Breaking News: વિજયાદશમી પર મોહન ભાગવતનો સંદેશ-નવી પેઢીએ ડ્રગ્સથી દૂર રહેવું જોઈએ, OTT કન્ટેન્ટ પર નિયંત્રણની જરૂર

મહારાષ્ટ્રના નાગપુરમાં રાષ્ટ્રીય સ્વયંસેવક સંઘ (RSS) દ્વારા વિજયાદશમી નિમિત્તે આયોજિત કાર્યક્રમમાં સરસંઘચાલક ડૉ. મોહન ભાગવતે નવી પેઢી, ડ્રગ્સના વધતા વ્યસન અને OTT પ્લેટફોર્મ પર પ્રસારિત થતી સામગ્રી અંગે ચિંતા વ્યક્ત કરી હતી. શસ્ત્રપૂજા બાદ સંબોધન કરતાં તેમણે કહ્યું કે દેશની સ્વતંત્રતા જાળવવા અને તેને વધુ મજબૂત બનાવવા માટે તપસ્યા, સમર્પણ અને જવાબદારીની જરૂર છે. તેમણે નવી પેઢીને ડ્રગ્સથી દૂર રહેવાની અપીલ કરવાની સાથે સરકાર અને વહીવટીતંત્રને પણ આ દિશામાં ગંભીરતાથી વિચારવા જણાવ્યું હતું.

ડ્રગ્સ જીવલેણ છે, ગંભીર રાષ્ટ્રીય સમસ્યા બની ગઈ છે: ભાગવત

મોહન ભાગવતે જણાવ્યું હતું કે ડ્રગ્સનું વ્યસન માત્ર વ્યક્તિ પૂરતી મર્યાદિત સમસ્યા નથી, પરંતુ તે પરિવાર અને સમગ્ર સમાજને અસર કરતી ગંભીર રાષ્ટ્રીય સમસ્યા બની ગયું છે. ડ્રગ્સ જીવલેણ હોવા છતાં તેની લત લોકોને પોતાની તરફ ખેંચે છે, જે ચિંતાજનક છે. તેમણે ભાર મૂક્યો કે નવી પેઢીએ નશીલા પદાર્થોથી દૂર રહેવાની આદત કેળવવી જોઈએ. માતા-પિતાએ પણ બાળકોમાં યોગ્ય સમજણ અને સારા સંસ્કારો વિકસાવવા માટે સક્રિય ભૂમિકા ભજવવી જોઈએ. સરકાર સહિત સમાજના તમામ વર્ગોએ આ સમસ્યાનો સમયસર ઉકેલ લાવવા માટે પ્રયાસ કરવા જોઈએ.

OTT કન્ટેન્ટ અંગે સરકાર અને વહીવટીતંત્રે વિચારવું જોઈએ

OTT પ્લેટફોર્મ પર ઉપલબ્ધ સામગ્રી અંગે ચિંતા વ્યક્ત કરતાં ભાગવતે કહ્યું કે આજની નવી પેઢી વિવિધ માધ્યમોમાંથી મળતી માહિતી અને સામગ્રીને હંમેશાં સાચા-ખોટાના ભેદ સાથે સમજી શકતી નથી. આવી સામગ્રીની વિપરીત અસરો સામે આવ્યા બાદ કેટલાક દેશોએ ચોક્કસ શિસ્ત અને નિયંત્રણો લાગુ કર્યાં છે. ભારતે પણ OTT પ્લેટફોર્મની સામગ્રી અંગે આવી જરૂરિયાત પર વિચાર કરવો જોઈએ. તેમના મતે, સરકાર અને વહીવટીતંત્રે આ દિશામાં યોગ્ય અભિગમ અપનાવવાની જરૂર છે.

