિનામાં પરિવારમાં યુવાન પુત્ર અને વડીલ બંનેના અવસાનથી અગ્રવાલ પરિવાર ખૂબ જ ભાંગી પડ્યો છે.

શું છે લોહગઢ કિલ્લા હત્યાકાંડ ?

પુણેના પ્રખ્યાત ઉદ્યોગપતિ કેતન અગ્રવાલ (ઉંમર 25 વર્ષ) 18 જૂનના રોજ લોહગઢ કિલ્લા પરથી ખીણમાં પડી જવાથી મૃત્યુ પામ્યો હતો. શરૂઆતમાં તે અકસ્માત લાગતો હતો. પરંતુ પોલીસ તપાસમાં જાણવા મળ્યું કે તે એક પૂર્વયોજિત હત્યા હતી. પોલીસે આરોપ લગાવ્યો છે કે કેતનની ભાવિ પત્ની સિયા ગોયલ (ઉંમર 20) અને તેના બોયફ્રેન્ડ ચેતન ચૌધરી (ઉંમર 22) એ નવેમ્બરમાં થયેલા લગ્ન તોડવા માટે કેતનને કિલ્લામાંથી ધકેલી દીધો હતો. પુણે ગ્રામીણ પોલીસે આ કેસમાં બંનેની ધરપકડ કરી છે.

આ પણ વાંચો, Ketan Agrawal Murder Case : સિયા-ચેતનને ન્યાયિક કસ્ટડી, શું હત્યાનું કાવતરું કોડેડ ભાષામાં રચાયું? ફોનમાંથી મળ્યા ગુપ્ત સંકેતો !