અમૂલ દૂધના ભાવમાં વધારોઃ અમૂલે ફરી એકવાર સામાન્ય લોકોને આંચકો આપીને તેમનું બજેટ બગાડ્યું છે. અમૂલે ફરી એકવાર દૂધના ભાવમાં વધારો કર્યો છે. જો કે આ ભાવ વધારો હાલ ગુજરાતમાં લાગુ નહી થાય. અમૂલે કરેલો દૂઘના ભાવનો વધારો મહારાષ્ટ્ર, દિલ્હી અને કોલકત્તામાં લાગુ પડશે. અમૂલે ફુલ ક્રીમ દૂધના ભાવમાં 3 રૂપિયાનો વધારો કર્યો છે. તો ભેંસના દૂધના ભાવમાં પાંચ રૂપિયાનો વધારો કર્યો છે. હવે ફુલ ક્રીમ દૂધ 63 રૂપિયાને બદલે 66 રૂપિયા પ્રતિ લિટર આપવામાં આવશે. જ્યારે ભેંસના દૂધના ભાવમાં પ્રતિ લીટર 5 રૂપિયાનો વધારો કરીને 65 રૂપિયાથી 70 રૂપિયા પ્રતિ લીટર કરવામાં આવ્યો છે. અમૂલ દહીં અને અન્ય દૂધની પેદાશોના ભાવમાં પણ વધારો કરવામાં આવ્યો છે.
ગુજરાત કોઓપરેટિવ મિલ્ક માર્કેટિંગ ફેડરેશન લિમિટેડ, જે અમૂલ તરીકે જાણીતું છે, તેણે જાહેરાત કરી છે કે તેણે દૂધના ભાવમાં પ્રતિ લિટર રૂ. 3 સુધીનો વધારો કર્યો છે. કિંમતોમાં ફેરફાર બાદ અમૂલ ગોલ્ડના નવા ભાવ 66 રૂપિયા પ્રતિ લીટર થશે. મિલ્ક માર્કેટિંગ ફેડરેશને જણાવ્યું છે કે એક લિટર અમૂલ ફ્રેશ દૂધની કિંમત 54 રૂપિયા, અમૂલ ગાયના દૂધની એક લિટરની કિંમત 56 રૂપિયા અને અમૂલ A2 ભેંસના દૂધની કિંમત 70 રૂપિયા પ્રતિ લિટર છે. આ વર્ષે અમૂલ દ્વારા દૂધના ભાવમાં આ પ્રથમ વધારો છે. અમૂલે ગયા વર્ષે માર્ચ, ઑગસ્ટ અને ઑક્ટોબરમાં – ઊંચા ઉત્પાદન ખર્ચને ધ્યાનમાં રાખીને દૂધના ભાવમાં ત્રણ વખત વધારો કર્યો હતો.
આ પહેલા ગુરુવારે ડેરી ફર્મ પરાગ મિલ્ક ફૂડ્સે ગોવર્ધન બ્રાન્ડ ગાયના દૂધની કિંમતમાં 2 રૂપિયા પ્રતિ લિટરનો વધારો કર્યો હતો. ગોવર્ધન બ્રાન્ડ ગાયના દૂધના ભાવ વધારા માટે ઓપરેશન અને દૂધ ઉત્પાદનની કિંમતમાં વધારો થયો હોવાનુ કારણ જણાવ્યું છે. કંપનીએ એક નિવેદનમાં કહ્યું કે, દૂધની કિંમતોમાં વધારા સાથે ગોવર્ધન ગોલ્ડ મિલ્કની કિંમત હવે 54 રૂપિયા પ્રતિ લિટરથી વધીને 56 રૂપિયા થઈ ગઈ છે. પરાગ મિલ્ક ફૂડ્સના ચેરમેન દેવેન્દ્ર શાહે જણાવ્યું હતું કે, ઊર્જા, પેકેજિંગ, લોજિસ્ટિક્સ અને પશુ આહારની કિંમતમાં વધારો થવાને કારણે દૂધના ભાવમાં વધારો થયો છે.
Published On - 9:37 am, Fri, 3 February 23