તેમણે વધુમાં કહ્યું કે જો પ્રશ્ન દેશનાં મૂલ્યો અને નવી પેઢીના ઘડતરનો હોય, તો યુવાનોને શું જોવું અને શું ટાળવું તેની સમજ આપવી જરૂરી છે. યોગ્ય-અયોગ્ય વચ્ચે ભેદ પારખવાની ક્ષમતાના અભાવે વ્યક્તિગત જીવનથી લઈને પારિવારિક અને સામાજિક જીવન સુધી નકારાત્મક અસરો જોવા મળી શકે છે.

ટેક્નોલોજી સાધન છે, વિકાસમાં સંતુલન જરૂરી

વિજ્ઞાન અને ટેક્નોલોજીના વિકાસ અંગે વાત કરતાં RSS વડાએ જણાવ્યું કે ટેક્નોલોજી માનવીને ભૌતિક સુખ-સુવિધાઓ પૂરી પાડવાની સાથે જ્ઞાન અને તર્કના આધારે જીવનને વધુ સારું બનાવવામાં મદદ કરી શકે છે. જોકે, ટેક્નોલોજીને માત્ર સુવિધા મેળવવાનું સાધન માનીને ઉપભોક્તાવાદી અભિગમથી વિકાસ કરવામાં આવે તો તેના ગંભીર નુકસાન પણ થઈ શકે છે. તેથી વિકાસની સાથે માનવીય મૂલ્યો, નૈતિકતા અને સામાજિક જવાબદારી જાળવવી જરૂરી છે.

સંગઠિત સમાજ અને રાષ્ટ્રીય એકતા પર ભાર

મોહન ભાગવતે કહ્યું કે RSS હિન્દુ સમાજમાં જાગૃતિ લાવવા અને તેને સંગઠિત તથા સશક્ત બનાવવા માટે કાર્ય કરી રહ્યું છે. તેમના મતે, વ્યક્તિથી લઈને વૈશ્વિક સ્તર સુધી માન-સન્માન, પ્રતિષ્ઠા અને સુરક્ષા માટે શક્તિ જરૂરી છે. તેમણે સ્પષ્ટ કર્યું કે સંગઠિત અને સશક્ત હિન્દુ સમાજની વાત કરવી એ અન્ય ધર્મો પ્રત્યે આદર રાખવાની કે રાષ્ટ્રીય એકતાની ભાવનાની વિરુદ્ધ નથી. તેમણે દાવો કર્યો કે હિન્દુ સમાજની વિચારધારા અને પ્રકૃતિ સર્વસમાવેશી છે અને સંઘનું કાર્ય સમાજમાં ભાવનાત્મક એકતા, સદ્ભાવના તથા સદાચારને પ્રોત્સાહન આપવાનું છે.

કેપ્ટન સ્મિત માછરનો ઉલ્લેખ કરી યુવાનોને પ્રેરણાની વાત

પોતાના સંબોધનમાં ભાગવતે કેપ્ટન સ્મિત માછરનો ઉલ્લેખ કરતાં જણાવ્યું કે પેઢી દર પેઢી આગળ વધતાં સંસ્કાર અને મૂલ્યો વ્યક્તિને માનવતાની સેવા માટે પ્રેરિત કરે છે. તેમણે કેપ્ટન સ્મિત માછરને માનવતાના રક્ષણ માટે પોતાના જીવના જોખમે સમર્પિત થવાની ભાવનાના પ્રેરણારૂપ ઉદાહરણ તરીકે રજૂ કર્યા હતા. તેમના સંબોધનનો મુખ્ય સંદેશ નવી પેઢીમાં જવાબદારી, નૈતિક મૂલ્યો, રાષ્ટ્રીય ભાવના અને સામાજિક જાગૃતિ વિકસાવવાનો રહ્યો હતો.

આ પણ વાંચો- India-New Zealand FTA: દશેરા પર દેશને મોટી ભેટ! FTA લાગુ થતા કપડા, દવાઓથી લઈને આ વસ્તુઓ પર 0 ડ્યુટી